Joba 37 - Bhibhiliya Nya Guage

Gu ninga githawo wugulu wa Nungungulu

¹ Khu kotani nya isoso, monyo wangu wa gu ndrendremela wu ndraga khu wulangani gwaye.

² Yingisani libara la Nungungulu, ni guzindza gu dugago khu kanani gwaye.

³ Uye a gu rinya gulasa gwaye khu vbavbatshi nya ndrengelenge wa ndzadzini, a gu ruma kala mahegiso nya litigo.

⁴ Khu hwane nya esi, gu pwala gudzuma nya guzindze gwaye nya guthise. Lito laye la gu zindza, mwalo a li himbedzelago.

⁵ Nungungulu a gu zindza khu lito nya gusamadzise, a gira siliwugiso nya singi hi si kodzigo gu si pima.

⁶ Kholu a ngu embela thondrwane, khuye: Thega mafuni; ni ndzadzi a yi rumela, khuye: “Vbalaga khu tshivba.

⁷ A gu mola mawogo nya vathu vatshavbo, gasi vathu vatshavbo vati mithumo yaye.

⁸ Sirengo nya wurena, si ya bela niso mavbalani gwawe, si sihala dziphagoni.

⁹ Liphuvbo nya gingulu la guta khu Marandzi, khu Wuronga gu nata gudzidzila.

¹⁰ Khu furugedzo wa Nungungulu, gu gira maralala, mati ma banga kha nga siwindri.

¹¹ A ngu rwega gambe mapfhi khu ndzadzi, a ma phalalegisa khu mabara.

¹² A ngu ma gira ma gimbila gimbila, ma dzundrulugela khu vbatshani nya litigo latshavbo, gasi ma gira satshavbo a si vbwetago.

¹³ Uye a gu resa mapfhi, a gu dzina guta tsayisa vathu, a gu dzina a ta nonisa litigo laye, mwendro gu resa makategwa ga vathu vaye.

¹⁴ Joba, yingisa esi; ema u pimisa khu mithumo nya gusamadzise ya Nungungulu.

¹⁵ Ina, u ngu dziti idzo Nungungulu a gimbidzisago khidzo mapfhi ni gu thela wenengedzo mabara, gani?

¹⁶ Ina u ngu mati makhalelo nya mapfhi, sisamadziso sa wule a vbeledego khu guti, gani?

¹⁷ U ngu giti ginani gi vbisisago dzingandzu dzago, gikhati ma manegago malenga tigoni khu kotani nya phuvbo nya siga, gani?

¹⁸ Ina uwe nuwe u ngu kodza gu gira nga Uye, u ghwimba damboni u gu tiyisa gu khala kha nga libona nya sugu wu nyiviligisidwego, gani?

¹⁹ Olu hi phase, u hi embela iso hi yelago gu mu embela; kholu gimwalo hi gi kodzago gu gira gwadi, khu kotani nya gidema gi hi fenengedzidego.

²⁰ Womo a gu pwadzedego magana yangu, gani? Ina womo a dogorelago gumbembiswa, gani?

²¹ Olu vathu kha va na nga wona gambe lidambo li ngangamelago vbakari nya mapfhi, aholu ya guta phuvbo, ya guta vbiyela mapfhi yatshavbo.

²² Khu rongatunu gu nata gulasa nya gukhedzige nga ndralama, kholu Nungungulu randredwe khu wudhumo nya guthavisege.

²³ Mwalo uye a kodzago gu hidzimela ga Uye a gu na ni Tshivba Yatshavbo, Uye khongolo a na ni tshivba tade khu gululama, gima kha tshanisi muthu.

²⁴ Khidzo kharato, vathu va mu ningago githawo, gambe kha khathali khu vale va dzipwago na va gengede.”