Jeremiya 51 - Bhibhiliya Nya Guage

Tshivba ni guthega ga litigo la Bhabhiloni

¹ Pfhumu Nungungulu a ngu ganela kharati, khuye: Wonani nya gukhenu nyi na rumela liphuvbo nya gu sasele li ta sasela litigo la Bhabhiloni, gumogo ni vavbanyi vaye.

² Nyi na rumela va nya mayigo tigoni ga Bhabhiloni, vata mu vbevbera nga mungu wu vbuvbiswago khu phuvbo va ya thegela hwindzo ni litigo lawe, kholu va nata randredwa khavo khu maphuvbo yatshavbo khu litshigu nya tsayiso.

³ Mukhwandri nya giholoma, a nga digi gu khwandra siholoma saye, ni gu ambala gikhweso gyaye nya gu dzi vhikele, mu nga tsetsi madzaha yawe, mbembisani masotshwa yawe yatshavbo.

⁴ Va nafa va mbambamela mudzindzilani dza tigoni ga Vakalidhiya,

⁵ kholu Israyeli ni Judha kha va digwa khu Nungungulu wawe, ni Pfhumu Nungungulu nya Tshivba Yatshavbo ambari litigo la Vabhabhiloni li tadego khu sighoho nya gu ghohele Gihathwa gya Israyeli.

⁶ Thavani khu dhoropani ga Bhabhiloni! Moyo ni moyo, a na vbulugise womi waye! Mu nga songwa khu kotani nya sighoho sawe, Kholu, egi khu gikhati Pfhumu Nungungulu a dzi phodzelago; a va bweledzela gukhedza khu mithumo yawe.

⁷ Litigo la Bhabhiloni li di gu fanana ni gikombe nya ndralama Pfhumu Nungungulu a pharidego mandzani, a sedza a levisa litigo latshavbo; mayigo ma di sela vbinyu yaye; khu guralo, ayo ma di handrugiswa mapimo.

⁸ Khu githugedza, Bhabhiloni thegide a khala marumbi; lilani khu uye, vbwetani rendre mu todze dzimbanga dzaye; mwendro saye a na hawuluga.

⁹ Hi di zamide gu vbodzisa silondra sa Bhabhiloni, aholu hi tandregide. Olu mu digeni hi hongole, muthu ni muthu a na bwelele tigoni gwawe, kholu gulamudwa gwaye gu vbohide kala damboni, gulapha kala mapfhini.

¹⁰ Pfhumu Nungungulu a hi lamulede; hongoleni Siyoni hi ya tivisa vambe, iso hi giredwego khu Pfhumu Nungungulu wathu.

¹¹ Lodzani sighalala, mu phara sitshangu! Pfhumu Nungungulu a pepugiside mapimo ya vafumeli va tigoni ga Medhiya, kholu makungo yaye, khu gu pfhungumula Bhabhiloni. Pfhumu Nungungulu a na phodza, a dzi phodzela khu nyumba yaye nya miphaso

¹² Ghwimbani ngavbya mudzindzarini ga Bhabhiloni, engedzelani vaemeledzi mu vega dzighadhi, va vandrameleni, kholu Pfhumu Nungungulu a ngu tadzisa gikungo a hungidego khu gale nya guwugele vavbanyi va Bhabhiloni.

¹³ Uwe u khadego vbakari nya mitsongo nya mati nya mangi, u fumide khu dzithomba, gambe gu vbohide mahegiso gwago ni makolo yago ma vbede.

¹⁴ Pfhumu Nungungulu nya Tshivba Yatshavbo, sambanyide khu wurumba waye kamwe, khuye: “Nyi na rumela vathu nya gutale, nya gufanane ni mwamba nya dzimbera, va nata womba mikulungwane nya gu ghiye khu gu gupala.”

¹⁵ Pfhumu Nungungulu, khuye a vangidego mafu khu tshivba yaye; khu guti gwaye a vangide litigo, khu mapimo yaye a fenengedzide ndzadzini.

¹⁶ Khu libara nya lito laye, mati ma gu dzuma ndzadzini, gu khusega mapfhi khu mahegiso nya litigo, gwa gu lasa, ya guwa ndzadzi, gu khuga dziphuvbo khu malangani gwaye.

