Jakobe 2 - Bhibhiliya Nya Guage

Gumba hathela vathu

¹ Vandriyangu, enu mu khodwego ga Pfhumu yathu Jesu Kristo, Pfhumu nya wudhumo, mu nga giri gihathela vathu, mu khedza makhalelo.

² Nya nga kharati, vbakari nya tshangano wanu ata bela muthu na ambade phera nya ndralama ni dzingandzu nya gumbure, guta bela nuye mumbe nya gisiwana na ambade dzingandzu nya guhagale;

³ enu mwa gu khatalela oyu nya gitetema a ambadego gwadi, khenu: “Khala avba wulanga nya guthavisege,” khu hwane, mu embela gisiwana, khenu: “Uwe ema avba, wa gu dzina khala vbavbatshi, migondroni gwangu.”

⁴ Ina kha mu woni gukhenu mwa gu gira gihathela khu gyanu, mu khala valamuli nya mapimo nya guvivbe, gani?

⁵ Yingisani gwadi, vandriyangu nya sigodwa, ina Nungungulu kha hatha sisiwana sa mafuni momu a si gira sitetema nya gukhodwe, si khala vahodzi nya thomba nya wufumu a nga tumbisago ga vale va mu golago, gani?

⁶ Aholu, enu mwa gu nyenya sisiwana. Ina khandriso sitetema si mi sololago si mi yisani phathani muya lamudwa, gani?

⁷ Ina khandriso sitetema si ganelago guvivba khu lina nya ladi, eli a mi ningidego, gani?

⁸ Khu guralo, mwa gu landra nayo yoyu nya Wufumu, mu ngu gira gwadi, owu wu ganedwago khu Milowo nya Guage, khiyo: “Gola muthu kwanu nga edzi u dzi golago khidzo uwe wurumba wago,” avbovbo mu ngu girani gwadi.

⁹ Aholu mwa gu gira gihathela, mu ngu ghoha. Mu na konwa khu nayo, mu mana nandru.

¹⁰ Khu guralo, oyu a landrisago milayo yatshavbo, a gu ghoha nayo moyo, ghohide yatshavbo.

¹¹ Kholu oyu a nga khuye: “U nga bhayi,” khuye gambe a nga ganela, khuye: “U nga songi.” Wa gumba bhaya, aholu u songa, u na ni nandru ga milayo yatshavbo.

¹² Enu ganelani, mu vbanye nga vathu va na gu lamudwago khu nayo wu ningago gutshulega.

¹³ Gikhati Nungungulu a na gu lamulago, kha na tsetselela ava va ngamba tsetselela vakwawe, aholu, ava va nga tsetselelago vakwawe, kha va na ningwa nandru Litshigu nya Gulamudwe.

Gukhodwa ni mithumo

¹⁴ Vandriyangu, gu ngu phasa ginani muthu a gukhuye a na ni gukhodwa na si yeyedzi khu mithumo? Ina gukhodwa gogo gu ngu dzi kodza gu mu vbanyisa, gani?

¹⁵ Nya nga kharati, ndriyago nya mwama, mwendro nya nyamayi, nari ni wuhagadzo ni ndzala nya guhodze nya litshigu ni litshigu,

¹⁶ moyo wanu a gu ganela, khuye: Indrani khu gurula, fenengelani mu furumela, hodzani mu khura, aholu nyamba mu ninga gilo nya guphase givili gyaye; giphaso muni mu mu girelago?

¹⁷ Khu guralo, gukhodwa gwamba wonegiswa khu mithumo, gukhodwa gogo gu fude.

¹⁸ Aholu mumbe muthu a na, khuye: “Ina, uwe u na ni gukhodwa, eni nyi na ni mithumo, nga nyi yeyedza gukhodwa gwago nyambana mithumo, eni, khu mithumo yangu, nyi na gu yeyedza gukhodwa gwangu.”

¹⁹ Uwe u ngu khodwa ga Nungungulu moyo basi, gani? U ngu gira gwadi; ambari nayo maphuvbo nya guvivbe ma ngu khodwa, ma ndrendremela.

²⁰ Gipumbuwe! U ngu dzina gu wona gukhuwe gukhodwa nyambana mithumo kha gu phasi gilo, gani?

²¹ Ina babe wathu Abrahama kha sayedwa muthu nya gululame khu mithumo, gikhati a nga dzumela gu ningela mhamba khu mwanaye Isaki vbagiluvelotunu, gani?

²² Mu ngu wonani nya gukhenu gukhodwa gwaye gu di longoloka gumogo ni mithumo. Khu mithumo, gukhodwa gwaye gu di tadzisega.

²³ Khu guralo, gu di tadzisega avbo Milowo nya Guage yi ganelago, khiyo: “Abrahama khodwe ga Nungungulu. Khu gukhodwa gwaye, Nungungulu a mu wone nga moyo nya gululame.” A di ranwa pwani pari ya Nungungulu.

²⁴ Kharati khavbo mu wonago nya gukhenu muthu a gu sayedwa gululama khu Nungungulu khu kotani nya mithumo yaye, nasiri khu gukhodwa basi.

²⁵ Khiso si nga girega ga nyamayi nya gibhayi, Rahabhi. Uye a di sayedwa muthu nya gululame khu Nungungulu khu kotani nya mithumo yaye, kholu a di hakha vasoli va na Israyeli a gu va phasa gu duga khu yimbe ndzila.

²⁶ Nga olu, givili gya gumbana hefemulo gi fago, kharato nugo gukhodwa, nyambana mithumo, gu fude.