Joba 19 - Bhibhiliya Nya Guage

Joba a ngu tumba gukhuye muvbanyisi waye a ngu vbanya

¹ Joba a di hakha, khuye:

² “Kala lini na mu gu garadza hefemulo wangu, ni gu nyi paya khu magana yanu?

³ Likhumi dzinyondro na mu gu nyi yuyutela, ne mu mwalo dzitshoni khu gu nyi yuyutelani.

⁴ Ambari na nyiri ni nandru, kheni nyi wutigo.

⁵ Olu mu dzi khusedzago mbeli gwangu, mwa gu dzi dandrisa khu gutshaniseka gwangu.

⁶ Olu dzitini gukhenu: Khu Nungungulu a nyi giredego libango leli, a nyi tshunganisa naphwini gwaye.

⁷ Nya gu womba huwa, kheni: Mihimbo! Gambe mwalo a nyi hakhago; nya gu lila nyi lomba giphaso, aholu gu mwalo gulamuledwa.

⁸ Uye tshikide ndzila yangu, kha nyi kodzi guvbindra, fenengedzide khu gidema sindzilanani gwangu.

⁹ A nyi wandrede wudhumo wangu, a nyi dusela hungoni gihugu gyangu nya wufumu.

¹⁰ A nyi pfhungumude khu maphuvbo yatshavbo, nyi vbede; gitumbo gyangu a gi sigude kha nga idzo wu sigudwago khidzo simbo.

¹¹ A di khondra khu likhulo laye vbatshani gwangu, a nyi wona kha nga nala waye.

¹² Masotshwa yaye ma tombanide, ma dongisela ndzila nya gu nyi wugele; ma ta ghova, ma randrela tshatsha wangu.

¹³ A nyi hambaniside ni vandriyangu; ambari ni dzipari dzangu dzomo hwindzo ni eni.

¹⁴ Valongo vangu va nyi digide, vatshavbo nyi nga bani nyi pwanana navo, va nyi digide.

¹⁵ Ni avo va khalago ndrangani gwangu, ni sithumi sangu nya vama ni vanyamayi, va gu nyi wona kha nga gihegiso nyi gu khala muthu nya nombo mahoni gwawe.

¹⁶ Nya gu rana githumi gyangu, aholu kha gi nyi hakhi, ambari nya gu mu lomba phara mawundru.

¹⁷ Nya gu hefemula nya gu nungedza mwangadzi wangu, khu gihema gyangu, nyi hasimisa monyo ni sanana sa mahembeni gwangu.

¹⁸ Ambari ni sanana nya sidugwana, sa gu nyi hembulula; ambari nyi lingedza gu wuga, iso sa gu nyi hega.

¹⁹ Dzipari dzangu dzatshavbo nya lisine dza guswihala khu eni, ni vale nyi nga bani nyi va gola va nyi wugede.

²⁰ Tshonge yangu yi namarede ni sikongolo, ni magwaha yangu ma gu homogela gutshala wufiri.

²¹ Pharani mawundru va ndriyangu, pharani mawundru, mu nyi pwela gisiro! Kholu gyandza gya Nungungulu gi nyi vetide.

²² Khu ginani mu nyi tshanisago nenu, kha nga idzo nyi tshaniswago khidzo khu Nungungulu, kha mu kodwi khu gu hodza nyama yangu, gani?

²³ Nari pwani magana yangu ma gu lowa, ma bwelo khavbo ma bethwa gitambo mulibhukuni,

²⁴ ma bethwa avbo nya gileti nya dzisimbi ni sugu, ma khala vbagiwindritunu nyamba duga gambe!

²⁵ Kholu nyi ngu dziti gukheni muvhikeli wangu a ngu vbanya, ni gukheni, guhegisani a na ema vbatshani nya mafu.

²⁶ Ambari tshonge nya mili wangu na yi ghohekide, nyi na mu wona Nungungulu khu givili gyangu.

²⁷ Kheni mune kamwe, nyi na mu wonago khu maho yangu, nasiri khu maho ya mumbe muthu; nyi khevisela gikhati gegi khu monyo wangu watshavbo!

²⁸ Mwa gukhenu: Hi simama gu mu tshanisa, gani? Ni guvbweta guti hungo nya nandru waye.

²⁹ Khu guralo, thavani matshari, kholu likhulo li na mi resela gutsayiswa khu litshari, gasi mu kodze gu dziti gukhenu gomo gulamudwa.”