¹⁷ Vatshavbo va si wonago va gu liwuga! Vale va vatago sifananiso va khala dzitshoni; kholu nungungulu nya sifananiso khandri wa lisine, gambe va mwalo hefemulo.

¹⁸ Iso kha si phasi gilo, mithumo nya wupumbu; khu litshigu nya tsayiso, satshavbo si na mbemba.

¹⁹ Aholu Nungungulu wa Jakobe, kha fanani ni vanungungulu vovo, kholu uye khuye Muvangi nya silo satshavbo, Israyeli lihundzu nya thomba yaye, lina laye khuye Pfhumu Nungungulu nya Tshivba Yatshavbo.

²⁰ Uwe Bhabhiloni, u diri gikhokhotho ni litshari nya nyimbi mandzani gwangu, khu uwe, nyi vbadzulede mayigo ni gu pfhungumula vafumeli;

²¹ nyi gu thumiside gu vbadzulela kavalu ni mukhileli waye, nyi gu thumiside gu vbadzulela dzikareta nya nyimbi ni vagimbidzisi vakone;

²² nyi gu thumiside gu vbadzulela vama ni vanyamayi; nyi gu thumiside gu vbadzulela sikhosane ni sikhwathana; nyi gu thumiside gu vbadzulela madzaha ni dzimbiri;

²³ nyi gu thumiside gu mbembisa vahavisi ni mitshambi yawe; ni gu vbadzulela mulimi ni dzimombe dzaye; nyi gu thumiside gu vbadzulela dzindruna ni madhota yawe.

²⁴ Nyi na bweledzela Bhabhiloni ni vavbanyi vatshavbo va Kalidhiya guvivba gwatshavbo va giredego Siyoni na mu gu si wona khu maho yanu, a ngu ganela Pfhumu Nungungulu.

²⁵ Pfhumu Nungungulu a ngu ganela, khuye: Nyi womo avba gasi gu wugela uwe gigomo nya wupfhungumuli, uwe u pfhungumulago litigo latshavbo; nyi na phela kheni nyi gu handzega mandza yangu, nyi gu wumbulutela khu vbatshani nya siwindri u thega, u khala litala nya nguma.

²⁶ Mwalo muthu a na gu thumisago gambe siwindri sa vbandzaritunu gwago, gasi gu gira khiso madingo mwendro khokhweni, kholu uwe u na khala marumbi kala gupindruga, a ngu ganela Pfhumu Nungungulu.

²⁷ Ghwimbani ngavbya mafuni, mu womba pundru vbakari nya mayigo, mu rana mayigo ma ya mu sasela; mu mu rambela mifumo ya Ararati, Mini ni Asikinazi! Mu hatha muthangeli nya nyimbi, mu rumela dzikavalu nya gutale, dzi mu fenengedza kha nga mwamba nya dzimbera.

²⁸ Rambani mayigo yatshavbo ni vafumeli va Medhi, ni vathangeli nya dzinyimbi dzawe, madhota ni mayigo yatshavbo a ma fumelago.

²⁹ Mafu ma na tsekatseka khu gu vbisega, kholu makungo ya Pfhumu Nungungulu, momo vbafuvbi ni gu gira iso a sambanyidego gu gira ga litigo la Bhabhiloni, gu li gira marumbi nyamba khadwa gambe khu muthu.

³⁰ Dzindrena dza Bhabhiloni, dzi digide matshari dzi tutuma, dzi ya sihala makhokholani gwawe, dzi vbede tshivba, dzi khala kha nga vanyamayi, dzinyumba dzawe dzi ngu dagarela, ni migonyo nya malimba yawe yi fanyeledzedwe.

³¹ Myango ya gu tshiyisana khu gu tutuma, guya tivisa ga mufumeli wa Bhabhiloni, khavo: Lidhoropa li wandridwe khu maphuvbo yatshavbo;

³² va segide dzindzila, va vbisedzede dzinyumba khu nilo, masotshwa ma pilegide hwambo khu hwanga.

³³ Kholu Pfhumu Nungungulu nya Tshivba Yatshavbo, Nungungulu wa Israyeli, a ngu ganela kharati, khuye: “Nyamahegyane wa Bhabhiloni womo kha nga githala avbo nya gikhati nya guvbwere, gu tshade vbadugwana, gi na vboha gikhati nya guvbule.

