Josuwa 13 - Bhibhiliya Nya Guage

II. GUKABANISEDWA NYA LITIGO Mayigo ma nga bani ma si gu phangwi

¹ Gikhati gyogyo, Josuwa a di gumbide, nari ni myaga nya gulaphe, Pfhumu Nungungulu a di mu embela, khuye: “U gumbide, aholu gu nga gu kiyela gipandre nya gingi nya litigo gasi gu liphanga.

² Litigo li nga tshadego khu eli: Gipandre gyatshavbo gya Vafilisitiya, ni gipandre gyatshavbo gya Vagesuri;

³ gukhugela Siyori, gu manegelago mbeli ga Egipito, kala vbinganoni ga Ekoroni khu phuvbo ga Wuronga, litigo li gupwani la gu lumba Vakhanani; litigo li gu ni livbandre manganagana nya Vafilisitiya va Gaza, va Asidhodhi, va Asikeloni, va Gati ni va Ekoroni;

⁴ khu Marandzi gu di manega Vahevhi; litigo latshavbo la Vakhanani gukhugela Meyara nya Vasidhoni kala Afeka vbinganoni ga Vaamori;

⁵ litigo la Vagebhali, gumogo ni Libhanoni gwatshavbo, khu phuvbo ga Khugadambo, gukhugela Bhahali-Ghadhi, vbafuvbi ni gigomo gya Herimoni, kala vbanyangwatunu ga Hamati;

⁶ vatshavbo va nga bani va vbahide gigomoni, gukhugela Libhanoni kala matini ga Miserifoti-Mayimi, vatshavbo va na Sidhoni. Eni nyi na va lundra mbeli ga sanana sa Israyeli. U na va kabanisela li khala thomba yawe kha nga idzo nyi gu leletedego khidzo.

⁷ Gasi olu, kabanisela litigo leli ga livbandre na mana mahundzu, ni ga gipandre nya lihundzu la Manasi.”

Mayigo ya khisikheyi ga Joridhani

⁸ Va na Rubheni, va na Gadhi ni gimbe gipandre nya lihundzu la Manasi, va di hakhide khu ga Mosi, gipandre nya thomba yawe khu khisikheyi ga Joridhani, guya Khugadambo, kha nga li nga bani li ningedwe ga Mosi githumi gya Pfhumu Nungungulu.

⁹ Guphela khu Aroweri, gu manegelago dzibambe nya tsongo wa Arinoni, gukhugela ga lidhoropa li manegelago vbavbatshi nya kova, ni panini gwatshavbo gwa Medhebha kala Dhibhoni.

¹⁰ Madhoropa yatshavbo ya Seyoni, mufumeli wa Vaamori, a nga bani na gu fumela Hesibhoni, kala vbinganoni ga Vaamoni;

¹¹ Gileyadhi, gumogo ni litigo la Vagesuri ni Vamahakati, kha nga gambe ni gigomoni gwatshavbo ga Herimoni, ni Bhasani gwatshavbo kala Salika;

¹² Mufumo watshavbo wa Ogi, tigoni ga Bhasani, a fumidego Asitaroti ni Edhireyi, a gu uye a tshadego ga vadandrangulu, avo Mosi a nga va khozisa ni gu va tutumisa.

¹³ Va na Israyeli kha va nga khozisa va na Gesuri ambari va na Mahakati. Khu guralo, va na Gesuri ni va na Mahakati va vbahide vbakari ga va na Israyeli kala na muhuno.

Thomba yi kabanisedwego khu Mosi

¹⁴ Lihundzu la na Levhi khilo basi li ngamba kabaniswa thomba; kholu thomba yawe a diri miphaselo yile nya guvbisedwe Pfhumu Nungungulu wa Israyeli, kha nga edzi a va leletedego khidzo.

¹⁵ Khu guralo, Mosi a di ningelago lihundzu la na Rubheni thomba yawe, gukhedza khu mapango yawe.

¹⁶ Litigo lawe li di khugela Aroweri, li manegelago bambe nya gitsongwana gya Arinoni, gukhugela ga lidhoropa li guromo vbakari nya kova, ni panini gwatshavbo, vbafuvbi ni Medhebha;

¹⁷ Hesibhoni ni madhoropa yaye yatshavbo ya panini, a gu aya: Dhibhoni, Bhamoti-Bhahali, Bheti-Bhahali-Meyomi,

¹⁸ Jaza, Kedhemoti, Mefahati;

¹⁹ Kiriyatayimi, Sibima, Zereti-Sahari gigomoni gya kovani;

²⁰ Bheti-Peyori, ni mireleloni ya Pisiga ni Bheti-Jesimoti;

²¹ madhoropa yatshavbo yaya ya panini ni mufumo watshavbo wa Seyoni, mufumeli wa Vaamori va Hesibhoni, va nga khoziswago khu Mosi ni vathangeli Vamedhiyani, Evhi, Rekemi, Suri, Huri ni Rebha, dzindruna dza Seyoni dza tigoni mule.

²² Vbakari ga avo va nga sasedwago khu matshari khu va na Israyeli, a di romo nuye tengoni Bhalahama, mwamana wa Bheyori, a nga bani nari nyanga.

²³ Khu magirelo yaya, litigo la na Rubheni, li di vboha kala tsongoni wa Joridhani ni dzibambe gwaye. Eyi khiyo thomba ya va na Rubheni, khu madhoropa ni mitalala gukhedza khu mapango yawe.

²⁴ Mosi a di ningela gambe gimbe gipandre ga sanana sa Gadhi, gukhedza khu mapango yawe.

²⁵ Litigo lawe kheli: Jazeri, ni madhoropa yatshavbo ya Gileyadhi, gipandryana nya litigo la na Amoni kala Aroweri, mbeli ga Rabha,

²⁶ gukhugela Hesibhoni, kala Ramati-Misipa ni Bhetonimi, ni gukhugela Mahanayimi kala vbinganoni wa Dhebhiri,

²⁷ ni mireleloni, Bheti-Harani, Bheti-Ninira, Sukoti ni Safoni, a gu mitshaledwa nya litigo la Seyoni mufumeli wa Hesibhoni, Joridhani a diri uye vbingano wakone, kala mahegiso nya yiphwa ya Kinereti, khisikheyi ga Joridhani, guya Khugadambo.

²⁸ Eyi khiyo thomba ya sanana sa Gadhi, madhoropa ni mitalala, gukhedza khu mapango yawe.

²⁹ Mosi a di ninga gambe thomba gipandre nya lihundzu la Manasi, gukhedza khu mapango yawe.

³⁰ Litigo lawe kheli: Gukhugela Mahanayimi, ni Bhasani watshavbo, mufumo watshavbo wa Ogi, mufumeli wa Bhasani, gumogo ni mitalala yatshavbo ya Jayiri, tigoni ga Bhasani; yatshavbo yi diri livbandre na limwedo magumi madhoropa;

³¹ ni gipandre gya Gileyadhi, Asitaroti ni Edhireyi, madhoropa ya mufumo wa Ogi, tigoni ga Bhasani, aya ma di ningedwa sanana sa Makiri, mwamana wa Manasi, gipandre gya sanana sa Makiri, gukhedza khu mapango yawe.

³² Khidzo edzi dzithomba Mosi a nga kabaniselago va na Israyeli, panini ga Mowabhi, khisikheyi nya tsongo wa Joridhani, gu khedzanago ni Jeriko khu Khugadambo.

³³ Aholu Mosi kha nga ninga thomba lihundzu la Levhi; Pfhumu Nungungulu wa Israyeli, khuye thomba yawe, kha nga idzo va nga leletedwago khidzo khu Mosi.