Josuwa 1 - Bhibhiliya Nya Guage

I. GUWANDRWA NYA LITIGO LA KHANANI Nungungulu a ngu ganela ni Josuwa a mu tiyisa

¹ Avbo a ngafago Mosi, githumi gya Pfhumu Nungungulu, Pfhumu Nungungulu a di ganela ga Josuwa, mwamana wa Nuni, githumi gya Mosi, khuye:

² “Githumi gyangu Mosi gi fude; khu guralo, khuga uwe u tshatuga tsongo wa Joridhani, uwe gumogo ni vathu vatshavbo vava, mu ya bela tigoni nyi ningidego sanana sa Israyeli.

³ Malangani yatshavbo gu gu gandredzedwago khu migondro yanu, nyi mi ningideni, kha nga idzo nyi tumbisidego ga Mosi.

⁴ Gukhugela giwulani ni Libhanoni kala tsongoni nya wukhongolo wa Ewufrate, litigo latshavbo la Vahiti kala yiphwa nya Yikhongolo ya Pfoladambo, wu na bani wuri uwo vbingano wanu.

⁵ Matshigu yatshavbo nya guvbanye gwago mwalo a na tiyago gu ema mbeli gwago; kha nga idzo nyi giridego ga Mosi, nyi na gira gambe kharato avbo gwago; gima kha nyi na gu diga, ambari gu gu tshiya hwane.

⁶ Tiya longo u manega ni tshivba ni gutimisela, kholu khuwe u na thangelago vathu vava kala va bela ga litigo nyi sambanyidego gu ninga vababe vago.

⁷ U nga khali basi muthu nya tshivba ni gutimisela, gu vbwetega u dzi wonele u gira kha nga idzo wu rumago nayo watshavbo owu githumi gyangu Mosi gi gu leletedego; u nga tshuki u wu diga u ndreya, uya nyamudye mwendro nyambade, gasi sigiro sago si gu dugela gwadi ni evbini umo u na gimbilago khumo.

⁸ U nga garali khu gu ganela khu libhuku nya Nayo; aholu gu vbwetega wutshigu ni mihani u alakanyela, gasi u landrisa satshavbo iso si lovidwego umo; khavbo avbo, u na andra ndzilani gwago bwelo khavbo u dugelela.

⁹ Gasi kha nya gu ruma, gani? Gukheni tiya longo ni gutimisela; u si thavi ambari guthuruga kholu Pfhumu Nungungulu wago, a na bani ari nago gwatshavbo umo u na gimbilago khumo.”

Gudongisela gu tshatuga tsongo wa Joridhani

¹⁰ Khavbo avbo, Josuwa a di leletela vathangeli nya vathu, a va embela, khuye:

¹¹ “Vbindrani khu vbakari nya lizumbo mu leletela vathu, khenu: Dongiselani dzimbuva, kholu hwane nya matshigu mararu mu na tshatuga tsongo wa Joridhani, mu ya khozisa litigo eli Pfhumu Nungungulu wanu, a mi ningidego gu li fumela.”

¹² Josuwa a di embela lihundzu la va na Rubheni, va na Gadhi ni gipandre nya linyumba la na Manasi, khuye:

¹³ “Dundrugani esi Mosi, githumi gya Pfhumu Nungungulu, a mi leletedego, gukhuye: Pfhumu Nungungulu wanu a mi ningide guhefemula vbakari nya litigo latshavbo leli;

¹⁴ vagadzi vanu ni sanana sanu, ni sifuyo sanu si na tshala tigoni momu Mosi a mi ningidego khisikheno nya tsongo wa Joridhani; gasi enu vama nya dzindrena ni mitiyedwa mu na thanga mbeli gumogo ni vandriyanu gasi mu va phasedzela,

¹⁵ kala Pfhumu Nungungulu a ninga vandriyanu guhefemula gumogo ni enu, gasi avo navo va ya bela va fumela litigo eli Pfhumu Nungungulu a na va ningago. Khu hwane, enu mu na bwelela tigoni li mi lumbago, eli Mosi githumi gya Pfhumu Nungungulu, a mi ningidego khu Khugadambo wa khisikheyi nya tsongo wa Joridhani.”

¹⁶ Avo va di hakha, khavo: “Hi na gira satshavbo esi u hi leletedego, ni gu hongola gwatshavbo umo u na gu hi rumelago.

¹⁷ Hi na gu yingisa ga silo satshavbo, kha nga idzo hi giridego khidzo ga Mosi. Igyo hi gi vbwetago basi khu gukhethu Pfhumu Nungungulu wago a na khale ni uwe, kha nga idzo a khadego khidzo ni Mosi.

¹⁸ Uye a na gu wugelago a yeyisa milayo yago, a na songwa. Khu guralo, tiya u si thavi gilo.”