³⁴ Nabhukodhonosori, mufumeli wa Bhabhiloni a nyi hodzide, bwelo khavbo a nyi gandredzela, a nyi gira nga kanvu nya liphanga, a nyi midza nga mwamilambo, a tadza gisusu gyaye khu silo sangu nya sadi, bwelo khavbo a nyi dzudzuga hwindzo.”

³⁵ Vavbanyi va Siyoni va na ganele, khavo: Khu iso va hi giredego milini gwathu, novba wathu wu na thegele vbatshani ga Bhabhiloni. Jerusalema nuye a na ganele, khuye: Novba wathu wu na vbalage vbatshani ga vavbanyi va Kalidhiya.

³⁶ Kholu, Pfhumu Nungungulu a ngu ganela kharati, khuye: Wona nya gukhuwe nyi na gu vhikela nyi gu phodzela khu satshavbo a gu giredego; nyi vbwisa mitsongo yawe, gumogo ni sifefe sawe si na banga, nyambana mati.

³⁷ Bhabhiloni a na vbindrugedza a khala litala nya siwindri umo yi na vbanyelago umo migehe, gilo nya gisamadziso ni gihegiso, wulanga wu si khadwigo khu muthu.

³⁸ Vathu vaye va na bhonga nga singhalana, va ngurangura nga sanana nya nghala.

³⁹ Aholu na va nga gupwa ndzala, nyi na va girela buzo nyi va levisa khu wadwa, gasi va tsaka guvbindra pimo, va lala ligovbe nya gupindruge nyamba wuga gambe, a ngu ganela Pfhumu Nungungulu.

⁴⁰ Nyi na va yisa gusongwatunu nga dzinvuta, kha nga dzihamba ni vanyamabhongwe.

Gililo ni ketso ya Bhabhiloni

⁴¹ Gasi wandridwe ni gu modwa kharini Sisaki, manidwego khu githugedza, uye a gu wudhumo nya litigo latshavbo! Vbindrugedzide kharini a khala gilo nya guthise ni gihegiso vbakari nya mayigo!

⁴² Mati nya linene ma dzude ga Bhabhiloni ma ta mu fenegedza khu mavimbi yaye nya mangi.

⁴³ Madhoropa yaye ma vbindrugedzide ma khala marumbi, ma khala marumbi ni gihala, giwula nyamba khadwa khu muthu umo ni muthu moyo a si vbindrigo khumo.

Gitsayiso nya sifananiso

⁴⁴ Nyi na tsayisa Bheli, nungungulu wa Vabhabhiloni, nyi mu gosisa khu kanani gwaye, satshavbo a hodzidego. Mayigo gima kha ma na ngata tshangana gambe gwaye, ni libhiyo la Bhabhiloni li khungumudwe.

⁴⁵ Enu vathu vangu dugani vbakari gwaye! Muthu ni muthu a na vbanyise womi waye, thavani likhulo nya guthise la Pfhumu Nungungulu.

⁴⁶ Mu nga pilegi hwambo mu thava khu gupwa iso si na gu ganedwago tigoni ga Bhabhiloni, kholu khu mwaga yoyu, mu napwa esi; wumbe mupwa sile, ni ghudzeghudze tigoni, mufumeli a na wugela mufumeli kwawe.

⁴⁷ Khu guralo, ma nguta matshigu nyi na gu tsayisa vanungungulu nya sifananiso nya guvatwe va Bhabhiloni; litigo latshavbo li na tala khu dzitshoni, ni vathu vatshavbo va na gu songwago, va na mbambamela vbakari gwaye.

⁴⁸ Ndzadzi ni mafu gumogo ni satshavbo si guromo umomo, si na tsaka si womba mikulungwane khu kotani ya Bhabhiloni, kholu avo vatago vata sasela litigo leli, va nata khu Wuronga, a ngu ganela Pfhumu Nungungulu.

⁴⁹ Kha nga Bhabhiloni a songidego vathu nya vangi va na Israyeli, khu guralo, Bhabhiloni nuye fanede gufa, kholu a songide gambe nya vangi va tigoni gwatshavbo.

