Jeremiya 36 - Bhibhiliya Nya Guage

Guvbiswa nya libhuku la Jeremiya khu mufumeli Jowakimi

¹ Khu mwaga nya wu na nya gufume ga Jowakimi, mwamana Josiya, mufumeli wa Judha, Pfhumu Nungungulu a di embela Jeremiya, khuye:

² Dzega libhuku u lova magana yatshavbo nyi gu embedego khu kotani ya Israyeli, Judha ni mambe mayigwana yatshavbo, gukhugela avbo nyi phedego khavbo gu ganela nago, gukhugela matshiguni ya Josiya kala muhuno.

³ “A gu dzina saye, vathu va nyumbani ga Judha va napwa makungo nya dzimhango nyi vbwetago gu va resela, mwendro saye muthu ni muthu a na vbindrugedza ndzilani gwaye nyambasi yadi, nyi kodza gu va tsetselela guvivba ni sighoho sawe.”

⁴ Khavbo avbo, Jeremiya a di rana Bharuki, Mwamana wa Neriya, gasi a lova umo nya libhuku, magana yatshavbo Jeremiya a na gu mu embeledzelago a nga rumedwago khu Pfhumu Nungungulu.

⁵ Khu hwane, Jeremiya a di embela Bharuki, khuye: “Eni nyi khothedwe; kha nyi dzi kodzi gu ya bela Nyumbani ga Pfhumu Nungungulu.

⁶ Indra uwe Nyumbani ga Pfhumu Nungungulu khu litshigu nya guhale, u ya hevbulela vathu vatshavbo va na Judha va na gutago khu madhoropani gwawe, magana ya Pfhumu Nungungulu, ma dugidego khu kanani gwangu nyi nga gu embeledzela, u ma lova.

⁷ A gu dzina saye nombelo wawe wu na vboha mbeli ga Pfhumu Nungungulu, muthu ni muthu a vbindrugedza ndzilani gwaye nya guwegele, kholu likhulo li tivisidwego khu Pfhumu Nungungulu ga vathu vava, likhongolo ngudzu.”

⁸ Bharuki, mwamana wa Neriya, a di gira satshavbo a nga leletedwago khu muprofeti Jeremiya, a va hevbulela magana ya Pfhumu Nungungulu.

⁹ Khu ngima nya livbandre na wu na nya mwaga nya livbandre nya gufume ga Jowakimi, mwamana wa Josiya, mufumeli wa Judha, gu di tiviswa ga vathu vatshavbo va Jerusalema, thetho nya guhale mbeli ga Pfhumu Nungungulu, gumogo gambe ni vathu vatshavbo va nga bani va guta Jerusalema khu madhoropani ya Judha.

¹⁰ Bharuki a di hevbulela vathu vatshavbo magana ya Jeremiya a nga bani a ma lovide libhukuni mule, Nyumbani ga Pfhumu Nungungulu, umo nya muhubhe wa Gemariya, mwamana wa mulovi Safani, umo nya likupakupa nya likhongolo, vbanyangwatunu nya Lidimba nya Liphya la Nyumbani ga Pfhumu Nungungulu, dzindzeveni ga vathu vatshavbo.

¹¹ Mikeya, mwamana wa Gemariya, mwamana wa Safani, na pwide milowo yeyi nya magana ya Pfhumu Nungungulu,

¹² a di hongola nyumbani nya wufumu, umo nya huwo ya mulovi, gu nga bani gu tshanganide manganagana yatshavbo; mulovi Elisama, Dhelaya, mwamana wa Simaya, Elinatani, mwamana wa Akibhori, Gemariya, mwamana wa Safani, Zedhekiya, mwamana wa Hananiya ni dzimbe dzindruna.

¹³ Mikeya a di va pwadzela magana yatshavbo a nga mapwago na ma gu hevbudwa libhukuni khu Bharuki mbeli ga vathu.

¹⁴ Khu guralo, manganagana yatshavbo ma di rumela Jewudhi, mwamana wa Netaniya, mwamana wa Selemiya, mwamana wa Kusi, guya embela Bharuki, khuye: “Dzega libhuku lile u nga hevbulelago vathu, u hi landre.” Bharuki, mwamana wa Neriya, a di dzega libhuku a hongola gwawe.

¹⁵ Va di mu embela, khavo: “Khala u hi hevbulela.” Bharuki a di li hevbula mbeli gwawe.

