Joba 40 - Bhibhiliya Nya Guage

¹ Pfhumu Nungungulu a di engedza a embela Joba, khuye:

² “Ina uye a dwanago ni mune nya Tshivba Yatshavbo a ngu kodza gu mu hevbudza, gani? Wule a ningago nandru Nungungulu a na mu ninge phindrulo!

Phindrulo nya guhegule ya Joba ga Nungungulu

³ Khu guralo, Joba a di phindrula Pfhumu Nungungulu, khuye:

⁴ Pfhumu, olu nyi gu gilo nyamba phasa gilo avbo gwago, nyi na phindrula kheni ginani, nyi na vega mandza vbalikanatunu gwangu.

⁵ Nyi ganede gumogo, kha nyi na engedza gambe mwendro guvili, kha nyi na ganela gambe.

Phindrulo nya guhegisa ya Nungungulu ga Joba

⁶ Pfhumu Nungungulu a di ninga phindrulo Joba nari khu vbakari nya gipupwane, khuye:

⁷ Dzi hunge u dzi phara khu nga mwama, nyi na gu gira siwudziso, aholu uwe u na nyi ninga phindrulo.

⁸ Ina u na futa gululama gwangu, u nyi kona, gani? Gasi u kodza gu dzi handza, gani?

⁹ U na ni tshivba yi fananago ni ya Nungungulu, gani? Lito lago li ngu kodza gu zindza gu fanana ni lito laye, gani?

¹⁰ Dzi ambagise khu wugulu ni wudhumo, u ambala gungangamela ni wuzundzo.

¹¹ U guhula giviti nya likhulo lago, u khedza vatshavbo va dzi khusedzago, u va vbwasamisa.

¹² Khedza vatshavbo va dzi gugumugisago U va thesa vbavbatshi, U gandredzela sighohi satshavbo malangani gwawe.

¹³ Vatshavbo va futele khu mafu, dzikhovbe dzawe dzi na fenengedzwe khu gidema.

¹⁴ Khavbo avbo, eni neni nyi na gu embeledzela gukheni mandza yago ya nyamudye ma gu tshudziside.

¹⁵ Nga khedza nvuwu nyi yi vangidego kha nga idzo nyi vangidego khidzo uwe, iyo ya gu hodza mwasi kha nga mombe.

¹⁶ Tshivba yi gu nayo longoni gwaye! Tshivba yaye, ya gu duga khu misivbani ya rumbuni gwaye.

¹⁷ Ngila waye wu tiyide kha nga simbo nya simbiri; ni misivba nya sikongolo saye yi molanide.

¹⁸ Marambo yaye ma gu fanana ni misengele nya sugu, ni sivbango saye gukhwatshi madingo nya dzisimbi.

¹⁹ Iyo khiyo mithumo nya guphele nya sigiro sa Nungungulu. Khu guralo, Muvangi waye a ngu dzi kodza gu vboha vbafuvbi gwaye nari ni litshari.

²⁰ Sigomo sa gu yi ninga mwasi watshavbo wu bugago umo, umo sirengo satshavbo nya likhabi si haganago umo.

²¹ Ya gu lala mitsani nya misimbo, yi sihala dzitshavani vbafuvbi ni maraga.

²² Misimbo ya gu yi fenengedza khu mitsa yaye yi fenengedzwa khu mwasi nya matsongo.

²³ Ambari tsongo wa gu gugumuga wu tala, kha yi thavi gilo; ambari tsongo wa Joridhani wa gu gugumuga kala dzithonvuni gwaye, iyo kha yi khathali.

²⁴ Khu mani a tiyelago gu ema mbeli gwaye a yi mola, gasi gu yi thela khalo thonvuni?

Guganela khu mahungu nya ngona

²⁵ Ina u na kodza gu mola ngona khu gilowo, bwelo khavbo u yi hunga lidimi laye khu ngodzi, gani?

²⁶ Ina u ngu kodza gu thela ngodzi thonvuni gwaye, mwendro gu yi pola gigundru gyaye u thela lisindra, gani?

²⁷ Ina, yi nga lila avbo gwago yi lomba gu divaledwa, mwendro gu ganela nago khu magana nya guvbevbuge, gani?

²⁸ Ina, yi nga gira nago gidzumeledzwano, gasi yi gu thumela kala gupindruga, gani?

²⁹ Ina, u ngu kodza guhagana nayo, kha nga ginyoni, mwendro gu yi hungelela gasi yi tsakisa sanana sago nya sagadzyana, gani?

³⁰ Ina, vathu va na gira bhindzu khiyo, va kabanisela va nya wugwewo, gani?

³¹ Ina, u nga khodza gu fenengedza lidowo laye khu silowo, mwendro gu tadza hungo waye khu silowo sa vatshevi, gani?

³² Nga linga gu handzega mandza yago vbatshani gwaye, u dwana naye, u na dzi laya u si engedzi gambe.