Johane 13 - Bhibhiliya Nya Guage

Jesu a ngu handza migondro vapizane vaye

¹ Wu si gu vbohi buzo nya Phasika, Jesu na gu dziti gukhuye gi vbohide gikhati gyaye nya guvbindre mafuni momu a bwelela ga Babe waye, uye, a nga golago vathu vaye va nga bani va romo tigoni, a di va gola khu monyo waye watshavbo.

² Na vari vbakari nya gulalele, Sathane a di kutsedzela Judha Sikariyoti, mwamana wa Simoni, gasi a ningele Jesu.

³ Jesu, khu gu dziti gukhuye Babe a mu ningide tshivba yatshavbo, ni gukhuye dzude khu ga Nungungulu, gu vbwetega a bwelela ga Nungungulu,

⁴ a di khuga khu vbamezatunu, a tshula libhadzi, a sumela tuwayi.

⁵ Khavbo avbo, a di thela mati gyomboni, a phela gu handza migondro vapizane, a va bavbula khu tuwayi a nga bani a sumede.

⁶ Na vbohide ga Simoni Pedro, oyu a di khuye: “Pfhumu! Uwe kamwe gu nyi handza migondro?”

⁷ Jesu a di mu hakha, khuye: “Esi nyi girago khu yeli gu siti nugunugu, u na siti gwadi.”

⁸ Pedro a di engedza gambe, khuye: “Gima khu na nyi handza migondro!” Jesu a di mu hakha, khuye: “Nyamba gu handza khu lumbi tsawa wangu.”

⁹ Simoni Pedro a di khuye: “Pfhumu, u nga nyi handzi migondro basi, aholu, ni mandza ni hungo gambe!”

¹⁰ Jesu a di mu hakha, khuye: “Wule a hambidego, guvbweta gu hamba migondro basi, kholu agide. Enu nenu mu agide, aholu, khandri enu mwatshavbo.”

¹¹ Uye a di gu muti gwadi uye a nga bani a gu vbweta gu mu ningela pima kholu a nga ganelago, khuye: “Khandri mwatshavbo mu agidego.”

¹² Na va handzide migondro, a di ambala libhadzi laye, a khala vbamezatunu, ava wudzisa, khuye: “Mu ngu giti egi nyi ngari gu mi girago, gani?

¹³ Enu mu ngu nyi rana Pfhumu ni Muhevbudzi wanu; khidzo kharato, kholu kheni kamwe.

¹⁴ Mu ngu wona: Nya nga olu eni nyi nga mi handzani migondro, na nyiri Pfhumu ni Muhevbudzi wanu, enu nenu handzanani migondro khu gyanu.

¹⁵ Nyi mi ningideni gihevbudzo, gasi mu gire nenu nya nga idzo nyi nga mi girago.

¹⁶ Khu lisine, nyi ngu mi embelani, kheni: Githumi khandri gikhongolo guvbindra mune waye; kha nga girumwa nigyo, khandri gikhongolo guvbindra oyu gi nga rumwago khuye.

¹⁷ Kha nga olu mu sitigo silo sesi, mu na bani mu kategile mwa gu si landrisa.

¹⁸ “Kha nyi thuli enu mwatshavbo, nyi ngu vati avo nyi va hathidego, aholu nya gu ganela kharati gasi gutadzisega milowo, yi gu, khiyo: ‘Uye nyi hodzago naye mbiya mweyo a nyi wugede.’

¹⁹ Nya gu mi embela na si si dugeleli, gasi sa gu dugelela mu dzegela gu dzitini, kheni mani.

²⁰ Khu lisine, nyi ngu mi embelani, kheni: Oyu a hakhago wule nyi na mu rumelago, kheni a nyi hakhago; uye a nyi hakhago, a ngu hakha wule a nyi rumedego.”

Jesu a ngu tivisa gu ningedwa gwaye khu Judha

²¹ Na ganede esi, Jesu a di swihala monyo, a ganela, khuye: “Khu lisine, nyi ngu mi embelani, kheni: Moyo wanu a na nyi ningela.”

²² Khavbo avbo, vapizane va di khedzisana, va si muti gu thudwa mani.

²³ Moyo nya vapizane, wule a nga bani a godwa khu Jesu, a di ninganide naye vbamezatunu.

²⁴ Simoni Pedro a di mu khweneta a mu lembela, khuye: “Nga mu wudzisa a gu thula mani.”

²⁵ Uye, na hidzimede ga Jesu, a di mu lembela, khuye: “Wa gu thula mani, Pfhumu?”

²⁶ Jesu a di mu hakha, khuye: “Wule nyi na negago gipandre nya gibaba nyi mu ninga.” Na negide gipandre nya gibaba a di gi ningela ga Judha Sikariyoti, mwamana wa Simoni.

²⁷ Oyu, na hodzide gipandre gyogyo, a di beledwa khu Sathane. Khavbo avbo, Jesu a di mu embela, khuye: “Iso u vbwetago gu gira, gira khu guvbiredza, u nga hweli.”

²⁸ Aholu vatshavbo va nga bani varomo vbamezatunu kha va nga dziti a gu thula ginani khu magana yaya,

²⁹ kholu, kha nga olu Judha a nga bani ari muphari nya gikhwama nya dzitsapawu, vambe va di pimisa nya gukhavo Jesu a di mu ruma guya renga iso si nga bani si vbwetega vbabuzotunu, ni gukhavo mwendro a di mu ruma guya ninga zomola sisiwana.

³⁰ Na hakhide gipandre nya gibaba, Judha a di dzegela gu duga. Gudiri wutshigu.

³¹ Na dugide, Jesu a di khuye: “Olu Mwamana wa Muthu dhumisidwe; wudhumo wa Nungungulu wu ngu wonega khavbo gwaye.

³² Wudhumo wa Nungungulu na wu wonega gwaye, Nungungulu nuye a na mu dhumisa; a na mu dhumisa nyamba hwela.

³³ Vanavangu, nyi ngari nanu gikhatinyana gegi. Mu na nyi vbwetani; kha nga nyi nga ganelago ga Vajudha, nyi ngu mi embelani nenu, kheni: Iyo nyi hongolago, enu kha mu dzi kodzi guya.

³⁴ Nayo wuphya nyi mi ningago, khoyu: Haladzanani, kha nga idzo nyi mi haladzidego khidzo, golanani nenu khu gyanu.

³⁵ Khavbo vathu va na dzitigo nya gukhavo mu vapizane vangu, mwa gu golanani khu gyanu.”

Jesu a ngu tivisa gudanga ga Pedro

³⁶ Simoni Pedro a di mu wudzisa, khuye: “Wa guvbweta gu hongola hayi, Pfhumu?” Jesu a di mu hakha, khuye: “Iyo nyi vbwetago guya, khu dzi kodzi gu nyi landra nugunugu; u na nyi landra gwadi.”

³⁷ Pedro a di khuye: “Kha nyi dzi kodzi gu gu landra khu ginani? Eni nyi nafa nago.”

³⁸ Jesu a di khuye: “Ina kamwe uwe u na ningela guvbanya gwago khu kotani yangu! Khu lisine, nyi ngu gu embela, kheni: Kha wu na emba khonge nu si nyi dangi nyondro tharu.