Joba 23 - Bhibhiliya Nya Guage

Phindrulo wa Joba

¹ Khu guralo, Joba a di hakha, khuye:

² “Ni muhuno nyi nga gu lila, nyi dilela khu wuvi, kholu gyandza gyaye gi ngu nyi sokhovedza khu kotani nya gukete gwangu.

³ Nari gupwani nyi ngu guti avbo a khalago! Nyi di hadza gu mu landra kala phathani gwaye!

⁴ Nyi di hadza guya mu bikela gwadi mahungu yangu, nyi phofumula satshavbo si guromo monyoni gwangu,

⁵ nyipwa idzo a nga hadza gu nyi hakha khidzo, ni gu yingisa magana a na gu nyi embelago.

⁶ Ina Uye a di hadza gu nyi dwanisa khu tshivba yaye nya yikhongolo, gani? Ahihi; aholu a di hadza gu nyi yingisa.

⁷ Nari pwani muthu nya gululame a ngu dzi kodza gu hakhana naye, eni nyi di hadza gu tshulega mbeli ga mulamuli wangu gikhati gyatshavbo.

⁸ Nya guya mbeli, mwalo iyoyo; nya gu bwelela hwane gambe, kha nyi mu mani.

⁹ Mwendro a gu thumela nyambade, kha nyi mu woni; mwendro a di sihala nyamudye, kha nya mu wona.

¹⁰ Aholu Uye a ngu yiti ndzila yangu; umo nyi gimbilago khumo, a gu nyi linga, nyi na fanana ni ndralama.

¹¹ Migondro yangu yi di landrisela umo a gandrago Pfhumu; gima kha nya ndreya ndzilani gwaye.

¹² Kha nya hambana ni sileletelo sa kanani gwaye, magana yaye nyi ma vegedzide ndrani nya monyo wangu.

¹³ A gu pimisa gu gira gilo, khu mani a dzi kodzago gu mu ganedza? Uye iso a si golago, a gu gira.

¹⁴ Kholu Uye a na tadzisa iso a si suvidego vbatshani gwangu, ni simbe silo a nga gu si pimisago khu monyoni gwaye.

¹⁵ Khu guralo, nya gu ema mbeli gwaye na nyi gu mu thava; nya gu mu alakanya, nya gu ndrendremela.

¹⁶ Kholu Nungungulu rerekeside monyo wangu, ni Nyadzitshivbe, khuye a nyi thedego hwanga.

¹⁷ Kholu kha nya dzimela muphelo vbakari nya gidema, ambari ulo, gidema kha gya fenengedza khovbe yangu.”