Josuwa 11 - Bhibhiliya Nya Guage

Guwandrwa ga mayigo ya Wuronga

¹ Avbo Jabini, mufumeli wa Hazori, a nga pwago mahungu yaya, a di rumela myango ga Jobhabhi, mufumeli wa Madhoni, ni ga mufumeli wa Siniromi, ni ga mufumeli wa Akisafi,

² ni ga vafumeli va sigomoni sa Wuronga, ni va mikovani ga Marandzi ga Kinereti, ni va mapanini ya Dhori, khu Pfoladambo,

³ ga Vakhanani va Khugadambo ni Pfoladambo, ga Vaamori, ga Vahiti, ga Vaperezi, ga Vajebhusi va musigomoni ni ga Vahevhi vbafuvbi ga Herimoni, tigoni ga Misipa.

⁴ Khavbo avbo, avo va di duga gumogo ni masotshwa yawe yatshavbo, ni gidzemo nya gingi nya gutale ngudzu kha nga fungu wa phwani; ni dzikavalu gumogo ni dzikareta nya gutale ngudzu.

⁵ Vafumeli vatshavbo vava va di tombana, vata zumba vbafuvbi ni mati ya Meromi, gasi gudwanisa va na Israyeli.

⁶ Pfhumu Nungungulu a di embela Josuwa, khuye: “U nga khali hwanga mbeli gwawe; kholu mindru, khu gikhati nya gufanane ni egi, Eni nyi na bani nyi va ningede vatshavbo va songwa mandzani ga na Israyeli. U na pila misivba nya mawundru nya dzikavalu dzawe, u vbisa dzikareta dzawe khu nilo.”

⁷ Khavbo avbo, Josuwa gumogo ni masotshwa yaye, va dita khu guvbiredza matini ya Meromi, vata va sasela.

⁸ Pfhumu Nungungulu a di va ningela mandzani ga va na Israyeli, va va pala, va gu va lundra kala Sidhoni nya khongolo, va vboha Misirefoti-Mayimi, kala kovani wa Misipa khu Khugadambo; va di va sasela nyamba tshiya ni moyo nya guvbanye.

⁹ Josuwa a di va gira kha nga idzo a embedwego khidzo khu Pfhumu Nungungulu; a pila misivba dzikavalu dzawe, ni gu vbisa dzikareta dzawe.

¹⁰ Khu gikhati gya gimwegyo, Josuwa a di wuya ata phanga Hazori, a songa khu litshari mufumeli waye, kholu, khu gale Hazori, a diri tsindza nya mifumo yeyi yatshavbo.

¹¹ A sasela khu matshari vatshavbo va nga bani vari umomo, a va mbembisa muphelo nyamba tshiya ni moyo nya guvbanye; Hazori gu di vbiswa khu nilo.

¹² Josuwa a di phanga madhoropa yatshavbo, a songa vafumeli vawe khu matshari, a va mbembisa muphelo, kha nga guleletela ga Mosi, githumi gya Pfhumu Nungungulu.

¹³ Aholu madhoropa ma nga bani ma vbahidwe musigomoni, va na Israyeli kha va ma vbisa, vbavbandze ga eli basi la Hazori li nga vbiswa khu Josuwa.

¹⁴ Va di kabana satshavbo va nga phangago madhoropani mule ni mitshambi; aholu vathu vatshavbo va di va sasela khu matshari, kala va va mbembisa, nyamba tshiya ni moyo nya guvbanye.

¹⁵ Kha nga idzo Pfhumu Nungungulu a nga leletelago khidzo githumi gyaye Mosi, Mosi nuye a di leletela Josuwa; khu guralo, Josuwa nuye a di si gira; gimwalo ni gimwegyo a ngamba gi landrisa ga satshavbo esi Pfhumu Nungungulu a leletedwego Mosi.

¹⁶ Khu guralo, Josuwa a di wandra litigo lile la musigomoni, Negebhi watshavbo, ni litigo latshavbo la Goseni, Arabha, ni gipandre gyatshavbo gya musigomoni ga Israyeli gumogo ni mapanini gwaye,

¹⁷ gukhugela gigomoni gya Halaki, gi khadego khu phuvbo ga Seyiri, kala Bhahali-Ghadhi, gu manegelago kovani ga Libhanoni, vbafuvbi ni gigomo gya Herimoni. A di dhumela vafumeli vovo vatshavbo a va sasela.

¹⁸ Gikhati nya gingi Josuwa a di dwanisa vafumeli vava vatshavbo.

¹⁹ Gumwalo ni lidhoropa limwedo li nga hungago gurula ni va na Israyeli, vbavbandze ga Vahevhi, vavbanyi va Gibheyoni. Yatshavbo a di ma wandra khu gu dwana.

²⁰ Kholu Pfhumu Nungungulu a di bangisa myonyo yawe a va gira va dwanisa Israyeli, gasi va kodze gu mbembisedwa muphelo nyamba pwedwa gisiro; gasi va fuviswa, kha nga idzo Pfhumu Nungungulu a nga leletisa khidzo Mosi.

²¹ Khu gikhati gyogyo, Josuwa a di hongola aya mbembisa va Anaki va gigomoni gya Hebroni, gya Dhebhiri, gya Anabhi gumogo ni sigomo satshavbo sa Judha niso sa Israyeli, Josuwa a di si mbembisa gumogo ni madhoropa yawe.

²² Mwalo ni moyo basi nya muanaki a tshadego nya guvbanye tigoni ga sanana sa Israyeli; vbavbandze basi tigoni ga Gaza, Gati ni Asidhodhi khumo va tshadego vadugwana nya gukari.

²³ Khu guralo, Josuwa a di khozisa tigoni gwatshavbo, kha nga idzo Pfhumu Nungungulu a nga leletelago khidzo Mosi; khu guralo, Josuwa a di li ningela li khala thomba ya na Israyeli, va kabaniswa mayelano khu lihundzu lawe. Khavbo avbo, tigoni gu di manega gurula.