Jeremiya 22 - Bhibhiliya Nya Guage

Gitiviso ga mufumeli wa Judha

¹ Pfhumu Nungungulu a ngu ganela kharati, khuye: Relela nyumbani ga mufumeli wa Judha, u ya mu tivisa magana yaya, khuwe:

² Uwe mufumeli wa Judha, u khalago vbagikhalotunu nya wufumu wa Dhavhidhe, yingisa magana ya Pfhumu Nungungulu, uwe, manganagana yago, gumogo ni vathu vago mu belago khu myanya yeyi.

³ Pfhumu Nungungulu a ngu ganela kharati, khuye: Lamulani vathu khu nongameto ni gululama, vale va wandredwego silo sawe, va tshudziseni ga avo va va tshanisago; mu nga tshanisini muluveli, noni, ambari gisiwana; mu nga girini wughevenga, ambari gu vbaladzani novba nyambana nandru wulanga wowu.

⁴ Kholu mwa gu landrisa khu lisine magana yaya, vale va lumbwago khu mufumo wa Dhavhidhe, va na simama gu bela khu dzinyangwa nya nyumba yeyi nya wufumu, na va khilede dzikareta ni dzikavalu, avo, sithumi sawe gumogo ni vathu vawe.

⁵ Aholu, mwa gumba yingisa magana yaya, Eni Pfhumu Nungungulu, nyi ngu sambanya khu lina langu gukheni, ndranga yeyi yi na vbindrugedza yi khala marumbi.

⁶ Kholu Pfhumu Nungungulu a ngu ganela kharati, mayelano khu ndranga ya mufumeli wa Judha, khuye: “Uwe avbo gwangu wa gu fanana ni gigomo gya Gileyadhi, u nyi tsakisa gu fanana ni gigomo gya Libhanoni; aholu nyi ngu sambanya gukheni nyi na gu vbindrugedza u khala giwula, lidhoropa nyamba khadwa khu muthu.”

⁷ “Kholu nyi na gu rambela vasaseli, moyo ni moyo a na phara matshari yaye, va nata pila misimbo yago nya wumburi nya sedhari, va yi rinya niloni.”

⁸ “Mayigo nya mangi ma na vbindra khu dhoropani momu, va na embeledzana khu gyawe, khavo: Gasi khu ginani Pfhumu Nungungulu a giridego esi ga lidhoropa leli nya likhongolo?”

⁹ Khavbo avbo, va na ningwa phindrulo, pwani: “Kholu va nga diga gidzumeledzwano va hungidego ni Pfhumu Nungungulu wawe, va ya khozela vambe vanungungulu ni gu va thumela.”

Gitiviso ga Salumi, mufumeli wa Judha

¹⁰ Mu nga lili khu mufumeli Josiya a fudego, ambari gu mu wombela dzihuwa; aholu lilani khu wule a khugago, kholu kha na wuya gambe, uye kha na nga li wona gambe litigo a velegedwego umo.

¹¹ Kholu Pfhumu Nungungulu a ngu ganela kharati mayelano khu Salumi, mwamana wa Josiya, mufumeli wa Judha, uye a nga fumago wulangani wa babe waye Josiya, a khugidego khu wulanga wowu, khuye: “Uye gima kha na nga wuya gambe.

¹² Aholu wulangani va mu vbagedego umo a naya fela iyoyo, gima kha na nga wuya a ta wona gambe litigo leli.”

Gitiviso ga Jowakimi

¹³ Libango ga uye a dzi vbahelago nyumba khu wukanganyisi, a yi andrisa nyambana nayo, a thumisago vakwawe nyamba va hakhisa, a si va ningi tshatshazelo nya thumo wawe;

¹⁴ A ganela, khuye: “Nyi na dzi vbahela nyumba nya yikhongolo yi gu ni mihubhe!” A yi thela sihogo nya sikhongolo, a yi ambagisa khu mapulango nya sedhari, ni gu yi pendra khu tita nya gufuvile.

