Jeremiya 11 - Bhibhiliya Nya Guage

Gupfhungumudwa nya gidzumeledzwano

¹ Lito la Pfhumu Nungungulu, li dita ga Jeremiya lita mu embela, khilo:

² “Yingisa magana nya gidzumeledzwano gegi, u ma tshamusela ga va na Judha ni ga vatshavbo va vbahidego Jerusalema;”

³ u va embela, khuwe: Pfhumu Nungungulu wa Israyeli a ngu ganela kharati, khuye: Nyi ngu vala muthu watshavbo a si yingisigo magana nya gidzumeledzwano gegi,

⁴ nyi ningidego vababe vanu gikhati nyi va dusidego khu tigoni ga Egipito, gidhingiseloni nya dzisimbi, nyi nga va embela, kheni: Yingisani lito langu ni gu gira satshavbo nyi mi rumago; khu guralo, enu mu na bani muri vathu vangu, eni neni nyi na khala nyiri Nungungulu wanu;

⁵ khu guralo, nyi na tiyisa gifungo gyangu nyi tumbisidego vababe vanu gu va ninga litigo li gogago mahwe ni wulombe, kha nga mu si wonago muhuno.” Gasi eni nyi di hakha, kheni: “Amen! Si na girege uwe Pfhumu Nungungulu.”

⁶ Pfhumu Nungungulu a engedza a nyi embela, khuye: Tivisa madhoropani gwatshavbo ga Judha ni mudzindzilani dza Jerusalema magana yaya, khuwe: Yingisani magana yaya nya gidzumeledzwano, mu bwelo khavbo mu ma landrisa.

⁷ Kholu gukhugela litshigu nyi mi dusidego khu tigoni ga Egipito, kala muhuno, nyi phede khu gu embela vababe vanu, nyi simamide gu va embela kharati, kheni: Yingisani lito langu!

⁸ Aholu avo kha va nga yingisa, ambari gu neredza ndzeve; muthu ni muthu a di gimbila khu ndzila nya gugodwe khu monyo waye nya guvivbe; khu guralo, nyi nga va girelago sitsayiso satshavbo si lovidwego umo nya gidzumeledzwano nyi va rumedego gu si landrisa; aholu avo kha va si landrisa.

⁹ Pfhumu Nungungulu a di nyi embela, khuye: Vathu va na Judha ni Jerusalema va di gira gikungo khu eni.

¹⁰ Va bwelelede ga sihevbulo nya guvivbe sa vababe vawe, va ngamba dzina gu yingisa magana yangu; va khozela vanungungulu nya malipha; nyumba ya Judha ni Israyeli va yeyiside gidzumeledzwano nyi giridego ni vababe vawe.

¹¹ Khu guralo, Pfhumu Nungungulu a ngu ganela kharati, khuye: Nyi na resa vbakari gwawe libango va na gumba vbuluga khilo, va na keta ni gu wombeledzela dzihuwa, aholu eni kha nyi na va yingisa.

¹² Khu guralo, madhoropa ya Judha ni vavbanyi va Jerusalema, va na lila ga vanungungulu va nga va vbiselago libani; aholu, kha va na vbanyiswa khavo khu litshigu nya libango.

¹³ Uwe Judha, tengo nya vanungungulu vago wungi ngudzu; va ninganago ni madhoropa yago, gukhedza khu tengo nya dzindzila dza Jerusalema, mu emiside siluvelo nya dzitshoni mu vbisela avbo libani Bhahali.

¹⁴ Khu guralo, uwe Jeremiya u nga lombeleli khu vathu vava, ambari gu khusa lito u lila khu avo ni gu va girela nombelo; kholu gikhati va na gu lilago avbo gwangu gima kha nyi na va yingisa, khu kotani nya sighoho sawe.

¹⁵ Gasi gigodwa gyangu gya gu vbweta ginani nyumbani gwangu, nya nga olu nya vangi vawe va girago silo nya singi nya gunyenyeze, va gu alakanya gukhavo dzinyama nya miphaso dzi ngu kodza gu dusa manyala yago, gani? Ina u ngu dzi kodza gu dzi khusedza khu gutsaka, gani?

¹⁶ Pfhumu Nungungulu a gu riyide lina nya gukhuye khuwe Olivha nya gunyuge, nya gumbure khu kotani nya mihandro yaye nya gutsakise; aholu, olu khu kotani nya ligwaha nya likhongolo, a na khondrisa nilo khu dzibambe gwaye, wu vbisa matamo yaye.

¹⁷ Kholu Pfhumu Nungungulu nya Tshivba Yatshavbo, Uye a gu yadego a tiviside gu gu resela mhango khu kotani nya sighoho si giridwego khu ndranga ya Israyeli ni ya Judha, kholu mu nyi wusede likhulo khu gu vbisela libani Bhahali.

Jeremiya a ngu wugedwa

¹⁸ Nyi si pimide kholu Pfhumu Nungungulu dzinide gukhuye nyi si pima; eni nyi wona mithumo va nga bani na va gu gira.

¹⁹ Nyi di difanana ni nvuta nya gurule yi yiswago gusongwatunu; kholu eni nyi di si dziti gukheni va di gu nyi girela gikungo nya gu nyi songe, va ganela, khavo: “Hi na pile simbo yoyu na wu ngari ni mihandro yaye, hi na wu fuvise tigoni nya vathu va vbanyago, gasi gu si alakanywi gambe lina laye.”

²⁰ Aholu, Uwe Pfhumu Nungungulu nya Tshivba Yatshavbo, mulamuli a lulamidego, U lingago mapimo ni hefemulo, dzi yeyedze gwangu khu gu livbisa vathu vava; kholu avbo gwago nyi vegide mahungu yangu.

²¹ Khu guralo, Pfhumu Nungungulu a ngu ganela kharati ga vathu va Anatoti, va vbwetago gu nyi songa na va gu ganela, khavo: “U nga profeti gambe khu lina la Pfhumu Nungungulu gasi u si feli mandzani gwathu.”

²² Ina, Pfhumu Nungungulu nya Tshivba Yatshavbo a ngu ganela kharati, khuye: “Wonani, eni nyi na va tsayisa; madzaha ma na songwa khu litshari, ni sanana sawe nya sikhwathana ni sagadzyana si nafa khu ndzala.”

²³ Kha gu na tshala ni moyo wawe, kholu nyi na resa mhango ga vathu va Anatoti, khu mwaga nya tsayiso yawe.