Jeremiya 38 - Bhibhiliya Nya Guage

Jeremiya a ngu rinywa namboni

¹ Avbo Sefatiya, mwamana wa Matani, Gedhaliya, mwamana wa Pasuri, Jukali, Mwamana wa Selemiya, ni Pasuri, mwamana wa Malikiya, va ngapwago magana Jeremiya a nga bani na gu huwelela ga vathu vatshavbo, khuye:

² Pfhumu Nungungulu a ngu ganela kharati, khuye: “Wule a na gu simamago gu khala dhoropani momu, a nafa khu gu songwa khu matshari, ndzala ni tungu; aholu uye a na gu dugago a dzi ningela ga Vakalidhiya, a na vbanya; kholu a na vbulugisa womi waye.

³ Pfhumu Nungungulu a ngu ganela kharati, khuye: Lidhoropa leli khu lisine kamwe li na ningedwa mandzani nya mabutho ya mufumeli wa Bhabhiloni, va li sasela.”

⁴ Khavbo avbo, manganagana ma di embela mufumeli, khayo: “Oyu muthu a ngu yela gufa; kholu a ngu vbedza tshivba masotshwa ma tshadego dhoropani momu ni gu rerekisa mandza nya vathu vatshavbo, khu gu ganela magana nya nga aya. Kholu mwama yoyu a gu suvela guvivba litigo leli, wulangani nya gu vbwete gurula.”

⁵ Mufumeli Zedhekiya a di ganela, khuye: “Khu yoyo, womo mandzani gwanu; kholu eni gimwalo gihimbedzo nyi dzi kodzago gu mi girela.”

⁶ Khavbo avbo, va di dzega Jeremiya va mu rinya namboni wa Malakiya, mwamana wa mufumeli, wu nga bani wu romo mu likupakupani nya dzighadhi; va reledza Jeremiya khu dzingodzi; aholu namboni gu diri mwalo mati, vbavbandze nya maraga basi, Jeremiya a diya bhwabhwamela maragani.

⁷ Aholu Ebhedhi-Meleki, thenwa nya Muetiyopi, khu gikhati gyogyo a nga bani a gu thumela nyumbani ga mufumeli, a dipwa gupwani Jeremiya va mu rinyide namboni. Aholu mufumeli a di khade nyangwani ga Bhejami.

⁸ Ebhedhi-Meleki, a di dzegela gu khuga khu ndrangani ga mufumeli aya embela mufumeli, khuye:

⁹ “Ama mufumeli, ni mune wangu, vama vava kha va gira silo nya sadi khiso va nga girelago muprofeti Jeremiya. Avo va di mu rinya namboni; khu lisine uye a nafa khu ndzala wulangani a guromo, kholu dhoropani gumwalo gambe sibaba.”

¹⁰ Khavbo avbo, mufumeli a di leletela Muetiyopi Ebhedhi-Meleki, khuye: “Dzega vama vararu uya navo muya dusa Jeremiya khu namboni, na si gufi khu ndzala.”

¹¹ Khavbo avbo, Ebhedhi-Meleki a di dzega vama a nga bani a gu va ruma a hongola navo ga muhubhe wu manegago khu vbavbatshi nya nyumba nya guvegedzedwe dzithomba nya wufumu, a dzega sitsangala nya dzitshalu a luga ngodzi a si reledza ga Jeremiya namboni.

¹² Muetiyopi Ebhedhi-Meleki, a di embela Jeremiya, khuye: “Dzongedzela sipandre sesi nya myendra vbadzingodzitunu u vbagarisa magatani gwago gasi u si hendrwi khu dzingodzi.” Jeremiya a di gira kharato.

¹³ Khu gulandrela va di ndrindrela Jeremiya khu dzingodzi va mu dusa namboni. Jeremiya a di simama gu khala likupakupani nya dzighadhi.

