Joba 18 - Bhibhiliya Nya Guage

Va nya guvivbedwa khu monyo va na modwa khu naphwi

¹ Bhilidhadhi, Musuwa, a di ninga phindrulo, khuye:

² “Kala lini nu gu hi resela magana nya gu hi dembe khayo? Phela khu gu pimisa gwadi, hi na ganelago nago.

³ Khu ginani u hi fananisago ni sirengo? Mahoni gwago hi khala vamadhadhavale?

⁴ Uwe u dzi vbadzulelago khu likhulo lago! Ina litigo li na khala giwula khu kotani yago, gani? Mwendro siwindri si na sigudwa wulanga wawe, na?

⁵ Khu lisine, kandriya ya va nya guvivbedwa khu myonyo yi na tshimega ni malavbelavbe nya nilo wawe kha ma na wenengedza.

⁶ Mitshatshani gwawe kha gu na wonegela, ni kandriya nya guvbanye gwawe yi na tshimega;

⁷ Migondro yawe, yi na bwelela yi hongiswa, va theswa khu gikungo gyawe.

⁸ Kholu migondro yawe kamwe, yi na va modzisa khu ligoga, va thegela dzikhindrani gwaye;

⁹ va na modwa gitshinandro khu naphwi, va hungwa khu ngodzi nya lizinga.

¹⁰ Ngodzi yi dembidwe vbavbatshi nya mafu, gasi naphwi womo, wu dembidwe ndzilani gwawe.

¹¹ Va na thurugiswa khu maphuvbo yatshavbo khu dzimhango, va landreledwa ni evbini va hongolago.

¹² Tshivba yawe yi na bani yiri ndzala, ni wusiwana, wu na va vbohela khu maphuvbo yatshavbo.

¹³ Madwali ma na hodza sivbango nya sivili sawe, ina, si na hodzwa khu matiwula nya lufu.

¹⁴ Va na duswa tshatshani gwawe, va wu tumbidego; va yiswa na va si dzini ga mufumeli nya dzihanyi.

¹⁵ Tshatshani gwawe va na khala vathu va gu siri va na gyawe, ni nilo nya solufa, wu na phalalega ni ndranga yawe.

¹⁶ Mikhamba yawe yi na banga khu vbavbatshi, matamo yawe ma wu na khu vbatshani.

¹⁷ Kha va na alakanywa gambe mafuni, ni malina yawe kha ma na pwala gambe tigoni.

¹⁸ Va na duswa guwonegelani va rinywa mugidemani; va lundrwa tigoni gwatshavbo.

¹⁹ Gima kha va na mana gyanana ambari tugulu, tigoni gwawe, ambari gutshala moyo nya guvbanye dzindrangani gwawe.

²⁰ Gutsayiswani gwawe va na thurugisa vathu va Muhwadambo, ni vathu va Khugadambo, va na ndrendremela khu hwanga.

²¹ Khayo aya mavbelelo nya ndranga ya vathu nya guvivbedwe khu monyo, ni ndzila ya wule a si mutigo Nungungulu.