Joba 3 - Bhibhiliya Nya Guage

Gililo gya Joba

¹ Hwane nya satshavbo sesi, Joba a di tula likana laye, a vala litshigu a velegidwego khilo.

² A ganela, khuye:

³ “Li na fuve litshigu nyi velegidwego khilo, ni wutshigu gu ganedwego gupwani: Nyamayi a khuride mimba nya gikhwathana!

⁴ Litshigu lolo li na khale nari la gidema; Nungungulu, nari khu vbatshani, a nga khathali khu litshigu lolo, ne li nga woni safa nya guwonegele.

⁵ Li na fenengedzwe khu gidema, li tshiredzwa khu lipfhi nya gufe. Vathu va thedwa hwanga khu pfhuphelo waye!

⁶ Litshigu lolo li na khale gidema nya guthise, li si sayedwi tengoni nya matshigu nya mwaga, ambari tengoni nya matshigu nya ngima.

⁷ Wutshigu wowo wu na khale gyumba, gusi pwali mikulungwane nya gutsake ga wutshigu wowo.

⁸ Li na yuyutedwe khu vale va kodzago gu yuyutela matshigu, ni avo va kodzago gu yuyutela va nyatudwi va linene.

⁹ Dzinyeledzi nya wutshigu wowo dzi na pfhupedziswe gu khala gidema, gu si wonegi, ambari ni Wuronga nya gugye;

¹⁰ kholu kha dza sega mahembe ya mayi nyi si velegwi, gasi nyita wona tshanisa nyi yi wonago!

¹¹ Khu ginani nyi ngamba dzegela gufa na nyi nga gu duga khu rumbuni, nyi fela mahembeni ga mayi wangu?

¹² Khu ginani a nga nyi wugarela gwadi, nyi mana gukhalega vbamarumbitunu gwaye, nyi bwelo khavbo nyi mana mavele, ma nyi mamisidego?

¹³ Kholu na nyi nawude khu gurula, nyi lala nyi dzi hefemulela,

¹⁴ gumogo ni vafumeli ni vasingalagadzi va tigoni, va nga dzi vbahelago marowo, olu va lalago marumbini;

¹⁵ ni vathangeli nya sitetema va nga bani na vari ni ndralama nya yingi, ni gu tadza dzinyumba dzawe khu parata.

¹⁶ Khu ginani nyi ngamba fa nyi ngari rumbuni ga mayi, nyi fanana ni sanana si ngamba wona safa nya litigo.

¹⁷ Thowoni nya vafi, va nya guvivbedwa khu monyo kha va nga gu sanisa vathu, avo va garadego, va ngu mana guhefemula.

¹⁸ Avbovbo, ni sibotshwa niso si ngu mana guhefemula, nyamba yingisa gambe lito la mutshanisi.

¹⁹ Va nya gusolega ni sitetema, vatshavbo vomo avbovbo, ni dzikhumbi nidzo dza gu mana gutshulega ga mune wawe.

²⁰ Khu ginani gi velegidwego nigyo gisiwana tigoni, ni gu vbanya vale va garadzegago hefemuloni.

²¹ Vathu vovo, va gu vbweta lufu, aholu li si vbohi, va li vbweta khu giviti kha nga thomba yi sihidwego.

²² Va di vbweta gutsaka ni gunengela na va gu yiswa thowoni, gani?

²³ Khu ginani gu velegidwego muthu, ndzila yaye yi si wonegigo, kholu Nungungulu a mu bhiyede khu dzikhona dzatshavbo?

²⁴ Kholu wulangani nya gumane guhodza, guta miketo, nya gu lila, marongo yangu ma gu vbalagela nga mati.

²⁵ Kholu iso si nyi thurugisago sa gu nyi tela, niso nyi si thavago sa gu nyi dugelela.

²⁶ Nyi mwalo gurula, ni gukhadzisega, ni guhefemula, nya gu mana basi sigaradzo.”