Jeremiya 15 - Bhibhiliya Nya Guage

Gulamudwa ga va na Judha

¹ Pfhumu Nungungulu a di nyi embela, khuye: “Ambari nari pwani Mosi ni Samuweli vomo mbeli gwangu va lombelela khu vathu vava, gima eni nyi si va tsetseleli; va duse mbeli gwangu, u va yise hwindzo ni eni!”

² Va gu gu wudzisa, khavo: Hi naya hayi? U na va embela, khuwe: Pfhumu Nungungulu a ngu ganela kharati, khuye: Avo va lumbwago khu gufa, va naya gufani; avo va lumbwago gu songwa khu matshari, va na songwa khu matshari; avo va lumbwago gufa khu ndzala, va nafa khu ndzala; ni vale va lumbago gu yiswa wugumbitunu, va na yiswa iyoyo.

³ Pfhumu Nungungulu a ngu ganela khuye, nyi na va rumela dzimhango dzina nya sitsayiso a gu edzi: Va na songwa khu matshari, sirumbi sawe si ndrindrwa khu dzimbwa, nyama yawe yi rothedwa khu sinyoni sa damboni ni gu hodzwa khu sirengo sa khabini si va vbiyela.

⁴ Nyi na va ningela va khala gihegiso ga mifumo yatshavbo ya mafuni; khu kotani ya Manasi, mwamana wa Ezekhiya, mufumeli wa Judha, khu satshavbo iso a giridego Jerusalema.

⁵ Khu guralo, uwe Jerusalema, khu mani a na gu pwelago gisiro, a vbisega khu mahungu yago? Khu mani a na ndreyago a gu wusela a pwa guvbanya gwago?

⁶ Pfhumu Nungungulu a ngu ganela, khuye: Mu nyi digide mu nyi pfhurarela. Khu guralo, nyi na thawuludza gyandza gyangu vbatshani gwago, nyi gu mbembisa; nyi garade khu gu gu divalela.

⁷ Nyi va vbevberide khu gisavala dzinyangwani nya litigo, vathu vangu nyi va dzegede sanana sawe, nyi bwelo khavbo nyi va mbembisa; gambe kha va diga dzindzila dzawe nya guwegele.

⁸ Dzinoni dzawe, dzi tade guvbindra fungu wa phwani; nyi rumede mumbembisi ga mayi nya madzaha yawe, gu ngari mihani; nyi mu resede khu githugedza gusaniseka ni hwanga, gu tadza lidhoropa latshavbo.

⁹ Nyamayi a velegidego livbandre na sivili sanana, a di tala khu wuvi a dzima, afa; avbo gwaye lidambo li di khwatshi li pfode, aholu gu di ngari mihani; uye a di tala khu dzitshoni ni guvbisega. Avo va na tshalago, nyi na va ningela va songwa khu matshari mbeli ga valala vawe; a ngu ganela Pfhumu Nungungulu.

Jeremiya a ngu dilela, Pfhumu a mu hakha

¹⁰ Libango langu, mayi wangu! U nyi velegede ginani gasi nyi khala muthu nya gu vengwe ni gu dwaniswa khu vathu vatshavbo! Nyi si gu fiyarisi dzitsapawu, ambari gu fiyari ga muthu; aholu vatshavbo va gu nyi hembulula.

¹¹ Pfhumu Nungungulu a di ganela, khuye: “Khu lisine eni nyi na gu tiyisa nyi bwelo khavbo nyi gu kategisa, gikhatini nya mhango ni gusaniseka, nyi na gira ya valala vago vata khidzima migondroni gwago.”

¹² “Ina muthu a ngu dzi kodza gu funya simbi, yitago khu Wuronga mwendro sugu, gani?”

¹³ Silo sago ni thomba yago nyi na si ningela si phangwa mahala, khu kotani nya talo nya sighoho sa tigoni gwago gwatshavbo.

¹⁴ U na girwa khumbi khu valala vago ga litigo u si li pimigo; kholu nilo nya likhulo langu wu khondride, wu na dzura wu mi vbisa.

¹⁵ Uwe Pfhumu Nungungulu u ngu siti; nyi alakanye ni gu nyi phasa, nyi phodzele ga valala vangu, u nga va digi va nyi songa, khu kotani nya litimiselo lago navo; wona gukhuwe nya gu tshaniswa khu kotani nya lihaladzo nyi gu nalo nago.

¹⁶ Avbo nyi nga mana magana yago, ayo ma di khala guhodza gwangu; ayo ma di khala litsako ni gunengela nya monyo wangu, kholu nya gu ranwa khu lina lago, uwe Pfhumu Nungungulu nya Tshivba Yatshavbo.

¹⁷ Gima kha nya khala tshanganoni nya vatseketseli ambari gutsaka navo; nyi di khala nyonga nyi phasedzedwa khu mandza yago, kholu likhulo lago li di tadza hefemulo wangu.

¹⁸ Gasi khu ginani gu gumba vbela gutshaniseka gwangu? Dzimbanga dzangu dza gumba vbola khu ginani? U na khala kha nga gitsongwana nyamba tumbega gi vbwago mati yaye, gani?

¹⁹ Khu guralo, Pfhumu Nungungulu a ngu ganela kharati, khuye: “Wa gu dzi laya, u wuya eno gwangu, nyi na gu hakha u ta khala mbeli gwangu; wa gu ganela silo nya lisima u hambana niso nya guvivbe, uwe u na khala kha nga likana langu, vathu va na wuya iyo gwago, khandri uwe u na gu bwelelago iyo gwawe.

²⁰ Nyi na gu vega u khala likhokhola nya sugu nya litigo leli; va na dwana nago, aholu kha va na gupala, kholu eni nyi na ni uwe gasi nyi gu vhikela ni gu vbulugisa avbo gwawe, a ngu ganela Pfhumu Nungungulu.

²¹ Nyi gu vbulugisa mandzani ga va nya guvivbedwa khu monyo, ni gu gu vbulugisa mandzani ga va nya tshivba.”