Jeremiya 34 - Bhibhiliya Nya Guage

Zedhekiya a ngu kawukwa

¹ Pfhumu Nungungulu a di resa magana yaya ga Jeremiya, gikhati Nebhokadhonosori, mufumeli wa Bhabhiloni, a nga bani a guta ni masotshwa yaye yatshavbo gumogo ni mifumo yastshavbo ni mafumbu ya mafuni ma nga bani ma fumedwa khuye, ma ta dhumela Jerusalema gumogo ni madhoropa yaye yatshavbo, a ganela, khuye:

² Pfhumu Nungungulu wa Israyeli, a ngu ganela kharati, khuye: Indra u ya embela Zedhekiya, mufumeli wa Judha, khuwe: Pfhumu Nungungulu a ngu ganela kharati, khuye: Nyi ngu ningela lidhoropa leli mandzani ga mufumeli wa Bhabhiloni, uye a na li vbisa khu nilo.

³ Uwe, khu na nga vbuluga, aholu u na modwa u ningedwa mandzani gwaye. Uwe kamwe u na wona mufumeli wa Bhabhiloni khu maho yago, uye a na ganela nago khovbe ni khovbe. Uwe u na yiswa Bhabhiloni.

⁴ Ambari khu guralo, uwe Zedhekiya, mufumeli wa Judha, yingisa magana ya Pfhumu Nungungulu. Pfhumu Nungungulu a ngu ganela kharati khu kotani yago, khuye: Uwe khu na songwa khu litshari,

⁵ aholu u nafa khu gurula, u na dzingwa khu gu vbisedwa mafura nya gunungele ni libani kha nga idzo va nga giredwago khidzo vavelegi vago, vafumeli va gu thangedego, va fumidego gale nu si gu velegwi, va na gu lila, va ganela, khavo: Yowe! Pfhumu! Kholu kheni nyi tumbisago isoso, a ngu ganela Pfhumu Nungungulu.

⁶ Muprofeti Jeremiya, a diya tivisa yatshavbo magana yaya ga Zedhekiya, mufumeli wa Judha;

⁷ avbo masotshwa ya mufumeli wa Bhabhiloni ma nga bani na ma nga gu sasela lidhoropa la Jerusalema, gumogo ni gu sasela mambe madhoropa ma nga bani ma tshade ya Judha, a gu Lakisi ni Azeka, kholu madhoropa yaya khayo basi ma nga bani ma tshade ga madhoropa nya makhokhola ya Judha.

Gutshudziswa nya dzikhumbi

⁸ Pfhumu Nungungulu a di bwelo khavbo a embela Jeremiya, hwane nya gu mufumeli Zedhekiya na giride gidzumeledzwano ni vathu vatshavbo va nga bani varomo Jerusalema, gasi gu huwelela gutshudziswa nya dzikhumbi, khuye:

⁹ Vatshavbo va yede gutshula dzikhumbi dzawe nya Vahebheru, nya vama nidzo nya vanyamayi; mwalo a yelago gu gira khumbi ndriyaye nya Mujudha.

¹⁰ Manganagana gumogo ni vathu vatshavbo va nga hungago gidzumeledzwano gegi nya gutshudzise dzikhumbi, va di nengela khu nayo yoyu, va dzumela gu dzi tshula va si dzi khozisi gambe; khu guralo, muthu ni muthu a di tshula khumbi yaye.

¹¹ Aholu, khu hwane nya gikhati, va di dzi laya, va rumela gu wuyisa gambe dzikhumbi dzawe nya vama ni vanyamayi va nga bani va dzi tshude, vata pheledza gu dzi khozisa.

¹² Khu guralo, gu dita lito ga Jeremiya khu ga Pfhumu Nungungulu, khilo:

¹³ Pfhumu Nungungulu wa Israyeli, a ngu ganela kharati, khuye: Eni nyi giride gidzumeledzwano ni vababe vanu avbo nyi nga va dusago khu tigoni ga Egipito, tigoni nya wugumbi, kheni.

¹⁴ Hwane nya livbandre na mivili myaga, muthu ni muthu a ngu yela gu tshula ndriyaye nya Muhebheru nga rengisedwago, na gu thumede livbandre na moyo myaga, u ngu yela gu mu tshula. Aholu, vababe vanu kha va nyi yingisa, ambari gu khathala.

¹⁵ Enu mu di vbindrugedzide mu gira iso si lulamidego mbeli gwangu, khu gu tshulani wugumbini vandriyanu, kha nga gu landrisa gidzumeledzwano mu giridego mbeli gwangu nyumbani gu khozedwago lina langu;

¹⁶ aholu mu vbindrugedzide mawonelo, mu nyenyezisa lina langu khu gu muthu ni muthu a dzega khumbi yaye nya mwama mwendro nya nyamayi mu nga bani mu va tshude mu bwelo khavbo mu va gira gambe dzikhumbi.

¹⁷ Khu guralo, Pfhumu Nungungulu a ngu ganela kharati, khuye: “Enu kha mwa nyi yingisani gu tshula vandriyanu muwugumbini. Olu eni Pfhumu Nungungulu, nyi ngu mi embelani gukheni nyi na mi tulelani dzinyimbi dzi ta mi sasela khu matshari, mitungu ni dzindzala; mu na khala gihegiso vbakari nya mifumo yatshavbo ya mafuni.

¹⁸ Vathu vatshavbo va hambanisidego gidzumeledzwano gyangu ni gu sayisa sileletelo va hungidego mbeli gwangu; va kabanisa gimombyana khu sipandre sivili, va vbindra khu vbakari nya sipandre saye;

¹⁹ vathangeli va Judha ni va Jerusalema, mithenwa ni vaphasi nya mhamba, ni vathu vatshavbo va tigoni va vbindridego khu vbakari nya gimombyana,

²⁰ nyi na va ningela mandzani ga valala vawe ni ga vatshavbo va vbwetago gu va sasela, sirumbi sawe nyi na si ningela si khala guhodza nya sinyoni sa damboni ni sirengo sa khabini.

²¹ Nyi na ningela Zedhekiya, mufumeli wa Judha, gumogo ni dzindruna dzaye, mandzani ga valala vaye, ni ga vale va vbwetago gu mu songa, ni mandzani ga masotshwa ya mufumeli wa Bhabhiloni, ambari olu ma ngarigu gu khuga khavbo gwanu.

²² Wonani gukhenu nyi na mi ninga nayo, a ngu ganela Pfhumu Nungungulu. Nyi na va gira va wuya gambe dhoropani momu, va nata li sasela ni gu li wandra va li vbisa, madhoropa ya Judha, ma na vbindrugedza ma khala marumbi, avbo nyamba manega ni muthu nya gukhale umo.”