Jeremiya 27 - Bhibhiliya Nya Guage

Jeremiya a ngu laya vathu gu ya thumela mufumeli wa Bhabhiloni

¹ Guphelani nya gufume gwa Zedhekiya, mwamana wa Josiya, mufumeli wa Judha, magana ya Pfhumu Nungungulu ma rumedwe ga Jeremiya khu dzindzila dzedzi, khuye:

² Pfhumu Nungungulu a nyi leletede kharati, khuye: “Dzi girele kanga ni lidzoke u hunga thamoni.”

³ Khu hwane u na si rumela ga mufumeli wa Edhomi, wa Mowabhi ni ga va na Amoni, ga mufumeli wa Tiro ni wa Sidhoni, na ma gu vbelegedzwa khu sirumwa sa mufumeli si tago khu Jerusalema gasi guya wonana ni Zedhekiya, mufumeli wa Judha.

⁴ Pfhumu Nungungulu nya Tshivba Yatshavbo, Nungungulu wa Israyeli, a di ganela kharati, khuye: U na va embela va yisa magana yaya ga vamune vawe va ya va embela, khavo:

⁵ Eni nyi giride khu tshivba nya libogo langu, nyi vanga litigo, vathu ni sirengo si wonegago tigoni, nyi ngu si ningela ga wule nyi mu golago.

⁶ Olu eni nyi ningede mayigo yatshavbo yaya mandzani ga githumi gyangu Nabhukodhonosori, mufumeli wa Bhabhiloni; nyi mu ningide gambe ni sirengo sa khabini, gasi si mu thumela.

⁷ A na thumedwa khu vathu nya mayigo yatshavbo, uye, sanana saye gumogo ni situgulwana saye, kala gu vboha gikhati mayigo nya mangi ni mifumo nya yikhongolo yi na mu girago khumbi.

⁸ Pfhumu Nungungulu a di ganela kharati, khuye: Litigo mwendro mufumo wu na gumba dzumela gu khoza ga Nabhukodhonosori, mufumeli wa Bhabhiloni, litigo lolo nyi na li bayisa khu litshari, khu ndzala mwendro tungu, kala a va fuvisa khu mandza yaye.

⁹ Khu guralo, mu nga yingiseni vaprofeti vanu, valoli vanu nya dzisolo, valori vanu nya dzindroro, dzinyanga dzanu gumogo ni va nya gufemba ni va nya wuloyi vanu, va gu ganela gwanu, khavo: Mu nga thumelini mufumeli wa Bhabhiloni.

¹⁰ Kholu va gu mi embela malipha, gasi mu vbagedwa mu yiswa hwindzo ni litigo lanu, gasi Eni nyi na mi phalalegisa tigoni gwanu mu mbembisedwa muphelo.

¹¹ “Aholu litigo li na gu dzumelago gu khoza ga mufumeli wa Bhabhiloni ni gu mu thumela, nyi na li diga li khala tigoni gwawe, a ngu ganela Pfhumu Nungungulu, li na dzi limela ni gu dzi vbahela dzindranga.”

¹² Mahungu yaya ma gu fanana nayo nya guhegule nyi ganedego ni Zedhekiya, mufumeli wa Judha, nyi nga mu embela, kheni: “Dzumelani gu hungwa kanga khu mufumeli wa Bhabhiloni, mu mu thumelani uye gumogo ni vathu vaye, gasi mu kodze guvbanya.

¹³ Khu ginani u na gufago uwe gumogo ni vathu vago, khu nyimbi, ndzala ni mitungu, nga idzo a ganedego khidzo Pfhumu Nungungulu khu mahungu nya litigo li na gumba thumela mufumeli wa Bhabhiloni?

¹⁴ Mu nga tshuki mu yingisa magana ya vaprofeti va mi embelago, khavo: Mu nga thumeli mufumeli wa Bhabhiloni, kholu malipha va ganelago.

¹⁵ Kholu Pfhumu Nungungulu wari, khuye: Khandri eni nyi va rumidego, avo va gu profeta malipha khu lina langu, gasi Eni nyi mi phalalegisa mu mbemba enu gumogo navo va profetago isoso.”

¹⁶ Nyi di ganela gambe ni vaphasi nya mhamba gumogo ni vathu vatshavbo nyi va embela, kheni: Pfhumu Nungungulu a ngu ganela kharati, khuye: “Mu nga yingisini magana ya vaprofeti vanu va mi embelago, khavo: Sombo sa Nyumbani ga Nungungulu si na wuya nugunugu khu Bhabhiloni; kholu avo va gu profeta malipha.”

¹⁷ “Mu nga va yingisi, thumelani mufumeli wa Bhabhiloni mu na vbanya; khu ginani mu vbwetago gukhenu lidhoropa leli li khala marumbi?”

¹⁸ Avo a gu bani na vari vaprofeti, va rumedwego khu Pfhumu Nungungulu na vari ni mahungu yaye, va na lombelele ga Pfhumu Nungungulu nya Tshivba Yatshavbo, gasi sombo si tshadego Nyumbani gwa Pfhumu Nungungulu, ni nyumbani ga mufumeli wa Judha, ni Jerusalema, si si dzegwi si yiswa Bhabhiloni.

¹⁹ Kholu Pfhumu Nungungulu nya Tshivba Yatshavbo a ngu ganela khu mahungu nya madingo, ni mbiya nya yikhongolo nya sugu, ni mawundru nya giluvelo gumogo ni simbe sombo si tshadego dhoropani,

²⁰ esi Nabhukodhonosori, mufumeli wa Bhabhiloni, a ngamba si dzega gikhati a nga vbagela Jekoniya, mwamana wa Jowakimi, mufumeli wa Judha, khu Jerusalema a mu yisa Bhabhiloni, gumogo ni vatshavbo vathu nya guthavisege va Jerusalema.

²¹ Lisine, Pfhumu Nungungulu nya Tshivba Yatshavbo, Nungungulu wa Israyeli, a ngu ganela kharati khu mahungu nya sombo si nga tshalago Nyumbani ga Pfhumu Nungungulu niso si nga tshalago nyumbani ga mufumeli wa Judha, Jerusalema:

²² “Si na dzegwa si yiswa Bhabhiloni, si naya khala iyo kala litshigu Eni nyi na guya si dzegago, a ngu ganela Pfhumu Nungungulu; khavbo avbo, nyi naya si dzega nyi si wuyisa wulanga wowu.”