Joba 8 - Bhibhiliya Nya Guage

Magana ya Bhilidhadhi

¹ Khavbo avbo, Bhilidhadhi, Musuwa, a di hakha, khuye:

² “Gu na kala lini nu nga gu ganela kharato? Malito ma dugago khu kanani gwago ma fananago ni phuvbo nya gingulu?

³ Ina Nungungulu a ngu dzi kodza gu vbindrugedza lisine, gani? Nyadzitshivbe, a ngu kodza gu hambana ni gululama, gani?

⁴ Avbo sanana saye si nga mu ghohelago, Uye nuye a va dzudzugide, khu wuvivbi nya sighoho sawe.

⁵ Aholu uwe, wa gu vbweta Nungungulu u lombelela ga Uye nya Tshivba Yatshavbo u mu lomba wuhindzi,

⁶ wa gu bani uri muthu nya gululame ni lisine, Uye kha na hwela gu gu hakha a gu dwanela, a na wusedza gululama nya ndranga yago.

⁷ Iso u nga bani uri naso khu gale, si na vbindrwa khiso si nga gutago khu matshigu ya mbeli.

⁸ Wudzisa va gale, u alakanya iso si hevbudwego khu vababe vago,

⁹ kholu ethu hi velegidwego matshigu yaya, kha hi pimi gilo. Kholu guvbanya gwathu gwa mafuni momu, gwa gu fanana ni mutsa wu vbindrago.

¹⁰ Ina avo kha va na gu hevbudza ni gu gu embeledzela satshavbo va sitigo khu monyoni gwawe, gani?

¹¹ Ina ngonva wu ngu dzi kodza gu dandra umo nyambana maraga, gani? Mwendro tshava yi ngu buga umo nyambana mati, gani?

¹² Si di hadza gu gubanga guvbindra mambe mahagane, si kudwa na si si gu rumbugi

¹³ Khidzo kharati dzindzila dza vatshavbo vale va si khathaligo khu Nungungulu; gya gufa kharati gitumbo gya va nya guvivbedwa khu monyo.

¹⁴ Gitumbo gyawe gya gu vbiredza guvbindra, ni giseketelo gyawe gya gu fanana ni wupe nya gitoli.

¹⁵ A di khighela vbandzaritunu nya nyumba yaye, aholu iyo kha ya nga ema, a yi pharedzela, aholu iyo kha ya nga ema yi tiya.

¹⁶ Uye simbo wu gu ni mahagane ma nyugago nyamba thava lihani, matamo yaye ma gu thaphela ma enedza lithembwe latshavbo;

¹⁷ Mikhamba yaye ya gu nava talani nya siwindri, yi thaphela kala musiwindrini.

¹⁸ Aholu Nungungulu a gu mu dusa wulanga waye, uye a na bomba, a ganela, khuye: Nyi si gu gu woni.

¹⁹ Ogu khu gutsaka nya ndzila yawe, khu mafuni yi na buga yimbe misimbo.

²⁰ Kholu Nungungulu kha dzudzugi muthu nya gululame, ambari gutiyisa mandza ya vathu nya guvivbedwe khu monyo.

²¹ Aholu avbo gwago Uye a na tadza monyo wago khu gutsaka, ni kanani gwago gu na womba mikulungwane.

²² Valala vago va na ambagiswa dzitshoni, ni mitshatsha ya va nya guvivbedwa khu monyo, yi na fuviswa.”