Johane 1 - Bhibhiliya Nya Guage

Lito li dzi giride Muthu

¹ Guhegulani li diromo Lito. Lito li diri ni Nungungulu; gambe Lito li diri Nungungulu.

² Ilo li diromo, guhegulani, ni Nungungulu.

³ Satshavbo silo si vangidwe khu tshivba yaye, gimwalo gi nga vangwa nyambana ilo.

⁴ Ilo li diri ni guvbanya; gambe guvbanya gu diri wenengedzo nya vathu.

⁵ Wenengedzo wu ngu wenengedza gidemani, aholu, gidema kha gya wu kodza gu wu tshima.

⁶ A di dugelela muthu nya gukari a nga rumedwago khu Nungungulu, lina laye a diri Johane.

⁷ A dita kha nga fakazi, gasi gu fakazela Wenengedzo, gufela gu vatshavbo vakhodwe khu kotani yaye.

⁸ Uye a di siri wenengedzo, aholu, dzude gasi guta fakazela wenengedzo.

⁹ Lito li diri wenengedzo nya lisine, wu ngatago mafuni gasi guta wenengedza muthu watshavbo.

¹⁰ Li diromo tigoni, litigo li vangidwe khu tshivba yaye aholu litigo kha la li pima.

¹¹ Li dita ga avo va nga bani vari vaye, aholu, avo kha va li hakha.

¹² Gasi vale vatshavbo va nga li hakhago, va khodwago ga ilo, li di va ninga fanelo nya gukhale sanana sa Nungungulu;

¹³ sivangwa sesi kha sa velegwa khu tshivba nya novba mwendro, khu tumbunugo nya muthu, mwendro khu gu haladza nya muthu, aholu si velegidwe khu gugola ga Nungungulu.

¹⁴ Lito li di dzi gira muthu, li gu vbanya vbakari gwathu. Ethu hi wonide gidhumo gyaye, gidhumo li nga ningwago khu Babe waye, kha nga Mwamana wa moyo nya gutale khu wuhigo ni lisine.

Wufakazi wa Johane Mubhapatisi

¹⁵ Johane a di mu fakazela, a gu ganela, khuye: “Khuye oyu nyi nga mu thula, kheni: Uye atago khu hwane gwangu a nyi thangede, kholu a di romo na nyi si velegwi.”

¹⁶ Khu gutadzisega gwaye khu wuhigo, khavbo hi kodzago ethu hatshavbo, gu hakha nethu khavbo gwaye talo nya wuhigo watshavbo.

¹⁷ Kholu, Nayo wu vegidwe khu Mosi, gasi wuhigo ni lisine, hi si hakhide khu tshivba ya Jesu Kristo.

¹⁸ Mwalo muthu a wonidego Nungungulu. Mwanaye wa moyo a gu Nungungulu, a guromo monyoni ga Babe, khuye a nga hi tulela gu muti.

Johane Mubhapatisi a nguya mbeli ni wufakazi waye

¹⁹ Khuwo owu wufakazi wu nga girwago khu Johane, gikhati Vajudha va nga rumelago khu Jerusalema vaphasi nya mhamba ni Valevhi, gasi guya mu wudzisa, khavo: “Khuwe mani, uwe?”

²⁰ Uye, a di va hakha nyamba kanakana, khuye: “Eni khandreni Kristo.”

²¹ Va di mu wudzisa nyaluphye, khavo: “Gasi khuwe mani? Khuwe Eliya, gani?” A di va hakha, khuye: “Khandreni.” Va di mu wudzisa gambe, khavo: “Khuwe muprofeti?” A di va hakha, khuye: “Ahihi.”

²² Khavbo avbo, va di khavo: “Gasi khuwe mani, na? Hi kodze guya ninga phindrulo ga avo va nga hi rumelago. Uwe wabune wari khuwe mani?”

²³ A di hakha, khuye: “Eni nyi lito li huwelelago giwulani, khilo: ‘Lulamisani dzindzila dza Pfhumu, kha nga guganela ga muprofeti Isaya.’ ”

²⁴ Vambe nya avo va rumedwego va diri Vafarisi,

²⁵ va di mu wudzisa, khavo: “Khu ginani u bhapatisago, gasi khandruwe Kristo, mwendro Eliya mwendro muprofeti?”

²⁶ Johane a di hakha, khuye: “Eni nya gu bhapatisa khu mati, gasi vbakari gwanu womo oyu mu si mutigo,

²⁷ a gu uye atago khu hwane gwangu; eni nyi mwalo fanelo nya gutshule dzingodzi nya silato saye.”

²⁸ Silo sesi si giregide, Bhetaniya, khisikheyi nya tsongo wa Joridhani, avbo Johane a nga bani a gu bhapatisa avbo.

