Joba 6 - Bhibhiliya Nya Guage

Joba a ngu phindrula Elifazi

¹ Khavbo avbo, Joba a di phindrula a ganela, khuye:

² “Oh, naripwani wuvi wangu gumogo ni sigaradzo sangu, sa gu vegwa vbagikalotunu si pimwa!

³ Mu di hadza gu wona gukhenu gulemela nya pimo waye gukhongolo guvbindra mafu nya fungu! Khu guralo, nyi khade muthu nya guvbiredzele gu ganela.

⁴ Kholu nyi payidwe khu sighalala sa mune nya Tshivba Yatshavbo, wuhungu wawe wu ngu phalalega ni mili wangu watshavbo. Nungungulu somide gu nyi thusedzela.

⁵ Ina buru nya likhabi yi ngu emba ya gu bani yiri ni mwasi nya matenvura, gani? Mwendro mombe yi ngu bhonga na yi gu hodza mwasi, gani?

⁶ Ina guhodza nya lidume gu ngu tshamba, gani? Mwendro gutshamba muni gu manegago ga gipandre nya guage nya litandra?

⁷ Iso si nga bani si nyenywa khu hefemulo wangu, khugo guhodza gogu gu swihadzago monyo wangu.

⁸ Nari pwani Nungungulu a ngu yingisa nombelo wangu, a nyi girela iso nyi si lirelago!

⁹ Nari pwani Nungungulu si ngu mu nengedzisa a nyi pfara, a thawuludza mandza yaye a nyi vbedzisa!

¹⁰ Nyi di hadza gu mana gu tangala, nyi ndraga khu gutsaka sigaradzoni momu gwangu, kholu kha nya kanyisa magana ya oyu a Agidego Ngudzu.

¹¹ Gitumbo muni nyi gu nagyo olu nyi gu mwalo tshivba? Ga gu phasa ginani guvbanya, matshigu yangu nya gufe na ma vbohide?

¹² Ina tshivba yangu ya gu fanana ni tshivba nya giwindri, gani? Mwendro nyama yangu ya gu fanana ni sugu, gani?

¹³ Olu yi mwalo gambe ndzila nya gu nyi vbulugise; kholu giphaso gi dusidwe mbeli gwangu.

¹⁴ Uye a vbisegago, guvbweta a lulekwa khu dzipari dzaye, ambari na digide gu ninga githawo Nungungulu nya Tshivba Yatshavbo.

¹⁵ Vandriyangu va nyi kanganyiside, va fanana ni mati nya tsongo ma gogago kovani.

¹⁶ Ma gogago na ma sivbade khu kotani nya girame, thondrwane ya guya thegela umo;

¹⁷ aholu la gu khondra lihani, ma gutsagatela, ma gu bangisa muphelo.

¹⁸ Vavbindri nya ndzila va gu ndreya, vaya bela giwulani va yafa.

¹⁹ Vavbindri va Temani, va di gu zama gutugula mati yaya, ni vaendri va Sebha va di ya ma vbweta.

²⁰ Va na khale dzitshoni mugitumboni gwawe; kholu, va guya vboha kha va ma mani.

²¹ Kharato gambe ga enu vambe kha mu phasi gilo avbo gwangu, kholu, mu di tsaka khu gutshaniseka gwangu, bwelo khavbo mu samala.

²² Ina nyi di nga mi lomba gilo nyo kari, gani? Mwendro gukheni: Nyi vbunguleleni thomba yanu, gani?

²³ Mwendro gukheni nyi vbulugiseni mandzani ga nala wangu? Mwendro gukheni: Nyi dzegiseni mandzani ga uye nya guvivbedwe khu monyo, gani?

²⁴ Nyi hevbudzeni, gasi nyi degule; nyi yeyedzeni iso nyi ghohidego.

²⁵ Idzo ma payago khidzo magana nya gululame! Gasi magana yanu ma gu laya mani?

²⁶ Mwa gu pimisa gu ganedza magana yangu, gani? Mwa gu wona kha nga liphuvbo magana ya muthu a vbisegago, gani?

²⁷ Ina enu mu ngu kodzani gu rengisa gisiwana khu gu gira nyatumbatumbane, gani?

²⁸ Gasi olu, nya gu mi lomba mu nyi khedzani gwadi khu wuhindzi, ina kamwe nya gu lipha mbeli gwanu, gani?

²⁹ Pheledzani gu nyi lamula, mu nga nyi hoseli; kholu nyi mwalo nandru nyi nga tiyide gululamani.

³⁰ Ina nyi na ni nandru khu gu ganela, gani? Ina likana langu kha li kodzi gupwa silo nya guvivbe, gani?”