Jeremiya 30 - Bhibhiliya Nya Guage

Guvbahedzwa ga Israyeli

¹ Magana ma nga ta khu ga Pfhumu Nungungulu ga Jeremiya a mu embela, khuye:

² Pfhumu Nungungulu wa Israyeli, a ngu ganela kharati, khuye: Lova libhukuni magana yatshavbo yaya nyi gu embedego.

³ Kholu Pfhumu Nungungulu a ngu ganela, khuye: “Wona, ma nguta matshigu nyi na gu kategisago vathu vangu va na Israyeli ni va na Judha; nyi na va wuyisa tigoni nyi ningidego vababe vawe, gasi va li fumela.”

⁴ Khayo aya magana Pfhumu Nungungulu a ma ganedego mayelano khu Israyeli ni Judha:

⁵ Pfhumu Nungungulu a ngu ganela kharati, khuye: Hi dipwa huwa nya guthurugise, vathu va dindrendremela gu si manegi gurula.

⁶ Wudzisani ni gu wona, ina mwama a ngu dzi kodza gu lumwa, gani? Khu ginani nyi wonago vama vatshavbo va dzi pharago sirumbu gukhwatshi khu nyamayi a lumwago? Khu ginani dzikhovbe dzawe dzatshavbo dzi thuvigidego?

⁷ Yowe! Litshigu lile li thiside ngudzu, li mwalo limbe nya gufanane nalo! Gu na bani nari gikhati nya gutshaniseke ga Jakobe; ambari khu kharalo, uye a na vbuluga ga ilo.

⁸ Pfhumu Nungungulu nya Tshivba Yatshavbo, a ngu ganela, khuye: “Khu litshigu lolo, nyi na fanya kanga wu lemelago dzithamoni gwawe, nyi kavila ni dzingodzi dzakone; vathu vava gima kha va na nga khala gambe dzikhumbi dza va nya mayigo.”

⁹ “Va na thumela Eni Pfhumu Nungungulu wawe, va thumela gambe Dhavhidhe, mufumeli wawe, uye nyi na gu mu hathago vbakari gwawe.”

¹⁰ Khu guralo, u nga thavi uwe githumi gyangu, Jakobe, gambe u nga vbeli tshivba uwe Israyeli; kholu nyi na mi vbulugisa mayigoni ga hwindzo, nyi na mi wuyisa gumogo ni melego wanu khu tigoni nya wugumbi; Jakobe a na wuya ata khala na tangade ni gurula; gambe kha na manega muthu nya gu mu thusedzele.

¹¹ Kholu, Eni Pfhumu Nungungulu nyi ngu ganela gukheni, nyi nago gikhati gyatshavbo gasi gu gu vbulugisa; nyi na sasela mayigo yatshavbo nyi nga bani nyi mi phalalegisede umo; aholu enu, kha nyi na diga gu mi tsayisa, gambe kha nyi na mi tsayisa khu tshivba, kholu kha nyi vbweti gukheni mu mbemba.

¹² Pfhumu Nungungulu a ngu ganela kharati, khuye: “Mbanga yago yikhongolo, kha yi vboli ni gilondra gyago khya gimange.

¹³ Mwalo ni moyo a khathalago khuwe; ni gilondra gyago gi mwalo rendre nya gu gi vbodzise, ambari gu gi hungelela.

¹⁴ Vatshavbo avo u nga bani u gu haladzana navo olu va gu divade, kha va wudzisi gambe khuwe; kholu nyi gu bayiside kha nga idzo nyi bayisago khidzo nala, nyi gu ningide tsayiso nya guthise, kholu guvivba gwago gukhongolo ngudzu ni sighoho sago singi ngudzu.

¹⁵ Khu ginani u wombago huwa khu kotani nya gilondra gyago? Madwali yago kha ma halawugi. Khu kotani nya wuvivbi wago nya wukhongolo ni gutala nya sighoho sago, nyi gu girede silo sesi.

¹⁶ Ambari ulo, vatshavbo vale va na gu saselago, Eni neni nyi na va sasela; valala vago vatshavbo va na yiswa wugumbitunu; avo va na gu gu belago, avo navo va na bedwa, ni avo va na gu phangago va na phangwa navo.

¹⁷ Kholu nyi na wusedza womi wago ni gu hawulugisa dzimbanga dzago, a ngu ganela Pfhumu Nungungulu; khu guralo, va na gu riya lina nya gupwani, muhudwa na va gu ganela, khavo: Siyoni kha khathaledwi gambe khu muthu.”

Mufumo wa Jakobe wu na wusedzwa

¹⁸ Pfhumu Nungungulu a ngu ganela kharati, khuye: “Nyi na wusedza mitshatsha ya na Jakobe, ni gu pwela wusiwana dzindranga dzawe; lidhoropa li na vbahedzwa vbatshani nya marumbi yaye ni nyumba nya mufumo yi na vbahedzwa gu fanana ni idzo yi nga bani yi romo khidzo khu gale.

¹⁹ Gu na pwala dzindzimo nya gubonge ni mikulungwane nya gutsake; nyi na va gira va velegela va tala, gima kha va na nga vbungudwa gambe; nyi na va ninga wuzundzo, gima kha va na nga theswa gambe vbavbatshi.

²⁰ Sanana sawe si na katega kha nga guhegulani, ni tshangano wawe wu na tiyiswa mbeli gwangu; kholu nyi na tsayisa vatshavbo vale va nga bani va va tshanisa.

²¹ Moyo wawe a na khala muthangeli, vbakari gwawe a na duga mufumeli, nyi na mu ranisa, uye a na hidzimela vbafuvbi gwangu; kholu khu mani a na tiyelago gu vboha vbafuvbi gwangu? A ngu ganela Pfhumu Nungungulu

²² Enu mu na bani muri vathu vangu, ni Eni nyi na bani nyiri Nungungulu wanu.”

²³ Likhulo la Pfhumu Nungungulu li ngu wonega kha nga phuvbo nya gingulu, li tshiga hungoni ga vathu nya guvivbedwe khu myonyo.

²⁴ Likhulo la Pfhumu Nungungulu kha li na bwelela hwane, na li si gu thumi ni gu tadzisa gugola nya monyo waye; guhegisani nya matshigu, esi mu na si pimani.