Jeremiya 33 - Bhibhiliya Nya Guage

Gitumbiso nya gurule ni guandra

¹ Jeremiya na ngari pasoni, lito la Pfhumu Nungungulu li dita khu gikhati nya wuvili, likupakupani nya lipaso li ta mu embela, khilo:

² Pfhumu Nungungulu a girago silo sesi, Pfhumu Nungungulu a wumbago esi gasi gu si tiyisa, lina laye a gu uye Pfhumu Nungungulu, a ngu ganela kharati, khuye:

³ Nyi rane, eni nyi na gu ninga phindrulo, nyi na gu tivisa silo si sihadego, esi u si sitigo.

⁴ Kholu Pfhumu Nungungulu wa Israyeli, a ngu ganela kharati khu kotani nya dzinyumba dza dhoropani momu, ni kotani nya dzinyumba dza vafumeli va Judha, dzi nga khungumudwago khu gu fela gu gira mabhiyo nya gu dzi vhikele gusasedwa khu matshari.

⁵ Va bela khumo gasi gu dwana ni Vakalidhiya, gasi nyi li tadza khu sirumbi nya vathu nyi va songidego khu likhulo langu, avo nyi va sihedego khovbe yangu khu kotani nya sighoho va giridego dhoropani momu.

⁶ Nyi na hungelela silondra sawe, nyi va vbodzisa ni gu va vbanyisa, nyi bwelo khavbo nyi va ninga gurula nya gungi ni lisine.

⁷ Va na Judha ni va na Israyeli, nyi na va wuyisa khu wugumbitunu, nyi ta va vbahedza kha nga guhegulani.

⁸ Nyi na va handza sighoho satshavbo va nyi ghohedego, nyi va tsetselela guvivba gwawe gwatshavbo va nga nyi wugelago khugo.

⁹ “Dhoropani momu ga Jerusalema gu na khala ni lina nya gutsake, wuzundzo ni wudhumo, mbeli nya mayigo yatshavbo ya mafuni ma na gu pwago makategwa yatshavbo nyi na gu girelago, va na liwuga ni gusamala khu gu wona makategwa ni thomba nyi na gu ningago.”

¹⁰ Pfhumu Nungungulu a ngu ganela kharati, khuye: Wulanga wowu mu wu ranago khenu giwula nyamba khadwa khu muthu ambari sirengo, khu guralo, madhoropani ya Judha ni dzindzilani ga Jerusalema, gu ghohetedwego nyamba manega muthu ambari gu khadwa khu vathu ni sirengo, gu nga na gu pwala gambe

¹¹ malito nya gutsake ni gunengela, malito ya mudzegi ni ya oyu a dzegwago, malito ya vale va resago miningelo nya gubonge, na va gukhavo: Rungudzani Pfhumu Nungungulu, nya Tshivba Yatshavbo, kholu uye khwadi, wuhindzi waye wu ngu simama kala gupindruga; ni malito ya avo va resago rungudzo Nyumbani ga Pfhumu Nungungulu; kholu, nyi na va wuyisa khu wugumbitunu va wuya tigoni vata khala kha nga guhegulani, a ngu ganela Pfhumu Nungungulu.

¹² Pfhumu Nungungulu nya Tshivba Yatshavbo, a ngu ganela kharati, khuye: “Wulanga wowu wu gu giwula, nyambana vathu ambari sirengo, madhoropani gwawe gwatshavbo, gu nga na gu manega lizumbo avbo vahavisi va na gu hefemulago avbo ni mitshambi yawe.

¹³ Madhoropani ya sigomoni ni ya mapanini, madhoropani ya Marandzi, ni ya tigoni ga Bhejami, ni wubambe nya lidhoropa la Jerusalema, ni madhoropani ya Judha, yi nga na gu simama gu vbindra gambe mitshambi khu mandzani ga vahavisi, a ngu ganela Pfhumu Nungungulu.”

¹⁴ Ma nguta matshigu, a ngu ganela Pfhumu Nungungulu, avbo nyi na gu tadzisago magana nya yadi nyi tumbisidego ga nyumba ya Israyeli ni nyumba ya Judha.

¹⁵ Khu matshigu yoyo ni ga gikhati gyogyo, nyi na bugisa khu ga Dhavhidhe; pfhundre nya wululamo; uye a na lamula litigo khu gululama ni lisine.

¹⁶ Khu matshigu yoyo, Judha a na vbanyiswa, Jerusalema a na vbanya na tiyide, eli khu lina va na mu ranago khilo, khavo: “Pfhumu Nungungulu khuye Gululama Gwathu.”

¹⁷ Kholu Pfhumu Nungungulu a ngu ganela kharati, khuye: “Gima kha gu na hamugega muthu a na gu khalago vbagikhalotunu nya wufumu wa Dhavhidhe nya gudugele nyumbani ga Israyeli,

¹⁸ ambari gu hamugega muphasi nya mhamba nya lidzaha nya gudugele nyumbani ga Levhi, gasi gu ema mbeli gwangu a simama gu ningela miphaso nya guvbiswe, ni guvbisa miningelo nya dzimbewu, a gira dzimhamba matshigu yatshavbo.”

¹⁹ Pfhumu Nungungulu a di embela Jeremiya, khuye:

²⁰ Pfhumu Nungungulu a ngu ganela kharati, khuye: Mwa gu dzi kodza gu hambanisa gidzumeledzwano gyangu nya mihani, mwendro gu hambanisa gidzumeledzwano gyangu nya wutshigu, gasi gu si manegi wutshigu ni mihani khu gikhati gyaye,

²¹ kharato gambe gu na kodzega gu hambanisa gidzumeledzwano gyangu ni Dhavhidhe, githumi gyangu, khu magirelo yoyo, gasi khu melegoni gwaye gu si manegi gambe gitugulwana nya gukhale vbagikhalotunu gwaye nya wufumu; gambe gu di hadza gu hambaniswa gidzumeledzwano gyangu ni va na Levhi, a gu vaphasi nya mhamba, va nyi thumelago.

²² Livelego la githumi gyangu Dhavhidhe, ni la va na Levhi va nyi thumelago, nyi na va gira va tala kha nga dzinyeledzi dza ndzadzini, ni fungo wa phwani nyamba pimwa.

²³ Pfhumu Nungungulu a di embela Jeremiya, khuye:

²⁴ “Uwe u ngu wona nya gukhuwe vathu vava va ngu ganela, khavo: Pfhumu Nungungulu a pfhurarede mafumbu yaya ya mavili a ma hathidego, gani? Va gu hega vathu vangu, va gira gukhwatshi vathu va nga bani vari mwalo litigo mbeli gwawe.”

²⁵ Pfhumu Nungungulu a ngu ganela kharati, khuye: Gidzumeledzwano gyangu nya mihani ni wutshigu gya gumba simama, eni nyi si vegi milayo yi fumago ndzadzini ni mafuni,

²⁶ nyi na pfhurarela gambe livelego la Jakobe ni githumi gyangu Dhavhidhe, nyi si vegi livelego la Dhavhidhe li fuma nyumbani ga Abrahama, Isaki ni Jakobe; aholu, nyi na va pwela wuhindzi nyi va wuyisa khu wugumbitunu vata khala tigoni gwawe.