Jeremiya a ngu girwa siwudziso khu mufumeli

¹⁴ Tshigu mwedo, mufumeli Zedhekiya a di ranisa muprofeti Jeremiya, aya tshangana naye vbalidimbatunu nya mwanya nya wuraru wu belago umo nya Nyumba ya Pfhumu Nungungulu; mufumeli a di embela Jeremiya, khuye: “Gyomo nyi vbwetago gu gu wudzisa, u nga nyi siheli ni gimwegyo.”

¹⁵ Jeremiya a di phindrula mufumeli Zedhekiya, khuye: “Nya gu gu embela lisine khu na nga nyi songa, gani? Ahati nya gu gu laya u na nyi yingisa, gani?”

¹⁶ Khu guralo, mufumeli Zedhekiya a di sambanya ga Jeremiya khu gisihaledza, khuye: “Nyi ngu sambanya khu Pfhumu Nungungulu a vbanyago, mugiri nya hefemulo wathu, gukheni kha nyi na nga gu songa, gambe kha nyi na gu ningela mandzani ga vama vava va vbwetago gu gu songa.”

¹⁷ Khu guralo, Jeremiya a di embela Zedhekiya, khuye: “Pfhumu Nungungulu nya Tshivba Yatshavbo, Nungungulu wa Israyeli, a ngu ganela kharati, khuye: Wa gu ya dzi ningela ga manganagana ya mufumeli wa Bhabhiloni, u na vbanyisa womi wago, ni lidhoropa leli kha li na vbiswa, u na vbanya uwe gumogo ni ngamo yago.

¹⁸ Aholu, wa gumba ya dzi ningela ga vathangeli va mufumeli wa Bhabhiloni, lidhoropa leli li na thegela mandzani ga Vakalidhiya, avo va na li vbisa, uwe khu na vbuluga mandzani gwawe.”

¹⁹ Mufumeli Zedhekiya a di embela Jeremiya, khuye: “Gu ya dzi ningela ga Vakalidhiya nyi ngu thava gu ya tshaniswa khu Vajudha va dzi patanisago ni Vakalidhiya.”

²⁰ Jeremiya a di hakha, khuye: Khu na ningedwa mandzani ga vathu vovo; yingisa magana ya Pfhumu Nungungulu nyi gu embedego; gimwalo gi na gu gu dugelelago ni gu gambe, u na vbanyisa womi wago.

²¹ Aholu, wa gumba dzumela gu ya dzi ningela, gu na dugelela esi Pfhumu Nungungulu a nyi wonisidego.

²² Vanyamayi vatshavbo va na tshalago nyumbani nya wufumu wa Judha, va na dzegwa va ningedwa ga vathangeli va mufumeli wa Bhabhiloni, gasi avo va na ganela, khavo: Dzipari dzile dzago nya dzadi dzi gu kanganyiside, dzi gu pfhadzide. Migondro yago yi pfugunyede maragani; dzipari dzago dzi gu digide.

²³ Khu guralo, vagadzi vago gumogo ni sanana sago va na ningedwa ga Vakalidhiya, uwe nuwe khu na vbuluga mandzani gwawe; aholu u na modwa khu mufumeli wa Bhabhiloni, ni lidhoropa leli uye a na li vbisa khu nilo.

²⁴ Khu guralo, Zedhekiya a di embela Jeremiya, khuye: U nga embeli muthu esi hi ganedego avba, kholu va nga gu songa.

²⁵ Kholu vathangeli va gu dziti gukhavo nyi bhude nago, va nata gu wudzisa, khavo: Hi embele olu esi u bhudego ni mufumeli, wa gumba hi sihela gilo khu na ngafa, hi embele ni esi u nga embedwago khu mufumeli.

²⁶ Khu guralo, u na va embela, khuwe: Nyi di lomba ga mufumeli gukheni a si nyi bweledzi ndrangani ga Jonatane kholu nyi nga yafa.

²⁷ Khu guralo, vathangeli vatshavbo va di ya mu wudzisa, aholu Jeremiya a di hakha kha nga idzo a nga laywa khidzo khu mufumeli; va di mu diga a khala khu gurula, kholu kha nga thuledza gilo.

²⁸ Jeremiya a di simama gu khala likupakupani nya dzighadhi kala guphangwa ga Jerusalema.