Joba 41 - Bhibhiliya Nya Guage

¹ Uye a yi khuthago, khuye a na dwana nayo a yi pala, a gu dzi pemba; ni uye a yi wonago basi a gu vbela tshivba.

² Mwalo muthu a yi tiyelago gu yi khutha, aholu, khu mani wule a kodzago gu dzi khusedza mbeli gwangu?

³ Khu mani a phedego khuye a nyi ninga gilogyo, gasi nyi kodza neni gu mu bweledzela? Kholu satshavbo si guromo vbavbatshi nya lidambo, sa gu lumba Eni.

⁴ Kha nyi na diga gu ganela khu mahungu nya sivbango saye, ambari khu tshivba yaye, ni wumburi nya makhalelo yaye.

⁵ Khu mani a kodzago gu yi tshula lidowo; mwendro gu yi hamisa likana?

⁶ Khu mani uye a kodzago gu yi tula likana, olu magwaha yaye ma thisago, na?

⁷ Magwaru yaye khayo wumburi waye, ma namarelanide ma tiya nga khwatshi ma di lemwa;

⁸ ligwaru ni ligwaru li namarede ga likwawe, nya gu gumba kodza guvbindra ni phuvbo khu vbakari.

⁹ Ma patane limwedo ni limwedo vbatshani ga likwawe, avbo ma si dzi kodzigo gutsapuruga.

¹⁰ Ya gu watshimula, gu duga dzitshahe nya gungangamele, maho yaye nga Wuronga nya guge.

¹¹ Khu kanani gwaye, gu duga malavbelavbe, gu piriga ni dzitshahe nya nilo.

¹² Khu dzithonvuni gwaye, gu tuviga wutshi, nya gukhwatshi khali yi vilago, mwendro dzitshava dzi khondrago.

¹³ Ya gu hefemula, ya gu khondrisa magala; khu kanani gwaye, gu duga malavbelavbe.

¹⁴ Tshivba yaye yomo thamoni gwaye, ni wevbini a yi wonago a gu tedwa khu hwanga.

¹⁵ Misivba nya nyama yaye yi patane gumogo, yi namarelane kha yi gimbiligimbili.

¹⁶ Monyo waye wu tiyide nga giwindri, gu tiya gwaye, kha nga libwe nya gutshindre.

¹⁷ Ya gu khuga yi ema gwa gu ndrendremela dzindrena, va pilega hwambo, va thava gusasedwa khiyo.

¹⁸ Ambari wa gu yi paya khu litshari iyo kha yipwi gilo, ambari khu wulaho mwendro khu sighalala.

¹⁹ Iyo ya gu wona simbi kha nga mwasi, sugu, yi wu wona nga simbo nya guhine.

²⁰ Iyo kha yi tutumiswi khu gighalala; ni siwindri nya fijiga, ya gu si wona nga mafu.

²¹ Sighomba ya gu si wona nga dzitshava, ya gu hegiswa khu gupwa wungelengendze nya matshari.

²² Vbavbatshi nya girumbu gyaye, momo magwaru nya guvbire; ya gu khwirira maragani, kha nga gilo nya guvbule.

²³ Ya gu vhilusa mitsongo gukhwatshi khali yi vilago, yi gira linene gukhwatshi khali nya mafura.

²⁴ Avbo yi vbindrago khavbo gu tshala tseneno nya gungangamele, ni mati nya linene ma aga nga dzinvi nya gikhosane.

²⁵ Mafuni gimwalo gilo gi fananago naye, kholu yi giridwe gasi yi si khali hwanga,

²⁶ Ya gu khedza yi yeyisa satshavbo si khusegidego, iyo pfhumu nya sirengo satshavbo nya wurena.”