Joba 1 - Bhibhiliya Nya Guage

Joba muthu nya gululame ni guthava Nungungulu

¹ Tigoni ga Huzi a di romo mwama moyo nya gupwani khu Joba. A diri muthu nya gululame a nga bani a nyenya gighoho, a ninga githawo Nungungulu.

² A diri ni livbandre na sivili sanana nya sikhwathana, ni siraru nya sagadzyana.

³ A diri ni livbandre na mavili magumi mazana (7.000) nya dzinvuta, magumararu mazana (3.000) dzingameriya, livbandre mazana (500) mipatwa nya dzimombe, livbandre mazana (500) nya dziburu nya migadzi ni tengo nya wungi nya dzikhumbi. A diri muthu nya gufume ngudzu tigoni ga Khugadambo.

⁴ Sanana sa Joba nya sikhwathana, si di gu olovela gu gira mibuzo khu matshigu nya guhambanelane, va rana ni vandriyawe va vararu nya sagadzyana vata hodza ni gu sela ndrangani ga moyo nya avo.

⁵ Gikhati va vbedzago matshigu nya buzo, Joba a di ranisa sanana saye gasi guta si agisa; a wuga ni dzimindru dzakone aya ningela phaso nya guvbiswe maningano khu vatshavbo, kholu a di gu alakanya gukhuye: “Hage saye, sanana sangu si ghohide, si vala Nungungulu khu myonyoni gwawe.” Joba a di gira kharato gikhati gyatshavbo.

Guphela nya silingo sa Joba

⁶ Tshigu mwedo sanana sa Nungungulu si ngaya dzi wonegisa mbeli ga Pfhumu, Sathane nuye a diri navo.

⁷ Khavbo avbo, Pfhumu Nungungulu a di wudzisa Sathane, khuye: “Gasi uwe wa guta khu hayi?” Sathane a di hakha Pfhumu Nungungulu, khuye: “Nya gu legalega tigoni nyi zulazula mafuni.”

⁸ Pfhumu Nungungulu a di embela Sathane, khuye: “U di nga gi wona githumi gyangu Joba, gani? Muthu nya gululame a thavago Nungungulu, mwalo mafuni a fananago naye, kholu a ngu hambana ni guvivba.”

⁹ Sathane a di hakha Pfhumu Nungungulu, khuye: “Ina Joba a gu hala hala, a thumela Pfhumu Nungungulu, gani?

¹⁰ Khandri olu u vhikelago ndranga yaye gumogo ni silo saye, gani? U kategiside thumo nya mandza yaye, ni mitshambi yaye yi andride tigoni momu.

¹¹ Aholu, wa gu khusedza libogo lago u kuha iso a gu naso, wona gwadi nya gukhuwe a na gu vala nu gu mu wona.”

¹² Pfhumu Nungungulu a di embela Sathane, khuye: “Khedza, u wona satshavbo a gu naso, somo mandzani ni tshivbani gwago, aholu u nga tshuki u kuha mili waye.” Khu guralo Sathane a di khuga mbeli ga Pfhumu Nungungulu.

¹³ Tshigu nya gukari, sanana sa Joba si diri dangamwedo gumogo ni vandriyawe nya sagadzyana, si hodza ni gu sela wadwa ndrangani ga ndriyawe nya koma,

¹⁴ gu dita mwango wuta embela Joba, khuye: “Dzimombe dzi di gu lima ni dziburu nidzo dzi di gu hava vbafuvbi,

¹⁵ khu githugedza, va di vboha va na Sebha, vata phanga sifuyo satshavbo, va songa vahavisi khu matshari, eni kheni nyonga nyi vbulugidego basi, nyi gu reselago mwango.”

¹⁶ Na si gu vbedzi gu ganela, gu dita wumbe mwango, wuta, khuye: “Nilo wa Nungungulu wu thegide khu ndzadzini, wuta vbisa tshambi watshavbo nya dzinvuta gumogo ni sithumi, nyi di tshala eni nyenga basi, nyi gu reselago mwango.”

¹⁷ Nasi gu vbedzi gu ganela, gu dita mumbe ata, khuye: “Vakalidhiya, va dzude khu mitsawa miraru, vata phanga dzingameriya va hongola nadzo, va songa sithumi satshavbo khu litshari. Nyi di tshala eni nyenga basi, nyi gu reselago mwango.”

¹⁸ Nasi gu vbedzi gu ganela, gu dita gambe mumbe ata, khuye: “Sanana sago nya sikhwathana niso nya sagadzyana, si diri vbabuzotunu, na va gu hodza ni gu sela wadwa ndrangani ga ndriyawe nya koma,

¹⁹ khu githugedza, gu di dugelela phuvbo nya yikhongolo yi ngata khu giwulani yita veta dzikhona dzatshavbo dza dzina nya nyumba, yi thegela vbatshani gwawe vafa vatshavbo; gu di tshala eni nyenga basi, nyi gu reselago mwango.”

Gutumbega gwa Joba

²⁰ Khavbo avbo, Joba a di khuga a ema, a pferula dzingandzu dzaye, a vbalula ndzudzu hungoni, a thega vbavbatshi khu khovbe, a lombelela,

²¹ a ganela, khuye: “Nyi dugide khu ndrani ga mayi wangu nyiri mwalo gilo, nyi na bwelela gambe nyiri mwalo gilo. Pfhumu Nungungulu a nyi ningide, Pfhumu Nungungulu dzegide; li na bongwe lina la Pfhumu Nungungulu!”

²² Khu satshavbo sesi Joba kha gira ni gighoho gimwegyo, gambe kha singedza gilo Nungungulu.