Joba 39 - Bhibhiliya Nya Guage

¹ Ina u ngu giti gikhati dzi velegago dziyisya; ahati mwendro u wonide vamangulu na va gu velega?

² U ngu dzi kodza gu saya migima si vbedzago nasiri ni dzimimba ambari guti litshigu si velegago, gani?

³ Sa gu khidzima gasi si kodza gu velega si vbedza kharato guvbisa nya gulumwe gwaso.

⁴ Sanana sawe sa gu dandra khabini na siri ni tshivba, si hegisa khu gu hambana ni vamayi vawe nyamba wuya gambe.

⁵ Khu mani a tshudzisidego dziburu nya likhabi, khu mani a tshudego dzingodzi dzawe?

⁶ Eni nyi dzi ningide giwula gu khala gaya gwawe, ni kovani nya munyu gasi dzi vbaha umo.

⁷ Dza gu hega khu gupwa nyenganyenga nya lidhoropa, kha dzi khathali khu lito la mugimbidzisi.

⁸ Dza gu legalega sigomoni, dzi vbweta wuhaviselo gasi gu mana mwasi nya gunyuge.

⁹ Wa gu alakanya gukhuwe nyari yi nga dzumela gu gu thumela, ambari guta khala phandroni gwago, gani?

¹⁰ Ina u ngu kodza gu hunga nyari yi ndrindra liphadza, yi gulandra khu hwane yi lima mikovani, gani?

¹¹ U na yi tumba khu kotani nya tshivba yaye nya yikhongolo, gasi yi gu limela mahange u ma vbwetago, gani?

¹² U ngu tumba gukhuwe iyo yi na gu wuyisela dzimbewu u na dusago khu mahangeni gwago yi ta dzi guhula musithalani gwago, gani?

¹³ Mbowa ya gu thawuludza mambapi yi vbuvba na yi tsakide, gukhwatshi mambapi nya lighama yi gu nawo.

¹⁴ Ya gu velega mandra vbavbatshi, ma fundramedwa mafuni khu lihani,

¹⁵ na yi si alakanyi gukhilo vathu va na ma gandra ma pandrega, ambari gu gandrwa khu sirengo nya likhabi.

¹⁶ Ya gu tshanisa sanana saye, gukhwatshi khandriyo yi nga si velega, yi si khathali khu gu luza thumo yi wu giridego,

¹⁷ Kholu Nungungulu a yi segede guti, ambari gu yi ninga mapimo.

¹⁸ Aholu, ya gu khuga yi ema gasi yi tutuma, ya gu hega kavalu ni mukhileli waye.

¹⁹ U ngu kodza gu ninga tshivba kavalu, mwendro gu yi ambagisa ngoloni gwaye khu mawoya nya wumburi, gani?

²⁰ U ngu kodza gundragandraga kha nga mbera, gani? Yi thurugisago vathu khu ligwaha nya maembelo yaye, gani?

²¹ Ya gu phandraphandra khu gigaha, yi yeyedza tshivba yaye khu matshandza, yi khuga yi khinga sikwata nya dzinyimbi.

²² Ya gu hega khu hwanga, gambe kha yi thavi gilo; ambari gu bwelela hwane khu gu thava matshari.

²³ Dzibambe gwaye, gupwala gudzuma nya sighalala, ni gukhedziga nya matshari.

²⁴ Ya gu phandraphandra mafuni khu gigaha, yisi emi khu guwombwa nya pundru.

²⁵ Avbo yi pwago guwombwa nya pundru, ya gu ganela, khiyo: Hongoleni mbeli! Na yi ngari hwindzo ya gupwa mahema nya nyimbi ni gupwa malito ya vathangeli nya nyimbi.

²⁶ Ina givaga gya gu vbuvba khu wugengeli wago, gi thawuludza mambapi gi khedza Marandzi, gani?

²⁷ Mwendro khuwe u rumago lighama gu vbuvba liya vbatshani, li ya vbaha iyo gihaga gyaye, gani?

²⁸ La gu dzi vbahela wulanga musiwindrini, li sihala mudziphagoni gakone.

²⁹ Khu vbatshani yoyo, la gu khedzisela li tugula guhodza; maho yaye ma gu wona khu hwindzo.

³⁰ Sifondro saye sa gu mama novba, ni evbini gu manegago sirumbi, ilo kha li hamugegi.”