Johane 18 - Bhibhiliya Nya Guage

Gumodwa ga Jesu

¹ Na giride nombelo yoyu, Jesu a di duga ni vapizane a gu hongola khisikheyi nya gitsongwana gya Kedhroni, avbo li nga bani li romo lithembwe nya senge, umo a nga belago ni vapizane vaye.

² Judha, wule a nga mu ningela, a di gu wuti wulanga wule, kholu Jesu a di gu tshangana vbale ni vapizane vaye dzinyondro nya dzingi.

³ Judha a di vbelegedza tsawa nya masotshwa ni dzindruna dzi nga rumedwago khu vaphasi nya vakhongolo ni Vafarisi, vari ni myenge ni matshari.

⁴ Jesu, khu gu siti satshavbo si nga vbweta gu mu dugelela, a di va khinga, aya va wudzisa, khuye: “Mwa guvbweta mani?”

⁵ Avo va di mu hakha, khavo: “Jesu wa Nazareta.” Jesu a di phindrula, khuye: “Kheni kamwe.” Judha wule a nga mu ningela, a diri navo.

⁶ Gikhati Jesu a nga khuye: “Kheni kamwe,” va di bwelela nya gihwane, va gu thega vbavbatshi.

⁷ A di va wudzisa nyaluphye, khuye: “Mwa guvbwetani mani, gwadi?” Va di mu hakha, khavo: “Jesu wa Nazareta.”

⁸ Jesu a di khuye: “Nyi mi embedeni gukheni, kheni. A gu bani ari eni mu nyi vbwetago, digani ava va hongole.”

⁹ Esi si giregide gasi gutadzisega magana a nga ganela, khuye: “Vale u nyi ningidego kha nya dzimedza ni moyo.”

¹⁰ Khavbo avbo, Simoni Pedro, a nga bani ari ni litshari, a di pila khilo ndzeve ya nyamudye ya Maliko, githumi gya khongolo nya vaphasi nya mhamba.

¹¹ Aholu, Jesu a di embela Pedro, khuye: “Vega litshari wulangani gwaye. Wa guvbweta khuwe nyi si seli gikombe nya gutshaniseke nyi nga ningwago khu Babe wangu, gani?”

Pedro a ngu danga Jesu

¹² Khavbo avbo, masotshwa ni vathangeli vawe, gumogo ni dzindruna nya Vajudha, va di mola Jesu, va mu hunga.

¹³ Guhegula va di mu yisa ga Anasi, kholu a nga bani ari sade wa Khayifasi, khongolo nya vaphasi nya mhamba mwagani momo.

¹⁴ Khuye Khayifasi yoyu a nga ningago Vajudha wusingalagadzi, nya gukhuye: “Tshukwana gufa muthu moyo afela vathu vatshavbo.”

¹⁵ Gikhati gyogyo, Simoni Pedro ni moyo nya vapizane va di landrisela Jesu. Mupizane yoyo a di gu tivana ni khongolo nya vaphasi nya mhamba, khu kharato a di bela ni Jesu nyumbani ga khongolo nya vaphasi, umo nya gulamuledwe mahungu,

¹⁶ a gu tshiya Pedro vbavbandze, vbamwanyatunu. Na dugide mupizane yoyu, a di lomba ga nyamayi a nga bani a gu ghadha vbamwanya gu bela ni Pedro.

¹⁷ Khavbo avbo, nyamayi wule a di wudzisa Pedro, khuye: “Khandruwe nuwe mupizane wa mwama wule, gani?” Uye a di hakha, khuye: “Khandreni.”

¹⁸ Vbale, si diromo sithumi ni dzindruna, va nga bani va khuthide nilo va wora, kholu gu di gu dzidzila. Uye nuye Pedro a di romo vbale a wora nilo.

Jesu a ngu lamudwa khu khongolo nya vaphasi nya mhamba

¹⁹ Khu vbale, khongolo nya vaphasi nya mhamba a di wudzisa ga Jesu khu mahungu nya vapizane vaye ni gihevbudzo gyaye.

²⁰ Jesu a di mu hakha, khuye: “Nyi ganede tigoni nyamba siha gilo; nyi hevbudzide gikhati gyatshavbo ndrani nya Nyumba nya nombelo ni Nyumbani ya Nungungulu, umo va tshanganelago umo Vajudha vatshavbo, gimwalo nyi nga ganelago khu gisihaledza.

