Jeremiya 43 - Bhibhiliya Nya Guage

Jeremiya a ngu yiswa Egipito

¹ Avbo Jeremiya a nga vbedzago gu embela vathu vatshavbo magana yatshavbo a nga leletedwago khu Pfhumu Nungungulu waye, ayo Pfhumu Nungungulu waye a nga mu rumelago guta va tivisa,

² Azariya, mwamana wa Hosaya, ni Jowanani, mwamana wa Kareya, ni vatshavbo va nya matshandza, va di embela Jeremiya, khavo: “Malipha isoso u ganelago! Pfhumu Nungungulu wathu, kha gu rumela guta hi embela khuye, hi nga hongoli hiya khala tigoni ga Egipito.

³ Uwe wa gu kutsedzedwa khu Bharuki, mwamana wa Neriya, gasi guta hi dwanisa, gasi hi kodza gu thegela mandzani ga Vakalidhiya, va hi songa ni gu hi mola va hi yisa wugumbini Bhabhiloni.”

⁴ Khu magirelo yoyo, Jowanani, mwamana wa Kareya, ni dzindruna dzatshavbo nya nyimbi gumogo ni vathu vatshavbo, va di yeyisa magana ya Pfhumu Nungungulu, va si dzumeli gu khala tigoni ga Judha.

⁵ Khu guralo, Jowanani, mwamana wa Kareya, ni vathangeli nya nyimbi, va di dzega gidzemo gyatshavbo nya vathu va nga bani va vbulugide va phalalega ni mayigo va nga wuyiswago nyaluphye guta khala tigoni ga Judha, va hongola navo.

⁶ Mitshaledwa yakone, a diri vama, vanyamayi ni sanana nya vanyamahegyane va mufumeli, ni vatshavbo vathu, Nebhuzaradhani, muthangeli nya vaemeledzi va mufumeli, a nga bani a va ningede ga Gedhaliya, mwamana wa Ayikamo, mwamana wa Safani, gumogo gambe ni muprofeti Jeremiya, ni Bharuki, mwamana wa Neriya;

⁷ na va yeyiside kharato magana ya Pfhumu Nungungulu, va di khuga va hongola Egipito, va ya vboha dhoropani ga Tafenisi.

Jeremiya a ngu profeta gusasedwa ga Egipito khu Nabhukodhonosori

⁸ Na vari Tafenisi, Pfhumu Nungungulu a di rumela magana ga Jeremiya, khuye:

⁹ Dzega siwindri nya sikhongolo, u si siha vbavbatshi nya siwindri nya libumba si guromo vbafuvbi ni nyangwa nya nyumba ya Faro, na wu gu wonwa khu va na Judha.

¹⁰ U va embela, khuwe: Pfhumu Nungungulu nya Tshivba Yatshavbo, Nungungulu wa Israyeli, a ngu ganela kharati, khuye: “Wonani, nyi na ranisa githumi gyangu Nabhukodhonosori, mufumeli wa Bhabhiloni, nyi nata emisa gikhalo nya wufumu waye vbatshani nya siwindri sesi si kembedwego avba, uye a na ghwimba tshatsha waye nya wufumu vbatshani nya siwindri sesi.

¹¹ Uye a nata sasela litigo leli la Egipito. Avo va lumbwago khu gufa, va nafa! Avo va na lumbago gu vbagedwa, va na vbagedwa! Avo va lumbago gu songwa khu matshari, va nafa khu matshari!

¹² Nyi na dzurisa nilo dzinyumbani dza vanungungulu va Egipito, uye a na vbisa vanungungulu vakone, vambe a na va rwala a hongola navo nga dzikhumbi. A vbiyela litigo la Egipito, kha nga muhavisi a songago dzindraya dza dzingandzuni gwaye, a na bwelela khu vbale na gu womba kulungwane.

¹³ A na pandrelela sifananiso satshavbo nya sikhongolo nya vanungungulu dhoropani ga Bheti-Semesi, tigoni ga Egipito, a bwelo khavbo a vbisa dzinyumba dza vanungungulu vawe.”