Joba 38 - Bhibhiliya Nya Guage

Nungungulu a ngu ninga phindrulo Joba

¹ Khavbo avbo, Pfhumu Nungungulu a di phindrula Joba, nari khu ndrani nya gipupwane, khuye:

² “Khuwe mani uwe u ghohago makungo yangu khu magana ma si phasigu gilo?

³ Olu dzi hunge giwunu gyago u tiya nga mwama, kholu nya gu hadza gu gu wudzisa, uwe, u nyi ninga phindrulo.

⁴ U diri hayi uwe gikhati nyi nga wumba litigo? Nyi tshamusele, wa gu bani na wuri ni guti.

⁵ Khu mani a vegidego mivbingano nya mipimo yaye, mwendro sago u ngu muti! Uye a ladzidego dzingodzi nya pimo waye?

⁶ Khokhweni yakone, khu mani a kembidego, mwendro uye a vegidego madingo yaye,

⁷ avbo dzithandra nya gugye dzi nga embelelago gumogo, ni sanana sa Nungungulu si nga bani si gu womba mikulungwane.

⁸ Khu mani a nga bhiyago linene khu sigomo, gikhati li nga phusuga gukhwatshi la gu duga khu ndrani ga mayi waye.

⁹ Gikhati nyi nga li girela dzingandzu khu mapfhi, nyi li fenengedza khu gidema,

¹⁰ nyi li vegede vbingano, nyi li sega khu malimba ni sikwinyaro nya dzisimbi,

¹¹ avbo nyi nga li embela gukheni: U na hegisa khavba, khu na vbindra gambe uya mbeli, mavimbi yago nya wurena ma nata vbela avba?

¹² Ina gukhugela u velegwa, u di nga ruma gugya mwendro gu yeyedza Wuronga wuti wulanga wawe,

¹³ gasi si kodza gu phara dzitshokani nya litigo, va nya guvivbedwa khu monyo va si mani wulanga nya gukhale umo, gani?

¹⁴ Mafu ma vbindrugedza ma khala kha nga libumba vbavbatshi nya gifungo, satshavbo si wonega kha nga myendra;

¹⁵ gu ndreyiswa guwonegela gwa va nya guvivbedwa khu myonyo, ma fanywa mawogo yawe nya gulaphe.

¹⁶ Ina u di nga bela sifefeni sa linene mwendro gu relela guetani nya mati, gani?

¹⁷ Ina u di nga tuledwa malimba nya vafi mwendro saye gu wona malimba nya gidema nya guthise, gani?

¹⁸ U ngu guti gwadi guanama nya litigo, gani? Wa gu bani u guti, nyi embele.

¹⁹ Khu yevbini ndzila yiyago wulangani nya guwonegele? Ahati gidema khu wevbini wulanga waye?

²⁰ U ngu kodza gu dzi yisa wulangani wawe, gani? Gasi u dziti dzindzila dzi yago ndrangani gwawe, gani?

²¹ Uwe u ngu dziti, kholu u di gu velegidwe gale, ni tengo nya matshigu yago nya guvelegwe mangi!

²² Ina u di nga bela umo yi dugelago umo thondrwane mwendro gu wona madhamu nya maralala,

²³ nyi si vegedzago gasi si lirela litshigu nya gupwe wuvi, kala litshigu nya litunga ni nyimbi, gani?

²⁴ Khu yevbini ndzila yi vbohago avbo gu dugelago gulasa ni avbo yi phalalegelago avbo phuvbo ya Khugadambo yi furugedza tigoni?

²⁵ Khu mani a tuledego misele nya dzindrambi, ni gu tula ndzila nya gulase nya mabara;

²⁶ gasi guwa ndzadzi tigoni, umo gu si khaligo muthu, ni mugiwulani gu si manegigo muthu;

²⁷ gasi gu thela thomwa mafu nya gihala ni giwula, ni gu nyugisa mwasi wu rumbuga.

²⁸ Ina ndzadzi yi na ni babe, gani? Mwendro khu mani a velegago madododo nya hunguva?

²⁹ Gasi gudzidzila gwa gu dugela rumbuni ga mani? Khu mani a girago girame gi tago khu vbatshani,

³⁰ avbo mati ma bangago ma fanana ni giwindri gu banga ni guetani nya mati?

³¹ Mwendro u ngu dzi kodza gu hunga sitsatsa nya livbandre na dzimbili dzinyeledzi mwendro gutshula sipfhundro sa Khugadambo?

³² Mwendro gu kodza gu dusa siwoniso sa damboni gumogo ni dzinango dzaye mwendro gu gimbidzisa giwumbelo gya ndzadzini, ni sanana saye, gani?

³³ U ngu yiti milayo ya ndzadzini, mwendro gu yi kodza gu yi thumisa mafuni momu, gani?

³⁴ Ina u ngu dzi kodza gu khusa lito kala mapfhini, u rumele yiwa ndzadzi nya yingi, gasi u fenengedzwa khu ndrambi nya mati, gani?

³⁵ Mwendro u ngu kodza gu embela mabara ma duga, ma ganela khayo: Hi womo avba, gani?

³⁶ Khu mani a thedego guti ndrani nya monyo ni wugengeli mapimoni?

³⁷ Khu mani a gu ni guti nya gu sayele mapfhi, ni gu vbaladza milamba nya mati ya ndzadzini;

³⁸ gasi mafu ma vhuvega ma khala libumba, ni sikidinga saye si guledzedwa.

³⁹ Ina u ngu dzi kodza gu vbwetela pfimba nghala, mwendro gu hodzisa sanana saye si khura,

⁴⁰ sa gu bani si lade mavbalani gwawe; mwendro na dzi sihade dziphagoni, gani?

⁴¹ Khu mani a dongiselago guhodza vamahigonganye, gikhati sifondro sawe si lilago ga Nungungulu, na si gulegalega khu gu hamuga guhodza, gani?