²⁹ Gandra ni dzimindru, Johane a di wona Jesu, a nga bani a gu mu tela a ganela, khuye: “Kha mu yi woni yile Nvutana ya Nungungulu yi dusago gighoho nya litigo.”

³⁰ Khuye nyi nga mu thula, kheni: “Hwane gwangu a nata uye a nyi thangedego, kholu a di romo eni na nyi si gu velegwi.

³¹ Nyi di si muti; eni nyi dzude nyita bhapatisa khu mati gasi uye a tidwe khu va na Israyeli.”

³² Johane a di fakaza, khuye: “Nyi wonide Liphuvbo nya Guage na li gu tshiga khu Ndzadzini lita mbaka vbatshani gwaye kha nga lituva.

³³ Nyi di si muti, aholu, uye a nga nyi ruma gu bhapatisa khu mati khuye a nga nyi embela, khuye: ‘Uye uno mu wonago na gu tshigedwa khu Liphuvbo, lita khala gwaye, khuye a bhapatisago khu Liphuvbo nya Guage.’

³⁴ Nyi si wone khu maho yangu; nyi ngu fakaza nya gukheni uye Mwamana wa Nungungulu.”

Vapizane nya guphele

³⁵ Gandra ni dzimindru, Johane a di romo nyaluphye vbale ni vavili nya vapizane vaye.

³⁶ Na khuside maho a khedza Jesu a nga bani a guvbindra, a di khuye: “Kha mu yi woni yile Nvutana ya Nungungulu.”

³⁷ Na va pwide magana yaya, vapizane va vavili va di landra Jesu.

³⁸ Jesu, a di thendregedza a wona nya gukhuye va gu mu landra, a di khuye: “Mwa guvbweta ginani?” Va di hakha, khavo: “Rabi, (gutshamusago gupwani: Muhevbudzi) wa gu khala hayi?”

³⁹ A di va hakha, khuye: “Deluni muta gu wona.” Va di hongola vaya wona avba a nga bani a gu vbanyela avbo, va gu khala naye litshigu lolo. A diri silambo gikhati nya wu na.

⁴⁰ Andreya ndruye wa Simoni Pedro, a diri moyo nya vapizane vale va vavili va nga pwago magana ya Johane va gu landra Jesu.

⁴¹ Uye, guphela, a di mana ndriyaye Simoni, a gu mu embela, khuye: “Hi manide Mesiya, gutshamusago pwani Kristo.”

⁴² A di mu dzega aya naye ga Jesu. Jesu, na khuside maho a mu khedza, a di mu embela, khuye: “Uwe khuwe Simoni, mwamana wa Johane, u na ranwa pwani khuwe Khefasi” gutshamusago pwani: Giwindri.

Guranwa ga Filipi ni Natanayeli

⁴³ Khu limbe litshigu, Jesu a di dundruga guhongola Galileya. Na mane Filipi, a di mu embela, khuye: “Nyi landre!”

⁴⁴ Filipi a diri wa Bhetisayidha, tigoni ga Andreya ni Pedro.

⁴⁵ Filipi a di mana Natanayeli a mu embela, khuye: “Hi ngari gu mu mana wule a nga thudwago khu Mosi nayoni waye, a nga ganedwa khu vaprofeti; khu Jesu wa Nazareta, mwamana wa Josefe.”

⁴⁶ Natanayeli a di khuye: “Ina gu ngu dzi kodza gu duga gilo nya gyadi khu Nazareta?” Filipi a di khuye: “Delu uta wona.”

⁴⁷ Jesu, na wonide Natanayeli na gu hidzimela, a di khuye: “Oyu khuye a gu wa na Israyeli nya guvbelele, gwaye wu mwalo wukanganyisi.”

⁴⁸ Natanayeli a di wudzisa, khuye: “Wa gu nyi tela hayi?” Jesu a di hakha, khuye: “Na wu si gu ranwi khu Filipi, eni nyi gu wone nuri mutsani nya nguyu.”

⁴⁹ Natanayeli a di mu hakha, khuye: “Rabi! Uwe u Mwamana wa Nungungulu; u Pfhumu ya na Israyeli.”

⁵⁰ Jesu a di khuye: “Kha nga u khodwego khu magana nyi gu embedego nya gukheni: Nyi gu wone mutsani nya nguyu, u na wona silo nya sikhongolo nya guvbindre esi.”

⁵¹ A di tadzisa, khuye: “Khu lisine, nyi ngu mi embelani, kheni: Mu na wona Ndzadzini na gu tudwe; dzingilozi dza Nungungulu na dzi gu lita ni gutshiga ga Mwamana wa Muthu.”