Jeremiya 14 - Bhibhiliya Nya Guage

Gihala nya gikhongolo

¹ Aya khu magana ya Pfhumu Nungungulu a ma rumedego ga Jeremiya khu mahungu nya gute gihala nya gikhongolo.

² Judha a ngu lila, madhoropa yaye ma vbede tshivba; vavbanyi vaye va thegide vbavbatshi na va ambade silendra, gupwala huwa dhoropani ga Jerusalema.

³ Vathu vawe nya guthavisege va gu ruma sithumi sawe guya rega mati, aholu avo kha va ma mani kholu milamboni gu bangide; va bwelela ni dzikhali nya maphanga, va poyilega khu dzitshoni, va fenengedza mihungo.

⁴ Valimi navo va fenengedzide dzikhovbe dzawe khu dzitshoni, khu kotani nya mafu ma bangidego, kholu ndzadzi kha yiwi mafuni.

⁵ Ambari ni yisya ya khabini yi ngu diga giyisyana gyaye yi velegidego, kholu wu mwalo mwasi.

⁶ Vamangulwe va khabini, va gu ema sigomoni nya gulaphe, va dagata kha nga migehe, maho yawe ma tsagatela vafa, khu gu hamuga mwasi.

⁷ Ambari hi konwago khu sighoho sathu, kholu milandru yathu mingi ngudzu; kholu hi gu ghohedego, ambari khu guralo, Pfhumu Nungungulu, hi phase khu lihaladzo nya lina lago.

⁸ Uwe khuwe gitumbo gya Israyeli, mutshudzisi gikhatini nya wuvi! Khu ginani u khala nga muluveli tigoni, kha nga muvbindri nya ndzila a ndreyago gasi guya lala a gedwa basi?

⁹ Khu ginani u gira nga muthu a garadego, mwendro ndrena nyambana tshivba yi gumba kodza gu vbanyisa? Aholu uwe Pfhumu Nungungulu, u womo vbakari gwathu, ethu ha gu ranwa khu lina lago; u nga hi digi.

¹⁰ Khu kotani nya vathu vava, Pfhumu Nungungulu a ngu ganela kharati, khuye: “Kha nga va nga tsakelago guhambana ni eni, va gola gu legalega; khu guralo, Pfhumu Nungungulu kha tsakiswi khavo, a na va tsayisa khu gu alakanya sighoho sawe.”

¹¹ Pfhumu Nungungulu a di engedza a nyi embela gambe, khuye: “U nga dzi garadzi khu gu lombelela gu vbweta iso nya sadi ga vathu vava.”

¹² “Ambari va gu hala, eni kha nyi na yingisa gulila gwawe, va gu nyi girela dzimhamba nya guvbiswe ni dzimhamba nya guhodze, kha nyi na tsakiswa khidzo; nyi na va mbembisa khu matshari, ndzala ni mitungu.”

¹³ Khavbo avbo, eni nyi di mu phindrula, kheni: “Oh! Pfhumu Nungungulu, wona nya gukhuwe vaprofeti va gu va embela, gukhavo: Gima kha mu na sasedwa khu matshari, ni gu wona ndzala; aholu a na mi resela gurula nya gutiye wulangani wowu.”

¹⁴ Pfhumu Nungungulu a di nyi embela, khuye: “Vaprofeti va gu profeta malipha khu lina langu; khandri eni nyi va rumedego, ambari gu leletela ni gu va embela; va gu profeta avbo gwanu khu siwoniso nya malipha ni misihalo nya gu pfhadzwe khu guwegela nya myonyo yawe.”

¹⁵ Khu guralo, Pfhumu Nungungulu a ngu ganela kharati khu mahungu nya vaprofeti va profetago khu lina langu, nyamba rumedwa kheni, va bwelo khavbo va ganela gukhavo kha va na wona dzinyimbi, ambari ndzala tigoni momu, khuye: Vaprofeti vovo, va na sasedwa khu matshari ni ndzala.

¹⁶ Ni vathu va dzi girelago wuprofeti, va na mbambamela mudzindzilani dza Jerusalema, khu kotani nya gu songwe khu ndzala ni matshari; kha va na dzingwa khu muthu, avo gumogo ni vagadzi vawe, sanana sawe nya sikhwathana nesi nya sagadzyana; nyi na va fenengedza khu libango va li wusidego vabune.

¹⁷ Gasi uwe, u na va embela magana yaya, khuwe: Khu mahoni gwangu gwa gu vbalaga marongo wutshigu ni mihani nyamba hegisa, kholu nyamahegyane nya likendzi wa Siyoni, a thedwe gilondra nya gikhongolo nya gimange.

¹⁸ Nya gu hongola gundze, nya gu wona vathu va sasedwego khu matshari, nya gu wuya dhoropani, nya gu wona avo va dagarelago khu ndzala; ambari vaprofeti ni vaphasi nya mhamba, va gu legalega tigoni nyamba pima gilo.

¹⁹ Ina va na Judha u va digede muphelo, gani? Ina kamwe monyo wago wa gu swihala khu Siyoni, gani? Khu ginani u hi podego dzimbanga dzi si vboligo, na? Ha gu lindrela gurula, aholu gimwalo nya gyadi hi gi wonago; Ha gu khedzisela gikhati nya guvbanyiswe, aholu ha guta mana wuvi.

²⁰ Oh! Pfhumu Nungungulu! Sighoho sathu hi ngu siti, ni sighoho sa vababe vathu; kholu hi gu ghohede.

²¹ Khu kotani nya lihaladzo nya lina lago, u nga hi digi; u nga poyili gikhalo gyago nya wudhumo, alakanya gidzumeledzwano hi hungidego nago, u nga gi tshuli.

²² Ina womo nungungulu wa va nya mayigo a wisago ndzadzi, gani? Mwendro ndzadzini gu ngu kodza gwabune gu wisa ndzadzi, gani? Ina khandruwe basi u gu Pfhumu Nungungulu wathu, gani? Ha gu tumba uwe basi, kholu khuwe u girago silo satshavbo.