Joba 17 - Bhibhiliya Nya Guage

Joba gimwalo a gi lirelago gambe guvbanyani momu

¹ Hefemulo wangu wu ghohekide, matshigu yangu ma vbede, lithowo li nyi lirede.

² Nyi randredwe khu vatseketseli, maho yangu ma gu khedzisela idzo va nyi hembululago khidzo.

³ Nyi ninge gitumbo; khala muemeli wangu; khu mani a na gu nyi emela vbavbandze gwago uwe?

⁴ Kholu u sihide gupima myonyoni gwawe, khu guralo, uwe gima khu na dzumela gukhuwe va ghiye.

⁵ Uye a ningelago dzipari dzaye dzi phangwa, maho nya sanana saye ma na wu na.

⁶ A nyi giride gihegiso vbakari nya vathu, va nyi hetshela dzindrura khovbeni.

⁷ Sigaradzo sa gu songa maho yangu, sivbango sangu satshavbo sa gu mwalalega si fanana ni mutsa.

⁸ Avo va lulamidego va gu liwuga khiso, gasi avo va gu mwalo nandru, va na wugela sighohi.

⁹ Aholu, muthu nya gululame a na simama ndzilani gwaye, ni avo mandza yawe ma agidego, va na simama va mana tshivba.

¹⁰ Gasi olu, enu mwatshavbo wuyani eno; kholu, mwalo vbakari gwanu nyi mu manago na gengede.

¹¹ Matshigu yangu nya guvbanye ma vbede, ni iso nyi nga bani nyi si alakanya ni gu si pimisa khu monyoni gwangu, si tandregide.

¹² Va nyi vbindrugedzede wutshigu wu khala mihani, ni guwonegela khavo, gomo vbafuvbi ni gu khala gidema.

¹³ Gasi olu eni, nya gu lirela lithowo li khala ndranga yangu; ni gidemani nyi na ladza umo lidawu langu;

¹⁴ Nyi na embela liphala, kheni: “Khuwe babe wangu” Nyi embela siwungu, kheni: “Khenu vamayi ni vandriyangu.”

¹⁵ Gasi olu, gyomo hayi gambe gitumbo gyangu? Ina, gitumbo gyangu khu mani a dzi kodzago gu gi wona gambe?

¹⁶ Hi na relela gumogo phalani nya vafi, hi naya ladziswa gumogo ngumani nya mafu.