¹⁶ Avbo va ngapwago magana yatshavbo yale, va di thuruga va khedzisana va embela Bharuki, khavo: “Gu ngu yela gu dzega magana yaya yatshavbo hi ya embela mufumeli!”

¹⁷ Khu hwane, va di wudzisa Bharuki, khavo: “Olu nga hi embela, u loviside kharini magana yaya yatshavbo? Khu Jeremiya a nga gu embeledzelago, gani?”

¹⁸ Bharuki a di hakha, khuye: “Jeremiya a di nyi embeledzela, eni nyi lova bhukuni khu tita.”

¹⁹ Khu guralo, manganagana ma di embela Bharuki, khayo: “Gimbilani mu ya sihala uwe gumogo ni Jeremiya; umo mu ya sihalago gu nga tidwi khu muthu.”

Mufumeli a ngu vbisa libhuku niloni

²⁰ Khu hwane, va di tshiya libhuku nyumbani ga mulovi, Elisama, va bela muhubheni ga mufumeli vbanyangwatunu gwaye, va ya mu bikela yatshavbo magana yale.

²¹ Khu guralo, Mufumeli a di rumela Jewudhi guya dzega libhuku nyumbani ga mulovi Elisama, a wuya nalo li ta hevbudwa mbeli ga mufumeli ni ga manganagana yatshavbo ma nga bani ma randrede mufumeli.

²² Kha nga a nga bani nari vbagirametunu, mufumeli a di khade nyumbani a wora nilo, kholu a diri ngima nya livbandre na wu na.

²³ Gikhati ni gikhati Jewudhi a nga bani na gu vbedza gu hevbula malangalila mararu mwendro mana, mufumeli a di ma pila khu ngala wa mulovi a ma rinya gikhoni nya nilo, mavbya kala libhuku latshavbo li vbela khu guvbya.

²⁴ Mufumeli ni manganagana yaye, ambari avbo va ngapwago magana yaya, kha va thurugiswa khayo va pferula dzingandzu dzawe va lila.

²⁵ Ambari khu gilombo gya Elinatani, Dhelaya ni Gemariya va nga khongotela mufumeli gukhavo a si vbisi libhuku, uye kha nga va yingisa.

²⁶ Gu diga nya isoso, mufumeli a di ninga nayo ga Jerameyeli, mwamana wa Hameleki, ni Seraya, mwamana wa Aziriyeli, ni Selemiya, mwamana wa Abhidheyeli, guya mola mulovi Bharuki, ni muprofeti Jeremiya; aholu Pfhumu Nungungulu a di va sihide.

²⁷ Hwane nya gu bani mufumeli na vbiside libhuku, li nga bani na li gu lovidwe khu Bharuki, magana yatshavbo ya Pfhumu Nungungulu, na ma gu dugela kanani ga Jeremiya, Pfhumu Nungungulu a di embela Jeremiya, khuye:

²⁸ “Dzega limbe libhuku u lova gambe momo magana yatshavbo ma nga bani ma lovidwe ga libhuku li vbisidwego khu Jowakimi, mufumeli wa Judha.”

²⁹ U na embela Jowakimi, mufumeli wa Judha, khuwe: Pfhumu Nungungulu a ngu ganela kharati, khuye: Uwe u vbiside libhuku khu gukhuwe: Khu ginani u lovidego umomo gukhuwe mufumeli wa Bhabhiloni a nata sasela litigo leli, a vbedza vathu ni sirengo saye?

³⁰ Khu guralo, Pfhumu Nungungulu a ngu ganela kharati khu kotani ya Jowakimi, mufumeli wa Judha, khuye: Mwalo ni moyo nya gitugulwana gyago a na gu khalago vbagikhalotunu nya wufumu wa Dhavhidhe, sirumbi sawe si na dzudzugwa sivbya khu lihani vbamihanitunu ni gu banga khu girame vbawutshigutunu.

³¹ Nyi na tsayisa uye gumogo ni livelego laye, ni sithumi saye; nyi na thesa vbatshani gwawe, ga vathu va Jerusalema, ni vathu va Judha, dzimhango dzatshavbo nyi va tivisidego gu dzi resa, va si khathali khu gu nyi yingisa.

³² Jeremiya a di dzega limbe libhuku a li ningela ga mulovi Bharuki, mwamana wa Neriya, Jeremiya a di mu embeledzela gambe magana yatshavbo ma nga bani ma lovidwe libhukuni nya guhegule eli li nga vbiswago khu Jowakimi, mufumeli wa Judha. Ma engedzedwa gambe mambe mahungu nya gutale ma fananago naya nya guhegule.