Jeremiya 21 - Bhibhiliya Nya Guage

Gitiviso nya gupfhungumudwe ga Jerusalema khu Nabhukodhonosori

¹ Magana ya Pfhumu Nungungulu, ma di rumedwa ga Jeremiya, gikhati mufumeli Zedhekiya, a nga rumela Pasuri, mwamana wa Malikiya, ni muphasi nya mhamba Sofoniya, mwamana wa Mahaseya, a va embela, khuye:

² “Hi ngu lomba gukhethu u hi wudzisela ga Pfhumu Nungungulu, kholu Nabhukodhonosori, mufumeli wa Bhabhiloni, a ngu soma nyimbi a hi sasela, mwendro saye Pfhumu Nungungulu a na hi girela siliwugiso gasi nala a khuge vbakari gwathu.”

³ Khavbo avbo, Jeremiya a di va hakha, khuye: Bwelelani mu ya tivisa kharati Zedhekiya, khenu:

⁴ Pfhumu Nungungulu wa Israyeli, a ngu ganela kharati, khuye: Wonani nya gukhenu matshari yoyo mu gu nawo mandzani gwanu, mu dwanago khayo ni mufumeli wa Bhabhiloni gumogo ni Vakalidhiya va mi randredego khu hwane nya mabhiyo; nyi na ma wungedzela vbakari nya lidhoropa leli.

⁵ Eni kamwe wurumba wangu, nyi na dwana nanu khu gyandza nya gukhugege, nyi na mi veta khu libogo nya tshivba, na nyi tade khu gugoroga ni likhulo nya likhongolo ngudzu.

⁶ Nyi na sasela vavbanyi va dhoropani momu, vathu gumogo ni sirengo; va nafa khu tungu nya guthise.

⁷ “Khu hwane nya esi, Pfhumu Nungungulu a ngu ganela khuye nyi na ningela Zedhekiya, mufumeli wa Judha, manganagana yaye, vathu vaye ni vatshavbo va na gu vbulugago gufa khu tungu, gu sasedwa khu matshari ni gufa khu ndzala, mandzani ga Nabhukodhonosori, mufumeli wa Bhabhiloni, ni mandzani ga valala vaye, ni ga vatshavbo va zamago gu mu songa; va na va sasela khu matshari, nyamba va tsetsa ambari gu va pwela gisiro.”

⁸ Gasi uwe u na embela vathu vava, khuwe: “Pfhumu Nungungulu a ngu ganela kharati, khuye: Wonani eni nyi ngu vega mbeli gwanu ndzila nya guvbanye ni ndzila nya gufe.”

⁹ Avo va na tshalago dhoropani momu, va na songwa khu matshari, ndzala mwendro tungu; aholu avo va na guya dzi ningelago ga Vakalidhiya, va mi randredego, va na vbanyisa womi wawe.

¹⁰ Kholu Pfhumu Nungungulu a ngu ganela kharati, khuye: Nyi dzi emisede gu veta lidhoropa leli, khu kotani nya sighoho saye nasiri khu wuwadi; li na thega mandzani ga mufumeli wa Bhabhiloni, uye a li vbisa khu nilo.

¹¹ U na embela gambe nyumba ya na Judha, khuwe: Upwani magana ya Pfhumu Nungungulu ma gukhayo;

¹² Uwe nyumba ya Dhavhidhe! Pfhumu Nungungulu a ngu ganela kharati, khuye: Vbadzimindrutunu lamulani khu gululama, tshudzisani avo va tshaniswago, gasi likhulo langu li si dzuri nga nilo, li vbisa nyamba tshimwa khu muthu, khu kotani nya mithumo yanu nya guvivbe.

¹³ Wona nya gukhuwe nyi mi wugede, enu vavbanyi va kovani, ni uwe giwindri gi ladzidwego panini, a ngu ganela Pfhumu Nungungulu; nyi na wugela ni enu mu ganelago khenu khu mani a na gu relelago ata hi wugela? Mwendro khu mani a na gu belago dzinyumbani gwathu?

¹⁴ “Nyi na mi tsayisani gukhedza khu mithumo yanu, a ngu ganela Pfhumu Nungungulu; nyi na khondrisa nilo khabini gwanu, wu na vbisago satshavbo si guromo bambe nya lidhoropa lanu.”