Joba 33 - Bhibhiliya Nya Guage

Eliyu a ngu kawuka Joba

¹ Gasi olu uwe Joba, yingisa magana yangu, demba ndzeve upwa satshavbo nyi vbwetago gu gu embela.

² Wona nya gukhuwe olu nyi tude likana langu; magana yangu momo tshokhani nya lidimi langu.

³ Magana yangu khya lisine li tiyidego, ni gutumbega nya monyo wangu, sigundru sangu sa gu ganela khu guti nya gutumbege.

⁴ Kholu Liphuvbo la Nungungulu, khilo li nyi wumbidego, furugedzo wa uye nya Tshivba Yatshavbo, wu nyi ningide guvbanya.

⁵ Khu guralo, wa gu dzi kodza nyi ninge phindrulo, dzi dongisele guphikhizana neni.

⁶ Wona nya gukhuwe nyi dzude khu ga Nungungulu gu fanana ni uwe; eni neni nyi wumbidwe khu libumba nga uwe.

⁷ Khu kharato, u nga nyi thavi u ndrendremela, kha nyi na gu lemedza khu gilo.

⁸ Lisine, uwe u ganede malito ma pwalago dzindzeveni gwangu, u di khuwe:

⁹ Eni nyi handzegide, nyi mwalo gighoho; nyi agide, nyi mwalo nandru.

¹⁰ Khu guralo, Nungungulu manide ndzila nya gudwane ni eni, a nyi wona nga nala waye.

¹¹ A nyi hungide mawundru yangu khu giphili, a khevisela dzindzila dzangu dzatshavbo.

¹² Olu nyi ngu gu ninga phindrulo nya gukheni, u ngu ghoha wa gu ganela kharato, kholu Nungungulu khongolo guvbindra muthu.

¹³ Khu ginani u dilelago avbo gwaye khuwe: Kha theli kota khu gu ninga phindrulo sigiro sago?

¹⁴ Aholu, Nungungulu a gu ganela nyondro mbili, gambe mwalo a thelago kota khuye.

¹⁵ A ngu ganela vbawutshigutunu, khu dzindroro ni siwoniso, na va lade ligovbe nya tshimatshima; vathu va ngari vbamalawutunu gwawe,

¹⁶ Uye a ngu dzi kodza gutula dzindzeve dzawe a va lembedza ni gu va dundrugisa sileletelo saye,

¹⁷ gasi vathu va duge mithumoni gwawe nya guvivbe, ni gu va dusa matshandzani gwawe.

¹⁸ Gasi a vbulugise mihefemulo yawe phalani nya lufu ni gu vbanyisa womi wawe gu songwa khu litshari.

¹⁹ Pfhumu a ngu tsayisa muthu a mu ladzisa vbadawutunu khu gu dwala, marambo yaye ma vbisa nyamba degula;

²⁰ a gu hodza a hasima monyo, ambari nari guhodza nya gwadi;

²¹ givili gyaye gi mwalalega, a tshala basi khu sikongolo vbavbandze.

²² A lirela basi gu relela thowoni, hefemulo waye wu ya vbanya gumogo ni vafi.

²³ Aholu muthu yoyu, ya gu bani yi romo ngilozi yi mu lombelelago ga Nungungulu, na yiri mweyo nya edzi nya likhumi mazana, yi na embela muthu yoyo esi si lulamidego mayelano khuye,

²⁴ yi na mu pwela wusiwana yi embela Nungungulu, khiyo: Mu tshudzise a si thegeli phalani nya lufu nyi mane igyo nya gulivbe khigyo nandru waye.

²⁵ Khu kharato, tshonge yaye, yi na bwelela gambe yi mana makhalelo yaye nya wanana, a mana wumburi nga wudzahani gwaye.

²⁶ U na lombelela ga Nungungulu, Uye a na gu hakha; u wona khovbe ya Nungungulu u kulungela khu gutsaka, Uye a na mu bweledzela khu gululama gwaye.

²⁷ Khu hwane a na wona vathu a ganela, khuye: Nyi ghohide khu gumba landrisa nayo, aholu uye kha nyi tsayisa gulandra khu sighoho sangu.

²⁸ Nungungulu tshudziside hefemulo wangu a wu himbedzela gu relela phalani nya vafi; nyi nga na gu simama gu wona gungangamela nya lidambo.

²⁹ Wona nya gukhuwe, satshavbo sesi, mithumo ya Nungungulu, a girelago vathu nyondro mbili mwendro nyondro tharu,

³⁰ gasi gu dusa mihefemulo yawe phalani nya vafi, a yi vbanyisa khu wenengedzo nya avo va vbanyago.

³¹ Joba, demba ndzeve u nyi yingisa gwadi; degula, eni nyi na ganela.

³² Wa gu bani uri ni lito nyi phindrule, ganela, kholu nyi na gu ninga lisine.

³³ Aholu wa gu bani uri mwalo lito, nyi yingise, eni nyi na gu hevbudza guti.