Joba 15 - Bhibhiliya Nya Guage

Magana nya wuvili ya Elifazi

¹ Elifazi, Mutemane, a di hakha, khuye:

² “Ina, muthu nya guti, a ngu hakha mahungu, khu mawonelo ma si phasigu gilo, gani? A gu tadza gisusu gyaye, khu liphuvbo li furugedzago, nya gute khu Khugadambo, gani?

³ A dzi vhikela khu magana ma si phasigu gilo, ni gu ganela mahungu nyambana giphaso, gani?

⁴ Uwe wa gu pfhungumula wukhodwa, u vbungula milombelo yi vbwetegago ga Nungungulu.

⁵ Kholu likana lago li ngu thuledza wuvivbi wago; uwe u na ni maganelelo nya vakanganyisi.

⁶ Likana lago khilo li gu konago, khandreni; ni malito yago ma ngu fakaza isoso.

⁷ Ina kamwe khuwe muthu nya guhegule gu velegwa mafuni momu, gani? Mwendro u velegidwe sigomo si si gu tumbulugi?

⁸ Mwendro u di nga yingisa sihalo nya gikungo gya Nungungulu, gani? Ina khuwe wenga u gu ni guti, gani?

⁹ Ginani uwe u gitigo, ethu hi si gitigo, na? Niso u si pimago, ethu hi gumba si pima?

¹⁰ Vbakari gwathu vomo avo va gumbidego va gu ni dzinvi, va gumbidego ngudzu guvbindra babe wago.

¹¹ Ina khu khathali khu gululekwa khu Nungungulu, gani? Ni magana nya guvbevbuge hi gu tangadzisago khayo, gani?

¹² Gasi monyo wago wa gu gu yisa hayi? Olu maho yago ma runyago, na?

¹³ Kholu uwe wa gu wugela Nungungulu, u dusa magana nya nga aya khu kanani gwago!

¹⁴ Khuye mani muthu, nya gukala a dzipwa na lulamide? A na lulama kharini na velegidwe khu nyamayi?

¹⁵ Ambari Nungungulu kha tumbi sihathwa saye; ambari ndzadzini kha gu woni na gululamide,

¹⁶ gu na girega kharini ga muthu nya gighohi ni mapimo nya gunyenyeze, oyu a dzegago gighoho a gi gira mati nya gusele?

Elifazi a ngu yeyedza tsayiso nya gululame wa sighohi

¹⁷ Tula ndzeve u nyi yingise; kholu nya gu vbweta gu gu tshamusela iso nyi si wonidego,

¹⁸ iso si huweledwego khu va nya guti, esi va si pwidego ga vavelegi vawe, va ngamba sihedwa khavo.

¹⁹ Avo va ningidwego litigo, li lumbago avo basi, li gu mwalo limbe lifumbu li vbindridego khavbo gwawe.

²⁰ Muthu nya guvivbedwe khu monyo, guvbanyani gwaye gwatshavbo khwa gutshaniseka basi, kha nga gambe muthu nya dzihanyi, matshigu yaye nya guvbanye ma rode.

²¹ Gikhati gyatshavbo dzindzeveni gwaye, gupwala malito nya guthise; ambari gikhatini nya gurule, uye a gu dhumedwa khu vaphangi.

²² Kha khodwi gukhuye a na vbuluga khu gidemani, a gu dzipwa na lirede gusasedwa khu litshari basi.

²³ A gu legalega a vbweta guhodza na gukhuye: Gomo hayi? Kholu a ngu dziti gukhuye, litshigu nya gidema lomo vbafuvbi gwaye.

²⁴ Gutshaniseka ni sigaradzo si ngu mu thela hwanga; gu fanana ni mufumeli a dongidego guya dwana,

²⁵ kholu thawuludzide mandza a wugela Nungungulu a dzi khusedza mbeli ga Pfhumu nya Tshivba Yatshavbo.

²⁶ A vbiredzela gu mu yela na tiyide, na gu tumba gu thangisa gitshangu gyaye nya gikhongolo.

²⁷ Kholu khovbeni gwaye gu nonide khu mafura, khu gu hodza a khura a duga ni girumbu.

²⁸ Vbanyide madhoropani ma pfhungumudwego dzinyumbani nyamba khadwa khu vathu, dzi liredego gu khala matala nya marumbi.

²⁹ Khu guralo, uye gima kha na khala gambe gitetema, thomba yaye kha yi na simama, ambari sigiro saye kha si na andra mafuni momu.

³⁰ Uye gima kha na vbuluga lufuni; matamo yaye ma vbiswa khu nilo, a na mbembiswa khu phuvbo yi dugago khu kanani gwa Nungungulu.

³¹ Muthu a nga tumbi silo si si phasigo, a dzi kanganyisa uye mune wurumba, kholu, iso nyamba phasa gilo, si na khala tshatshazelo yaye.

³² A hakhiswa matshigu yaye ma si gu eneli, matamo yaye ma si gu thungi.

³³ A na fanana ni ngure wu thesedwago dzikhure dzaye, khu phuvbo dzi si gu vidzwi, mwendro nguhu wu theselago wenge waye.

³⁴ Kholu tsawa wa va nya guvivbedwa khu monyo, wu na khala gyumba, ni mitshatsha ya sidambane, yi na dagarela khu nilo.

³⁵ Va khuride mimba khu wuvivbi, va na velega gighoho, kholu khu ndrani gwawe, guduga wukanganyisi.”