Jakobe 5 - Bhibhiliya Nya Guage

Gu dundrugisa va nya gufuma

¹ Olu, enu sitetema, upwani! Lilani, mu wombe dzihuwa khu kotani nya sisaniso mu na si wonago.

² Dzithomba dzanu dzi hinide, ni guambala gwanu gu hodzidwe khu muhwa.

³ Ndralama ni parata yanu si pfhurede. Gupfhurela gogu gu na khala fakazi nya gu mi wugele kha nga nilo, gu hodza sivili sanu. Enu, mu wungedzede dzithomba ga matshigu yaya nya guhegise.

⁴ Kha mu hakhisi vathu va thumago marembweni gwanu. Upwani gudilela gwawe, dzihuwa dza vale va nga thuma guvbwera, dzi vbohide kala dzindzeveni ga Pfhumu Nungungulu, nya Tshivba Yatshavbo.

⁵ Enu mu vbanyide mafuni momu khu manonwa ni gu dzi londrola. Khu guralo, mu enide nga dzimombe dziyago gusongwani.

⁶ Enu mu ngu ninga nandru, mu songa vathu nyambana nandru, avo kha va dzi kodzi gu dzi vhikela gwanu.

Gutimisela ni gu lombelela

⁷ Khu guralo, vandriyangu, timiselani kala Pfhumu yi wuya. Wonani edzi mulimi a timiselago khidzo, kala lithembwe laye li ninga mihandro nya yadi. Uye a gu timisela, a gu virela ndzadzi nya guphele ni eyi nya guhegise.

⁸ Enu nenu, timiselani, mu nga garali, kholu, Pfhumu womo vbafuvbi ni gu vboha.

⁹ Vandriyangu, mu nga ganedzisani khu gyanu, gasi mu si lamudwi. Wonani nya gukhenu Mulamuli womo vbamwanyatunu.

¹⁰ Vandriyangu, alakanyani vaprofeti va nga ganela khu lina la Pfhumu. Va gireni giwonelo nya gutimisele gikhati nya sisaniso.

¹¹ Ha gu wona gukhethu avo va tsakide kholu va nga timisela sigaradzo. Enu mu pwidego na gu ganedwa khu gutimisela ga Joba, mu ngu dzitini edzi Nungungulu a nga mu kategisa khidzo. Kholu Pfhumu tade khu wuwadi ni wuhindzi.

¹² Aholu, ga satshavbo, enu vandriyangu, mu nga sambanyi khu ndzadzini, ambari khu mafu, ambari khu gimbe gilo. Ganelani basi, khenu: “Ina,” a gu bani ari ina; khenu “Ahihi,” a gu bani ari ahihi, gasi mu si ningwi nandru.

¹³ A gu bani a romo muthu vbakari gwanu, a sanisekago, a na lombelele. A gu bani a romo a tsakidego, a na embelele dzindzimo nya gubonge.

¹⁴ A gu bani a gu dwala muthu, a na rane vathangeli nya Libandla vata gira milombelo ni gu mu todza mafura khu lina la Pfhumu.

¹⁵ Nombelo wu girwago khu gukhodwa wu na vbanyisa mudwali. Pfhumu yi na mu ninga womi, yi mu tsetselela siwono saye esi a giridego.

¹⁶ Khu guralo, embeledzelanani siwono sanu, mu girelana milombelo khu gyanu, gasi mu hawuluga. Nombelo wa muthu a lulamidego wu na ni tshivba.

¹⁷ Muprofeti Eliya a diri muthu kha nga ethu. Uye a di lombelela khu tshivba, gukhuye yi siwi ndzadzi, gu vbela myaga miraru ni livbandre na moyo migima nyambawa ndzadzi tigoni.

¹⁸ A di wuya khavbo a lombelela gambe, yi guwa ndzadzi, mafu ma ninga mihandro.

¹⁹ Vandriyangu, moyo wanu, a gu diga ndzila nya lisine, mumbe a na mu wuyise ndzilani.

²⁰ Dzitini gukhenu: Oyu a wuyisago gighohi ndzilani nya gululame, a na vbanyisa hefemulo wa gighohi gyogyo, gambe a na gira gu tsetseledwa sighoho nya singi.