²¹ Khu ginani u nyi wudzisago? Wudzisa avo va ngapwa iso nyi nga va hevbudzago; va ngu siti gwadi iso nyi va embedego.”

²² Na ganede esi, moyo nya ndruna a nga bani a romo vbale, a di mu veta khu pama, khuye: “Khidzo kharati u hakhago khidzo khongolo nya vaphasi nya mhamba, gani?”

²³ Jesu a di mu hakha, khuye: “Nya gubani nyi hosiside, nyi yeyedze gihoso gyakone; aholu, nya gubani nyi ganede gwadi, khu ginani u nyi vetago?”

²⁴ Khu vbale, Anasi a di mu rumela, na hungidwe, ga Khayifasi, khongolo nya vaphasi nya mhamba.

Pedro a ngu danga Jesu nya wuvili

²⁵ Gikhati gyogyo, Simoni Pedro, a di khade vbagikhotunu a wora nilo va mu wudzisa, khavo: “Khandruwe nuwe moyo nya vapizane vaye, gani?” A di danga, khuye: “Khandreni.”

²⁶ Moyo nya sithumi sa khongolo nya vaphasi nya mhamba nya nongo wa wule a nga pidwa ndzeve khu Pedro, a di khuye: “Ina khandruwe nyi nga gu wona naye thembweni nya senge, gani?”

²⁷ Pedro a di danga nyaluphye. Gikhati gyogyo wu di emba khonge.

Jesu mahoni ga Pilato

²⁸ Khavbo avbo, va di dzega Jesu khu ndrangani ga Khayifasi va gu hongola naye ga mufumeli. Gu di ngari dzimindru dzikhongolo. Avo kha va nga bela nyumbani nya gulamuledwe mahungu, gasi va si dzi loledzisi, vafela gu hodza Phasika.

²⁹ Khu kharato, Pilato a di duga vbavbandze, a gu wudzisa, khuye: “Ketso muni mu gu nayo ni muthu yoyu?”

³⁰ Va di mu hakha, khavo: “Nari pwani khandri gighohi na ha sa mu resa avbo gwago.”

³¹ Pilato a di va phindrula, khuye: “Mu dzegeni, mu mu lamula kha nga idzo wu lombago khidzo nayo wanu.” Vajudha va di khayo: “Ethu hi mwalo fanelo nya gusonge muthu.”

³² Esi si giregide, gasi gutadzisega magana a nga ganelago Jesu, na gu thula mafelo yaye.

³³ Pilato a di bela nyaluphye nyumbani, a gu rana Jesu, a mu wudzisa, khuye: “Ina kamwe uwe u Mufumeli wa Vajudha, gani?”

³⁴ Jesu a di mu hakha, khuye: “Isoso u ganelago wa gu si khugela mwendro womo a nga gu embelago?”

³⁵ Pilato a di hakha, khuye: “Gasi eni nyi Mujudha, gani? Va na gyanu ni vakhongolo nya vaphasi nya mhamba khavo va gu ningedego mandzani gwangu. Gasi ginani u ghohidego?”

³⁶ Jesu a di khuye: “Mufumo wangu khandri wa mafuni momu. Nari pwani mufumo wangu khwa mafuni momu, sithumi sangu na si dwanide, gasi nyi si ningedwi ga Vajudha; aholu, mufumo wangu khandri wa omu.”

³⁷ Pilato a di khuye: “Gasi kamwe u Mufumeli?” Jesu, khuye: “Nya nga ulo u ganelago! Eni nyi Mufumeli! Nyi velegedwe isoso; khiso nyi si tedego mafuni, gasi guta ninga wufakazi nya lisine. Uye a gu wa lisine a ngupwa lito langu.”

³⁸ Pilato a di mu wudzisa, khuye: “Ginani lisine?” Na ganede esi, a di duga gambe vbavbandze, aya embela Vajudha, khuye: “Kha nyi mani nandru gwaye.

³⁹ Mu na ni giolovedzo nya gukhenu nyi tshule muthu khu Phasika. Mu ngu dzinani nyi tshule Mufumeli wa Vajudha, gani?”

⁴⁰ Khavbo avbo, va di hakha, na va gulumela, khavo: “Uyoyo ne, tshula Bharabhasi.” Aholu Bharabhasi yoyu a diri gighevenga.