Jeremiya 13 - Bhibhiliya Nya Guage

Libhandri nya seda

¹ Pfhumu Nungungulu a di ganela kharati avbo gwangu, khuye: “Indra dzi rengela libhandri nya seda u dzi hunga khilo giwununi gwago, aholu u nga li negi matini!”

² Khu guralo, nyi di ya dzi renga libhandri, kha nga idzo a ganedego khidzo Pfhumu Nungungulu, nyi dzi hunga khilo mugiwununi.

³ Lito la Pfhumu Nungungulu li di engedza lita avbo gwangu khu gikhati nya wuvili, khilo:

⁴ “Dzega libhandri u nga rengago li guromo giwununi gwago, u khuga u hongola tsongoni wa Ewufrate u ya li siha phagoni nya giwindri.”

⁵ Nyi di hongola nyi ya li siha bambe nya tsongo wa Ewufrate, kha nga idzo nyi nga leletedwago khidzo khu Pfhumu Nungungulu.

⁶ Na gu vbindride matshigu nya gutale, Pfhumu Nungungulu a di nyi embela, khuye: Khuga u ya Ewufrate u ya dzega libhandri nyi gu leletedego gu ya li siha iyo.

⁷ Nyi di khuga nyiya Ewufrate, nyi ya kela, nyi dzega libhandri avbo nyi nga bani nyi li sihide; aholu libhandri li di gu hinide li si phasi gambe gilo.

⁸ Khavbo avbo, lito la Pfhumu Nungungulu, li dita avbo gwangu li ta nyi embela, khilo:

⁹ Pfhumu Nungungulu a ngu ganela kharati, khuye: “Khidzo kharato, nyi na hinisa matshandza ya Judha ni gu dzi khusedza ga Jerusalema.”

¹⁰ Vathu vava nya guvivbedwe khu monyo, va si dzumeligo gu yingisa magana yangu, va gimbilago khu dzindzila dzi godwago khu myonyo yawe, ni gu landrisela vanungungulu nya valombo, va va khozela ni gu va thumela, va noga mbeli gwawe, va na fanana ni libhandri leli li si phasigo gilo.

¹¹ Kholu, kha nga libhandri li hungwago giwununi nya muthu, khidzo kharato eni nyi dzi hungide ni nyumba yatshavbo ya Israyeli ni nyumba yatshavbo ya Judha, a ngu ganela Pfhumu Nungungulu, gasi va khala vathu vangu, lina, wuzundzo ni wudhumo wangu; aholu avo kha va nyi yingisa.

Kanvu nya gupandrege

¹² Khu guralo, u na va embela kharati, khuwe: Pfhumu Nungungulu wa Israyeli a ngu ganela kharati, khuye: Gu vbweta mu tadza sikanvwana satshavbo khu vbinyu, va na gu embela, khavo: Ina ethu kha hi dziti gwadi nya gukhethu sikanvwana satshavbo si na tala khu vbinyu, gani?

¹³ Aholu uwe u na va embela, khuwe: Pfhumu Nungungulu a ngu ganela kharati, khuye: Wona nya gukhuwe vatshavbo vavbanyi va tigoni momu, vafumeli va khalago gikhaloni nya wufumu wa Dhavhidhe, vaphasi nya mhamba, vaprofeti ni vatshavbo vavbanyi va Jerusalema, nyi na va levisa khu wadwa.

¹⁴ Nyi na va vbadzulela va khala khu sipandre va pandrana khu gyawe, vavelegi gumogo ni sanana, a ngu ganela Pfhumu Nungungulu; gima kha nyi na va divalela ni gu va tsetsa ambari gupwa gisiro khu avo gasi nyi si va mbembisi.

¹⁵ Dembani ndzeve mu yingisa, mu nga dzi khusedzi; kholu Pfhumu Nungungulu ganede.

¹⁶ Dhumisani Pfhumu Nungungulu wanu, gu si gu vbohi gidema, migondro yanu yi si gu tshunganeli musigomoni nya guthise; avbo mu na gu khedziselago guwonegela, aholu uye a na gu vbindrugedza a resa wutshigu ni gidema nya guthise.

¹⁷ Mwa gumba dzumela gu yingisa, nyi naya lila gusihalani, khu kotani nya matshandza yanu; maho yangu ma na lila khu wuvi wangu watshavbo nyi vbaladza marongo, kholu tshambi wa Pfhumu Nungungulu, wu vbagedwe wu yiswa wugumbitunu.

¹⁸ Embela mufumeli ni pfhumugadzi, khuwe: “Dzi vbwasamiseni mu khala vbavbatshi, wumburi ni sihugu nya wudhumo wanu, si thegide khu mihungoni gwanu.”

¹⁹ “Madhoropa ya Marandzi ma segidwe, mwalo a kodzago gu ma tula; vatshavbo va na Judha va vbagedwe va yiswa wugumbini; vatshavbo va hongode kha ga tshala muthu.”

²⁰ Khusani maho mu wone avo vatago khu phuvbo ga Wuronga; womo hayi tshambi u nga bani u ningidwe, dzomo hayi dzinvuta nya wudhumo wago?

²¹ U na khuwe ginani a gu vega dzipari dzago dzi gu fumela, olu a gu uwe kamwe u va hevbudzidego gu khala vamune vago? Ina khwa napwa guvbisa kha nga nyamayi nya gulumwe, gani?

²² Avbo u na ganelago khu monyoni gwago, khuwe: “Khu ginani nyi taledwago khu sigaradzo satshavbo sesi?” Dziti gwadi gukhuwe, talo nya sighoho sago, khiso si giridego u fununguledwa dzitshalu dzago, ni sitshinandro sago si napwa wuvi nya wungi.

²³ Ina Muetiyopi a ngu dzi kodza gu vbindrugedza tshonge yaye, mwendro likhamba mavalavala yaye, gani? Khu guralo, enu nenu, olu mu nga olovela gu gira guvivba kha mu na dzi khodza gu gira ugo nya gwadi.

²⁴ Khu guralo, nyi na mi phalalegisa kha nga mungu wu vbuvbiswago khu phuvbo giwulani.

²⁵ Khigyo egi giavelo gyago, gipandre u na pimedwago kheni, a ngu ganela Pfhumu Nungungulu; kholu u di divaledwa kheni, u tumba vanungungulu nya malipha.

²⁶ Eni neni kharato nyi na funungula dzitshalu dzago kala khovbeni gwago; gasi gu wonega dzitshoni dzago.

²⁷ Nyi wonide wubhayi ni manavelo yago, wuphuphulu wago nya guvbindre pimo wa musigomoni ni magabini; libango avbo gwago, uwe Jerusalema! Kala lini u si kodzi gu dzi agisa?