Joba 26 - Bhibhiliya Nya Guage

Joba a ngu khusedza tshivba ya Nungungulu

¹ Khavbo avbo, Joba a di hakha, khuye:

² “Idzo u kodzago khidzo gu phasa muthu a gu mwalo tshivba, ni gu tiyisa libogo li vbedego tshivba!

³ Wusingalagadzi muni u ningidego muthu nya gipumbu, ni gu mu tulela guti lisine nya silo kha nga idzo si guromo khidzo!

⁴ Khu mani a gu phasidego gu dusa magana yoyo? Khu mani a gu tuledego gu ganela isoso?

⁵ Vafi va gu ndrendremela, vbavbatshi nya mati, gumogo ni vavbanyi va guromo umo.

⁶ Kholu lithowo li tulegide mbeli ga Nungungulu, gimwalo gi kodzago gu fenengedza liphala la avo va mbembidego.

⁷ Nungungulu a ngu ghwimba Marandzi ga damboni umo gu gu mwalo gilo, a emisa mafu ndrengelengeni.

⁸ A ngu hengeledzela mati mapfhini; aholu mapfhi yakone kha ma pferugi khu gu lemedwa.

⁹ A ngu siha gikhalo gyaye nya wufumu, a gi fenengedza khu mapfhi.

¹⁰ Vegide vbingano vbatshani nya mati, kala tshanganoni nya wutshigu ni mihani.

¹¹ Madingo ma tiyisago ndzadzini ma gu ndrendremela, ma khala hwanga khu gubhonga gwaye.

¹² Khu kotani nya tshivba Yaye a ngu kabanisa mati nya linene, khu guti gwaye a vbadzulela mwamilambo wa linene.

¹³ Khu Liphuvbo laye mburiside ndzadzini, a songa mwamilambo khu tshivba nya libogo laye.

¹⁴ Esi satshavbo gipandre basi nya mithumo yaye, hi pwide gipandre nya gidugwana nya ndruma yaye basi. Aholu khu mani a yelago guti tshivba nya guzindze gwaye, na?”