Johane 16 - Bhibhiliya Nya Guage

¹ “Nyi mi embede esi, gasi mu si khunguvanyegi.

² Vajudha va na mi tutumisani umo nya dzinyumba nya nombelo. Gi ngu vboha gikhati nya gu vatshavbo vale va na mi songago va na pimisa gukhavo va gu rungudza ni gu thumela Nungungulu.

³ Va na gira kharato kholu kha va muti, Babe wangu ni eni.

⁴ Gasi olu nya gu mi embela esi, gufela gu gya gu vboha gikhati gyakone, mu dundruge gukhenu, nyi di mi embede; kha nya mi embelani gukhugela guhegulani, kholu nyi diri nanu.

Jesu a ngu tumbisa gu rumela Liphuvbo nya Guage

⁵ “Olu nyi ngu hongola ga wule a nyi rumedego. Mwalo ni moyo wanu a nyi wudzisago, khuye: Wa gu hongola hayi?

⁶ Myonyo yanu yi swihade, kholu nyi mi embelago silo sesi.

⁷ Aholu, lisine kheli: I tshukwana nyi gu hongola, kholu, nyamba hongola, kha nata gwanu Muphasedzeli, gasi nya gu hongola, nyi naya mu rumela ate gwanu.

⁸ Na vbohide a nata gira vathu va tigoni va tugule gukhavo va ghohide khu gumbati gukhavo gighoho gilo muni; ni gumba pima esi si godwago khu Nungungulu; ni gumbati ginani gulamula gwa Nungungulu.

⁹ Vathu va tigoni va ghohide khu gumbati gukhavo gighoho ginani, kholu kha va khodwa gwangu;

¹⁰ Va ghohide khu gumba pima esi si godwago khu Nungungulu, kholu eni nyi ngu hongola ga Babe, vathu kha va na nga nyi wona gambe;

¹¹ Va ghohide khu gu mbati gukhavo ginani gulamula gwa Nungungulu, kholu mufumeli nya litigo lamudwe.

¹² “Nyi ngari ni silo nya singi nya gu mi embeleni, aholu, kha mu dzi kodzi gu si hakha olu.

¹³ La guta Liphuvbo nya lisine, ilo li nata mi endredza, li mi yisa lisineni nya guvbelele, kholu kha li nata ganela silo nya gu si khugele, aholu li nata ganela silo li si pwidego, ni guta mi tivisani iso si natago.

¹⁴ Ilo li na nyi dhumisa, kholu li na tivisa basi iso li na gu hakhago khu mandzani gwangu.

¹⁵ Satshavbo si gu sa Babe tshangu neni. Khu kharato nyi na, kheni: Li na mi tivisa basi iso li na si hakhago khu mandzani gwangu.

Guwuya ga Jesu

¹⁶ “Nugunugu kha mu na nyi wona, khadukhadu mu nata nyi wona gambe.”

¹⁷ Khavbo avbo, vambe vapizane vaye va di khavo: “Ma gu tshamusela ginani magana yaya: ‘Nugunugu kha mu na nyi wona, khadukhadu mu nata nyi wona,’ nayo nya gukhayo: ‘Eni nyi ngu hongola ga Babe?’

¹⁸ Va di khavo: ‘Ginani Nugunugu yoyu a wu thulago?’ Kha hi dziti wa gu thula ginani.”

¹⁹ Jesu na dzitide nya gukhuye va guvbweta gu mu wudzisa, a di khuye: “Ina kamwe mwa gu wudzisana khiso nyi nga ganelago, kheni: ‘Nugunugu kha mu na nyi wona, khadukhadu mu nata nyi wona?’

²⁰ Khu lisine, nyi ngu mi embelani, kheni: Mu na lila ni gusaniseka, aholu litigo li na tsaka. Gani olu gusaniseka gwanu gu na vbindrugedza gu khala litsako.

²¹ Nyamayi a gu bani a lumwa, a gu saniseka, kholu gi vbohide gikhati gyaye; aholu, na hefemude, kha nga gu dundruga gambe gusaniseka gule, khu litsako nya gyanana a velegidego.

²² Gunene, olu mu na ni wusiwana, aholu eni nyi nata mi wonani nyaluphye; gikhati gyogyo myonyo yanu yi na tala khu gunengela. Mwalo a na mi dzegelago gunengela gwanu.

²³ “Litshigu lolo gi mwalo mu na nyi wudzisago. Nyi ngu mi embelani, khu lisine, nya gukheni: Satshavbo iso mu na lombago ga Babe khu lina langu, uye a na mi ningani.

²⁴ Gima mu si gu lombi gilo khu lina langu. Lombani, mu na ningwa, gasi gutsaka gwanu gu tadzisege.

²⁵ “Nyi mi embedeni esi khu sifananiso, aholu gi ngu vboha gikhati nyi na gumba mi embelani gambe khu sifananiso. Nyi na mi tivisani Babe wangu nyamba siha gilo.

²⁶ Litshigu lolo mu na lombani khu lina langu; kha nyirikheni: Nyi na mi lombelani ga Babe,

²⁷ kholu uye abune Babe a ngu mi gola, kholu mu nyi godego ni gukhodwa gukhenu nyi dzude khu ga Nungungulu.

²⁸ Nyi dzude tigoni na nyi guta khu ga Babe; nyaluphye nyi ngu diga litigo nyi hongola ga Babe.”

²⁹ Vapizane va di khavo: “Khupwi, olu wa ganela nyamba sihaledza; khu ganeli gambe khu sifananiso.

³⁰ Olu hi ngu wona nya gukhethu u nguti satshavbo, khu lireli gu wudziswa khu muthu, khu guralo hi ngu khodwa gukhethu wa guta khu ga Nungungulu.”

³¹ Jesu a di va hakha, khuye: “Olu mu ngu khodwa gwangu, gani?

³² Dzitini nya gukhenu gi ngu vboha gikhati, khigyo egi kamwe, mu na guta phalalegiswago, muthu ni muthu a hongola gaya gwaye, mu nyi tshiya nyenga. Aholu khandreni nyenga, kholu Babe a na ni eni.

³³ Nya gu mi embelani esi, gasi mu tshale ni gurula gwangu; mu na mana sigaradzo tigoni, aholu nyi tumbeni, kholu eni nyi pade litigo.”