Jeremiya 42 - Bhibhiliya Nya Guage

Jeremiya a ngu tivisa Vajudha gukhuye va si hongoli Egipito

¹ Khu guralo, vagimbidzisi vatshavbo nya nyimbi, Jowanani, mwamana wa Kareya, Jezaniya, mwamana wa Hosaya, ni vathu vatshavbo va tigoni; gukhugela vakhongolo ni avo nya vadugwana,

² va di embela muprofeti Jeremiya, khavo: “Upwa gulila gwathu, u hi lombelela ga Pfhumu Nungungulu wago, khu vathu vatshavbo vava va tshadego kholu, kha nga u dzitigo, hi diri vangi, aholu hi tshade na hiri vadugwana, kha nga u si wonago;

³ gasi Pfhumu Nungungulu wago, a hi nonedza ndzila hi yelago gu gimbila khiyo ni iso hi yelago gu gira.”

⁴ Muprofeti Jeremiya a di va hakha, khuye: “Nyi si pwide iso mu nyi lombidego; nyi na lombelela khu enu, ga Pfhumu Nungungulu wanu, mayelano ni gilombo gyanu. Satshavbo iso Pfhumu Nungungulu, a na gu nyi embelago, nyi na mi tivisani nyamba siha gilo.”

⁵ Avo va di hakha Jeremiya, khavo: “Pfhumu Nungungulu, a na khale fakazi nya lisine ni gu tumbega mbeli gwathu, ha gumba landrisa esi Pfhumu Nungungulu wago, a na gu rumelago gu hi tivisa!

⁶ Ambari nari yadi mwendro nyamba yadi, hi na ma yingisa magana ya Pfhumu Nungungulu wathu hi gu rumelago avbo gwaye, gasi hi mana makategwa khu gu yingisa magana ya Pfhumu Nungungulu wathu.”

⁷ Khu hwane nya likhumi matshigu, Pfhumu Nungungulu a di ninga phindrulo Jeremiya,

⁸ uye a di ramba Jowanani, mwamana wa Kareya, ni dzindruna dzatshavbo nya nyimbi a nga bani nari nadzo, gumogo ni vathu vatshavbo, gukhugela vakhongolo ni vadugwana.

⁹ Khavbo avbo, a di va embela, khuye: Pfhumu Nungungulu wa Israyeli, uye mu nga nyi rumelani gwaye guya gira gilombo gyanu, a ngu ganela kharati, khuye:

¹⁰ Mwa gu khalani khu mavbanyelo nya yadi tigoni momu, Eni nyi na mi tiyisa, wulangani nya gu mi pfhungumule; nyi na mi tsitsa wulangani nya gu mi sigule, kholu nyi ngu dzi laya khu dzimhango nyi mi giredego.

¹¹ Mu nga khali hwanga khu gu thava mufumeli wa Bhabhiloni, mu thusedzedwago khuye; Pfhumu Nungungulu a ngu ganela khuye, mu nga mu thavi, kholu eni nyi nanu, gasi gu mi vbanyisa ni gu mi tshudzisa mandzani gwaye.

¹² Eni nyi na mi pwela wuhindzi, uye nuye mufumeli wa Bhabhiloni a na mi pwela wuhindzi a mi bweledza tigoni gwanu.

¹³ Aholu, mwa gu ganelani, khenu: Kha hi dzini gu khala tigoni momu, mu si yingisi Pfhumu Nungungulu wanu,

¹⁴ ni gu ganelani, khenu: Ahihi, ethu hi naya Egipito, iyo hi na gumba ya wona dzinyimbi, ambari gupwa pundru nya dzinyimbi, ni gu saniseka khu dzindzala,

¹⁵ khu magirelo yoyo, enu mitshaledwa ya na Judha, yingisani magana ya Pfhumu Nungungulu; kholu, Pfhumu Nungungulu nya Tshivba Yatshavbo, Nungungulu wa Israyeli, a ngu ganela kharati, khuye: Mwa gu yeyisani mu hongola Egipito, mu ya luvela iyoyo;

¹⁶ wonani nya gukhenu, matshari mu ma thavago, ma na mi landra tigoni ga Egipito, ni ndzala mu yi thavago, mu na bani muri nayo tigoni ga Egipito, mu naya fela iyoyo.

¹⁷ Gu na gira kharato ga vathu vatshavbo va na gu yeyisago va hongola tigoni ga Egipito, gasi guya luvela iyoyo, va naya mbembiswa khu matshari, ndzala ni mitungu; vbakari gwawe mwalo a na gu vbulugago khu tsayiso nyi na gu wu rumelago.

¹⁸ Kholu Pfhumu Nungungulu nya Tshivba Yatshavbo, Nungungulu wa Israyeli, a ngu ganela kharati, khuye: “Mwa gu hongolani tigoni ga Egipito, guvbisa nya likhulo langu li na thegela vbatshani gwanu kha nga idzo li thegedego khidzo vathu va Jerusalema. Mu na hembuludwa ni gu vadwa khu vathu, mu na khala gilo nya gihegiso, litigo lanu, kha mu na tshuka mu li wona gambe.”

¹⁹ Pfhumu Nungungulu a di engedza gambe a ganela khu kotani yanu enu mitshaledwa ya Judha, khuye: “Mu nga hongolini tigoni ga Egipito. Dzitini nya gukhenu, muhuno nya gu mi laya na nyi tiyiside.

²⁰ Kholu mu dzi girede mwabune libango khu gu nyi rumani nyi mu lombelela ga Pfhumu Nungungulu wathu, khenu: Satshavbo a na gu hi rumago hi embele, hi na si gira.

²¹ Aholu, muhuno nyi mi embedeni satshavbo esi Pfhumu Nungungulu wanu, a nyi rumedego gu mi tivisa, aholu kha mu dzumeli gu yingisa ni gimwegyo nya iso si dugago khu kanani gwangu.

²² Khu guralo, muhuno dzitini nya gukhenu mu na songwani khu matshari, ndzala ni mitungu tigoni mu gu godego guya khala umo.”