¹⁵ Ina u na fuma kholu u gu ni misedhari nya yingi yi na gu gu gira mufumeli, gani? Ina khu dziti nya gukhuwe babe wago hodzide ni gu sela, kholu a nga lamula khu gululama ni lisine, gani? Khu guralo, uye satshavbo si di mu dugela gwadi.

¹⁶ Uye a di vhikela sisiwana ni vahamugi; khu magirelo yoyo, uye a di katega; khu guralo, Pfhumu Nungungulu a ngu ganela khuye, ina khandriso esi si ganedwago pwani u ngu nyiti, gani?

¹⁷ Aholu, maho ni monyo wago, ma gu vbweta gu wona basi gu tsakiswa khu dzithomba, ni gu vbaladza novba wu gu mwalo nandru, ni gu fuma vathu khu dzihanyi ni wughevenga.

¹⁸ Khu guralo, Pfhumu Nungungulu a ngu ganela kharati mayelano khu Jowakimi, mwamana wa Josiya, mufumeli wa Judha, khuye: “A gufa kha va na mu lila, khavo: Yowe, ndriyangu! Mwendro gukhavo: Yowe, hane wangu! Va nga wombi huwa, khavo: Yowe, mune wathu! Mwendro gukhavo: Yowe, pfhumu yathu!”

¹⁹ A gufa a na dzingwe kha nga buru; va na mu ndrindrandrindre va mu dzudzuga vbavbandze nya dzinyangwa dza Jerusalema.

Gitiviso nya gusasedwe Jekoniya

²⁰ Jerusalema gwela Libhanoni u ya laledza, khu lito nya likhongolo tigoni ga Bhasani; u laledza nuri khu Abharimi, kholu sigodwa sago satshavbo si mbembisidwe.

²¹ Nyi ganede nago na si nga gu gu gimbilela gwadi, aholu u di ganela, khuwe: “Kha nyi na nga yingisa.” Gukhugela wudzhahani gwago, mapimo yago ma di khala kharati; gima kha wa nga yingisa lito langu.

²² Vathangeli vago vatshavbo va na pengiswa khu phuvbo, ni dzipari dzago dzi na yiswa wugumbitunu; u na khala dzitshoni ni gu poyilega, khu kotani nya sighoho sago.

²³ Uwe u khalago Libhanoni, u vbahidego gihaga gyago matamoni nya sedhari, litshigu nya mhango u na wona tshanisa ngudzu, guvbisa gakone gu fanana ni ogu gwa nyamayi a lumwago!

²⁴ Kha nga olu nyi vbanyago, a ngu ganela Pfhumu Nungungulu khuye, uwe Jekoniya, mwamana wa Jowakimi, mufumeli wa Judha ambari nari gupwani u phera ya mandzani gwangu ga nyamudye, nyi di hadza gu gu sigula.

²⁵ Nyi na gu ningela mandzani ga vale va dzi emisedego gu gu songa, ni mandzani ga vale u va ningago githawo, mandzani ga Nabhukodhonosori, mufumeli wa Bhabhiloni ni mandzani ga Vakalidhiya.

²⁶ Uwe gumogo ni mayi wago a nga gu velega, nyi na mi tutumisa mu ya ga litigo mu si litigo, u ngamba velegedwa umo, mu ya fela yoyo.

²⁷ Aholu va na suva gu wuya tigoni va gu golago, aholu kha gu na kodzega.

²⁸ Ina kamwe Jekoniya a di vbindrugedza a khala gindzengele nya khali yi pandregidego, mwendro gyombo nyamba phasa gilo gi si khathaledwigo khu muthu, gani? Khu kotani nya ginani va nga dzegwago gumogo ni livelego lawe va ya dzudzugwa ga litigo va si litigo?

²⁹ Uwe litigo, litigo, litigo langu! Yingisa lito la Pfhumu Nungungulu.

³⁰ Pfhumu Nungungulu a ngu ganela kharati, khuye: “Muthu yoyu mu loveni nga moyo a gu mwalo sanana, guvbanyani gwaye gima kha na mana gukatega.” Kholu kha na dugelela ni moyo nya gyanana gyaye, a na gu khalago vbagikhalotunu nya wufumu wa Dhavhidhe, gumogo gambe ni gu fumela tigoni ga Judha.