⁵⁰ Enu mu vbulugidego gu songwa khu matshari, thavani, vbiredzani gu khuga, thavelani mayigo ya hwindzo, ambari na muri hwindzo mu nga divaledwi khu Pfhumu Nungungulu, myonyo yanu yi na alakanye Jerusalema.

⁵¹ Ganelani, khenu: Hi tade khu dzitshoni kholu va hi poyide; va fenengedzide dzikhovbe dzathu khu dzitshoni, kholu va nya mayigo va bede nyumbani nya guage Nyumba nya miphaso ya Pfhumu Nungungulu.

⁵² Khu guralo, ma nguta matshigu, a ngu ganela Pfhumu Nungungulu; nyi na gu khungumulelago sifananiso satshavbo nya guvatwe; vathu vatshavbo va payidwego dzimbanga, va na keta tigoni gwawe gwatshavbo.

⁵³ Bhabhiloni ambari nari a di lita kala damboni, aya tiyisa iyoyo makhokhola yaye, Eni nyi di hadza gu rumela vasaseli vaya mu mbembisa, a ngu ganela Pfhumu Nungungulu.

⁵⁴ Gu di pwala huwa nya gudugele Bhabhiloni, ni gililo nya gusasedwe litigo la Vakalidhiya!

⁵⁵ Kholu Pfhumu Nungungulu, a ngu sasela litigo la Bhabhiloni, a vbedza ligwaha la vathu va guromo umomo, mavimbi nya linene ma na dzuma kha nga mati nya mangi, kholu va napwa ligwaha nya malito yawe.

⁵⁶ Kholu musaseli a nata sasela Bhabhiloni; dzindrena dzaye dzi na modwa, matshari yawe ma fanyeledzedwa; kholu Pfhumu Nungungulu a bweledzelago mihandro ya va nya guvivba, kha digi gu va ninga tshatshazelo nya mithumo yawe.

⁵⁷ Pfhumu Nungungulu a ngu ganela, khuye: “Nyi na levisa vathangeli ni vagengeli vawe, vafumeli, dzindruna ni masotshwa yawe, va na lala ligovbe nya gupindruge nyamba khendzuga gambe; a ngu ganela Mufumeli, lina laye a gu uye Pfhumu, Nungungulu nya Tshivba Yatshavbo.

⁵⁸ Pfhumu Nungungulu nya Tshivba Yatshavbo, a ngu ganela kharati, khuye: Mabhiyo nya guaname ma bhiyidego Bhabhiloni, ma na khungumuledwa muphelo, gu vbiswa ni malimba yaye nya gulaphe, mafumbu ya tigoni ma na bani ma thumede mahala, mayigo ma napwa wuvi khesi si vbidego.”

Magana ya Jeremiya ma ngu rumedwa Bhabhiloni

⁵⁹ Aya khu magana ma rumedwego khu muprofeti Jeremiya ga Seraya, mwamana wa Neriya, mwamana wa Mahaseya gikhati va nga bani va gu hongola Bhabhiloni ni Zedhekiya, mufumeli wa Judha, khu mwaga nya wu na nya gufume gwaye. Seraya a diri muthangeli nya dzighadhi.

⁶⁰ Jeremiya a di lova libhukuni nya gukari dzimhango dzatshavbo dzi nga bani dzi gu vbweta gu dugelela tigoni ga Bhabhiloni, gumogo gambe ni simbe si nga vbweta gu wonega.

⁶¹ Jeremiya a di embela Seraya, khuye: “Avbo u na gu vbohago Bhabhiloni, dzi garadze khu guya hevbula mahungu yaya khu lito nya gukhugege.

⁶² U ganela, khuwe: Uwe Pfhumu Nungungulu, khuwe u ganedego khu gu pfhungumula lidhoropa leli khuwe, li na khala marumbi nyambana muthu mwendro girengo, gambe li na vbindrugedza li khala giwula kala gupindruga.

⁶³ Avbo u na gu vbedzago gu hevbula iso si lovidwego umomo, u na li hunga giwindri u li rinya tsongoni wa Ewufrate;

⁶⁴ u ganela, khuwe: A na rikiswe kharati Bhabhiloni, a si wonegi gambe khu kotani nya libango nyi na gu mu rumelago. Avo va na thega.” Ma gu hegisa avba magana ya Jeremiya.