Jona 1 - Bhibhiliya Nya Guage

Guranwa ni guthava gwa Jona

¹ Gu dita lito khu ga Pfhumu Nungungulu a embela Jona, mwamana wa Amitayi, khuye:

² “Khuga u hongole ga lidhoropa nya likhongolo la Ninivha, u ya li kawuka, kholu guvivba gwaye gu litide kala eno gwangu.”

³ Aholu Jona a di khuga mahoni ga Pfhumu Nungungulu a thava, a hongola Tarisisi; a di relela dhoropani ga Jope, avbo a ngaya mana litaro li nga bani li gu hongola Tarisisi; khu guralo, a di renga lithigiti, a gu bela litaroni gasi gu hongola navo Tarisisi, hwindzo ni khovbe ya Pfhumu Nungungulu.

Gingulu

⁴ Khu guralo, Pfhumu Nungungulu a di rumela phuvbo nya yikhongolo linene, gu manega gingulu nya gikhongolo, avbo litaro li nga hadza gupandrega.

⁵ Khavbo avbo, vagimbidzisi nya litaro va di thava, moyo ni moyo a di lila ga nungungulu waye, va di dzudzugela matini sombo satshavbo si nga bani si romo litaroni gasi gu vbungula gulemela; khu guralo, Jona a di relela vbavbatshi wulangani nya guvegedzedwe sombo, a di ya lala a manwa khu ligovbe nya likhongolo.

⁶ Mugimbidzisi nya litaro a di hidzimela gwaye aya, khuye: “Khu ginani u khalago umomo nu lade? Wuga u lomba ga Nungungulu wago! A gudzina saye Nungungulu yoyo a na hi alakanya gasi hi si mbembi.”

⁷ Va di embedzelana khu gyawe, khavo: “Hongoleni hi lola dzisolo, gasi hi kodze gutugula gukhethu khu mani a hi reselago libango leli.” Va di lola dzisolo, dzi thegela Jona.

⁸ Khu guralo, va di mu wudzisa, khavo: “Hi embele khu mani a gu mune nya libango leli? Khu wevbini thumo wago? Wa guta khu hayi? Khu levbini litigo lago? Wa gu lumba lihundzu muni?”

⁹ Uye a di va hakha, khuye: “Eni nyi Muhebheru, nya gu khozela Pfhumu Nungungulu wa Ndzadzini, a vangidego linene ni mafu nya gubange.”

¹⁰ Khu guralo, vama vava va di tala khu hwanga, va mu wudzisa, khavo: “Ginani u giridego?” Vama va di gu dziti gukhavo Jona a di thava mbeli ga Pfhumu Nungungulu, kholu uye a di va embede.

¹¹ Khu guralo, va di mu wudzisa, khavo: “Olu hi ngu gira ginani khuwe, gasi linene li kodza gurula?” Kholu linene li diya na li gu engedzelana gughubhuta ni gu gugumuga ngudzu.

¹² Uye a di va hakha, khuye: “Nyi duseni mu nyi rinya matini nya linene, ilo li na rula; kholu nyi ngu dziti gukheni khu kotani gwangu mu dugedwego khu gingulu gegi nya gikhongolo.”

Jona a ngu rinywa matini

¹³ Khu guralo, vama va di zama gu dzuwa makasiya khu tshivba, gasi va kodze gu manela mafu, aholu kha va dzi kodza, kholu linene li diya na li gu engedzelana guvbenya ngudzu li va garadza.

¹⁴ Avo va di lila ga Pfhumu Nungungulu, khavo: “Pfhumu Nungungulu, hi ngu gu lomba! U nga hi digi hifa khu gu dusa hefemulo wa mwama yoyu, hi nga thegedwi khu libango khu kotani nya gusonge muthu nyambana nandru, uwe Pfhumu Nungungulu u giride iso u nga bani u si vbweta.”

¹⁵ Va di khusa Jona va mu rinya linene nya guvbenye, ilo li di rula.

¹⁶ Na va wonide esi, vama va di khozela Pfhumu Nungungulu khu githawo nya gikhongolo; va di mu girela miphaso ni gu gira sisambanyo.

¹⁷ Pfhumu Nungungulu a di ruma ndzandzi nya yikhongolo yi ta midza Jona; Jona a di khala ndrani nya ndzandzi matshigu mararu, wutshigu ni mihani.