Johane 9 - Bhibhiliya Nya Guage

Jesu a ngu hawulugisa gikhumu nya mavelego

¹ Na gu vbindra khu ndzila, Jesu a di wona gikhumu nya mavelego.

² Vapizane vaye va di mu wudzisa, khavo: “Rabi, khu mani a nga ghoha, gasi gu uye a velegwe nari gikhumu, khuye mwendro khu vavelegi vaye?”

³ Jesu a di hakha, khuye: “Uye kha ghoha, ambari vavelegi vaye navo; aholu, gu giregide esi, gasi gu wonegiswa khavbo gwaye tshivba ya Nungungulu.

⁴ Nyi fanede gu gira mithumo ya uye a nyi rumedego na gu ngari mihani; wu nguta wutshigu, avbo muthu a si kodzigo guthuma.

⁵ Na nyi nga romo tigoni, kheni wenengedzo nya litigo.”

⁶ Na ganede isoso, a di hetsha vbavbatshi, a gu gira thomwa khu dzindrura, a todza mahoni nya gikhumu;

⁷ a gu gi embela, khuye: “Indra hamba lidhamuni ga Silowe” (gutshamusago pwani “Girumwa.”) Gikhumu gi di hongola giya hamba, gi wuya na gi gu wona.

⁸ Vaakelane vaye ni vathu va nga bani va gu muti gukhavo gikhumu, va di khavo: “Ina, khandruye oyu a nga bani a gu lomba zomola, gani?”

⁹ Vambe va di khavo: “Khuye.” Vambe, khavo “A gufanana naye.” Gasi uye mune a di khuye: “Kheni kamwe.”

¹⁰ Khavbo avbo, va di mu wudzisa, khavo: “Ma tulegide khu magirelo muni maho yago?”

¹¹ A di va hakha, khuye: “Muthu wule a ranwago pwani khu Jesu, a di gira thomwa, a gu nyi tola khiyo mahoni; a nyi ruma, khuye: ‘Indra hamba lidhamuni ga Silowe.’ Khavbo avbo, nyi diya hamba nyi gu tulega maho.”

¹² Va di mu wudzisa, khavo: “Uye womo hayi?” A di va hakha, khuye: “Ahati!”

Vafarisi va ngu yeyisa wufumu wa Jesu

¹³ Va di yisa ga Vafarisi wule a nga bani ari gikhumu.

¹⁴ Gulidiri Sabhadho, litshigu Jesu a nga girago thomwa a mu tula maho.

¹⁵ Vafarisi va di mu wudzisa gambe, gukhavo: “Ma tulegiside kharini maho yago?” A di va hakha, khuye: “A di nyi thela thomwa mahoni, nyiya hamba, khavbo avbo, nyi di wona.”

¹⁶ Na va pwide esi, vambe Vafarisi, va di khavo: “Muthu yoyu khati khu ga Nungungulu, kholu kha vegedzi Sabhadho.” Gasi vambe va di khavo: “A ngu dzi kodza kharini muthu nya gighohi gu gira siliwugiso nya nga esi?” Gu di manega guhambana vbakari gwawe.

¹⁷ Va di wudzisa nyaluphye mwama a nga bani nari gikhumu, khavo: “U ngu khuwe ginani khu wule a gu tudego maho?” A di va hakha, khuye: “Muprofeti.”

¹⁸ Vakhongolo nya Vajudha kha va nga khodwa gukhavo a diri gikhumu, ni gukhavo tudwe maho; va di ranisa vavelegi vaye.

¹⁹ Va di va wudzisa, khavo: “Ina khuye oyu mwamana wanu mu gukhenu velegidwe nari gikhumu, gani? A gu wonisa kharini olu?”

²⁰ Vavelegi va di khavo: “Hi ngu muti gukhethu oyu mwamana wathu, ni gukhethu velegidwe nari gikhumu;

²¹ aholu, gukhethu tulegiside kharini maho, kha hi dziti. Ni gukhethu khu mani a mu tudego, kha hi muti; muthu a dandridego; mu wudziseni a na dzi ganelela abune.”

²² Vavelegi vaye va di ganela kharati khu gu thava vakhongolo nya Vajudha, kholu vakhongolo nya Vajudha va di hungide gikungo nya gukhavo: “Uye a na ganelago gukhuye Jesu khuye Kristo, a na tutumiswe nyumbani nya nombelo.”

²³ Khu kharato vavelegi vaye va nga, khavo: “Muthu a dandridego, mu wudziseni uye mune.”

²⁴ Va di rana nyaluphye wule a nga bani ari gikhumu, va mu embela, khavo: “Sambanya lisine mbeli gwa Nungungulu! Ethu hi ngu dziti gukhethu muthu yoyo gighohi.”

²⁵ A di va hakha, khuye: “Gani gighohi, kha nyi dziti; gilo gimwegyo nyi gitigo basi: Nyi diri gikhumu, olu nyi ngu wona.”

²⁶ Va di engedza gu mu wudzisa, khavo: “A di gu rini, gwadi? A di gu tudzisa kharini maho?”

²⁷ A di va hakha, khuye: “Nyi mi embedeni, kha mu vbweti gupwa; mwa gu nyi wudzisela ginani gambe? Mwa guvbweta gu khala nenu vapizane vaye, gani?”

²⁸ Khavbo avbo, va di mu yuyutela, khavo: “Mupizane waye khuwe; ethu hi vapizane va Mosi.

²⁹ Ga Mosi hi ngu dziti gukhethu Nungungulu ganede; gasi oyu kha hi muti a guta khu hayi.”

³⁰ Uye a di va hakha, khuye: “Giliwugiso nya gikhongolo igyogyo! Gumba mutini umo atago khumo, aholu uye a nyi tude maho.

³¹ Hi ngu dziti nya gukhethu Nungungulu kha yingisi sighohi, aholu a gu yingisa vale va mu ningago githawo ni gu gira gugola gwaye.

³² Gima ni gima gu si pwali gupwani womo a nga nga tula maho gikhumu nya mavelego.

³³ Nari pwani uye khandri wa Nungungulu na sa gira gilo.”

³⁴ Va di mu hakha, khavo: “Uwe muthu u velegidwe wurumba wago mu gighohoni. Olu wa guvbweta gu hi hevbudza?” Khavbo avbo, va di mu tutumisa.

Wukhumu wa Vafarisi

³⁵ Jesu, na pwide gupwani va mu tutumiside, a di mu mana a mu wudzisa, khuye: “U ngu khodwa ga Mwamana wa Muthu, gani?”

³⁶ Uye a di hakha, khuye: “Ama Pfhumu, nari mani uye, gasi nyi dzi kodza gukhodwa gwaye?”

³⁷ Jesu a di khuye: “U mu wone; khuye oyu a ganelago nago.”

³⁸ A di mu hakha, khuye: “Pfhumu, nyi ngu khodwa.” A di khidzima migondroni gwaye.

³⁹ Jesu, khuye: “Eni nyi dzude mafuni kha nga mulamuli, gasi vale va si wonigo va wone; ni gu vale va wonago va khale sikhumu.”

⁴⁰ Vambe Vafarisi, na va pwide magana yaya, va di khavo: “Wa guvbweta gukhuwe ethu nethu hi sikhumu, gani?”

⁴¹ Jesu a di khuye: “Nari pwani mu sikhumu, mu diri mwalo nandru. Kha nga olu mu gukhenu mu ngu wona, nandru wanu wu na simamisa.”