Joba 27 - Bhibhiliya Nya Guage

Joba a ngu dzipwa nari mwalo nandru

¹ Joba a di simama a ganela, khuye:

² “Nyi ngu sambanya khu Nungungulu a vbanyago, uye a bombidego gu nyi vhikela, ni uye nya Tshivba Yatshavbo, a thede wuvi hefemulo wangu!

³ Na nyi ngari ni hefemulo nya guvbanye, ni furugedzo wa Nungungulu dzithonvuni gwangu,

⁴ kha nyi na dusa magana nya guvivbe khu kanani gwangu, ambari lidimi langu gu ganela silo nya wudambane.

⁵ Gima kha nyi na ganela gukheni magana yanu khya lisine; nyi na kala nyifa na nyi gukheni, nyi mwalo nandru.

⁶ Nyi na namarela gululamani gwangu, kha nyi na gu diga; na nyi nga gu vbanya, ni litshigu limwedo, monyo wangu wu nga nyi kawuki.

⁷ Nala wangu a na lamudwe kha nga muthu a ghohidego, ni uye a dwanago ni eni a na lamudwe nga muthu nya guvivbedwe khu monyo.

⁸ Kholu khu gevbini gitumbo gya muthu nya guvivbedwe khu monyo, gikhati Nungungulu a mu wandrelago guvbanya a vbindra mafuni momu?

⁹ Ina va gu thegedwa khu mhango, Nungungulu a na yingisa gulila gwawe, gani?

¹⁰ Mwendro muthu nya guvivbedwe khu monyo, a na salalegisa Uye a gu ni Tshivba Yatshavbo, gani? Mwendro a na lombelela ga Nungungulu gikhati gyatshavbo, gani?

¹¹ Nyi na mi hevbudzani mayelano khu tshivba ya Nungungulu, kha nyi na nga mi sihela makungo ya Mune nya Tshivba Yatshavbo.

¹² Enu mwatshavbo mu si wonide iso si dugeledego, a gu bani nari kharato, khu ginani mu nga gu luzago gikhati khu magana ma si phasigo gilo?

¹³ Nyi mi nonedzani tshatshazelo, Nungungulu a dongisedego avo nya guvivbedwe khu monyo, thomba yi na hakhwago khu sighohi khu mandzani ga Uye a gu ni Tshivba Yatshavbo kheyi:

¹⁴ Ambari va gu velega sanana nya singi, iso si na vbwerwa khu matshari, ni vatugulu vawe va na hamuga ni gilo nya guhodze.

¹⁵ Avo va na vbulugago, va nafa khu tungu, va si lidwi khu vagadzi vawe.

¹⁶ Ambari uye a gu hengeledzela parata yi tala kha nga mafu, ni gu tadza nyumba yaye khu guambala gukhwatshi libumba,

¹⁷ iso uye a nga si wungeledzelago, si na ambadwa khuye a lulamidego, ni parata yaye yi na kabanedwa khu vale va gu mwalo nandru.

¹⁸ Nyumba yaye yi na fanana ni gihaga nya gitoli, ni gikhwathi gya mulireli.

¹⁹ Gitetema gya gu lala na giri ni thomba nya yingi, aholu gi khendzuga gi yi hamuga na yi mwalalegide.

²⁰ A gu langaladzwa khu dzimhango kha nga mati nya ndrambi, vbawutshigutunu a gu kutsungwa khu gingulu.

²¹ A na furugedzwa khu phuvbo ya Khugadambo, a mwalalega, yi mu vbuvbisa, a duswa wulangani gwaye.

²² Nungungulu a na mu veta nyamba mu tsetselela, a na zama gu mu thava a tutuma, a tandrega.

²³ Litshigu a na thegago, vathu va na khwakhwatela mandza khu gutsaka va mu poyila khu gu womba dzindrodzi.”