Jeremiya 24 - Bhibhiliya Nya Guage

Giwoniso nya situndru sivili nya dzindzawa

¹ Pfhumu Nungungulu a di nyi yeyedza situndru sivili nya gutale khu dzindzawa na si vegidwe Nyumbani gwa Pfhumu Nungungulu, hwane nya gu Nabhukodhonosori, mufumeli wa Bhabhiloni, na vbagede Jekoniya, mwamana wa Jowakimi, mufumeli wa Judha, gumogo ni dzindruna dza Judha, ni vameseri, ni vabethi nya dzisimbi dza Jerusalema, a va yisa wugumbini Bhabhiloni.

² Ndrani nya gitundru gu diromo dzindzawa nya dzadi ngudzu, nya gufanane ni dzindzawa dzi phelago khidzo gu vidzwa; ni gimbe gitundru, gi diri ni dzindzawa nya guvave, nyamba yela gu hodzwa.

³ Khavbo avbo, Pfhumu Nungungulu a di nyi wudzisa, khuye: “Jeremiya, gasi ginani u gi wonago?” Eni nyi di mu hakha, kheni: “Nya gu wona dzindzawa nya dzadi ngudzu, ni dzindzawa nya guhine nyamba yela gu hodzwa khu muthu.”

⁴ Khavbo avbo, Pfhumu Nungungulu, a di nyi resela magana yaya a nyi embela, khuye:

⁵ “Pfhumu Nungungulu wa Israyeli, a ngu ganela kharati, khuye: Kha nga u wonago dzindzawa dzedzi nya dzadi, nyi na gira gambe kharati ga vathu va vbagedwego va na Judha, va yiswa wugumbini nyi nga va yisago tigoni nya Vakalidhiya, hwindzo ni wulanga wowu, Eni nyi na va sayisa gwadi va fanana ni dzindzawa dzedzi.”

⁶ Nyi na va khedza khu maho nya wuhindzi nyi va wuyisa tigoni momu; nyi na va tiyisa gima kha nyi na va pfhungumula, nyi va tsitsa, aholu gima kha nyi na va sigula.

⁷ Nyi na va ninga monyo nya gu nyiti gukhavo eni kheni Pfhumu Nungungulu; avo va na khala vathu vangu, eni nyi na khala Nungungulu wawe; kholu va na wuya avbo gwangu khu monyo wawe watshavbo.

⁸ Gufanana ni dzindzawa nyamba yela gu hodzwa, khu kotani nya guvave nya idzo, a ngu ganela Pfhumu Nungungulu; kharato nugo, nyi na ningela Zedhekiya, mufumeli wa Judha, ni dzindruna dzaye ni vathu va Jerusalema, avo va nga tshalago tigoni momu, ni vale va nga ya vbanyago tigoni ga Egipito.

⁹ Nyi na va gira gilo nya gisamadziso ni guthisa, ga mifumo yatshavbo ya mafuni nyi na gu va phalalegiselago umo, va na khala gihegiso ni givalo malangani yatshavbo.

¹⁰ Nyi na va wusela dzinyimbi, ndzala ni mitungu, kala va vbela vatshavbo havo bhi, gasi gu si tshali ni moyo ga litigo nyi nga ningago avo ni vababe vawe.