Isaya 7 - Bhibhiliya Nya Guage

II. LIBHUKU NYA GITANGADZISO MWENDRO LA EMANUWELI Giprofeto mayelano khu Israyeli ni Siriya

¹ Khu matshiguni ya Akazi, mwamana wa Jotamo, mwamana wa Uziya, mufumeli wa Judha. Rezimi, mufumeli wa Siriya, ni Peka, mwamana wa Remaliya, mufumeli wa Israyeli, va di gwela Jerusalema guya li dhumela. Aholu va diya tandrega gu li wandra.

² Khu guralo, ndranga ya Dhavhidhe yi di tiviswa gupwani: “Siriya hungide pwanano ni va na Efrayimi.” Khavbo avbo, monyo wa Akazi, wu di ndrendremela gumogo ni vathu vaye, gu fanana ni misimbo ya khabini ya gu bani yi kutsungwa khu phuvbo.

³ Pfhumu Nungungulu a di embela Isaya, khuye: “Olu duga gumogo ni mwanago Seyari-Yasube u khinga Akazi, u naya mu mana mahegiso nya sele nya litsiva li guromo Ndzilani nya lithembwe la Muhandzi,

⁴ u naya mu embela, khuwe: Dzi wonele, rula! U nga thavi ambari gu vbela tshivba khu kotani nya sihalyana sivili si tuvigago wutshi; khu kotani nya likhulo la Rezimi gumogo ni la Siriya, ni la mwamana wa Remaliya.

⁵ Kholu Siriya gumogo ni Efrayimi ni mwamana wa Remaliya, va hungide gikungo nya guvivbe nya gu gusasele, khavo:

⁶ Hongoleni hi ya wugela Judha, hi mu thusedzela, hi mu wandrela litigo, hi emisa mwamana wa Tabhiyali a fuma vbakari gwawe.

⁷ Pfhumu Nungungulu a ngu ganela kharati, khuye: Isoso gima kha si na girega, gambe gima kha si na dugelela.

⁸ Kholu tsindza wa Siriya khu Dhamasiko, Ni mufumeli wa Dhamasiko, khu Rezimi; ndrani nya livbandre na limwedo magumi ni livbandre myaga, Efrayimi, a na mbembiswa muphelo, a si khali gambe litigo!

⁹ Samariya tsindza wa Efrayimi, mufumeli wa Samariya, khu mwamana wa Remaliya, aholu mwa gumba khodwa, khu lisine, kha mu na simama mu vbanya, gima kha mu na tiya.”

Gitumbiso khu Emanuweli

¹⁰ Pfhumu Nungungulu a di engedza a ganela ga Akazi, khuye:

¹¹ “Lomba giyeyedzo gimwegyo nya gisamadziso ga Pfhumu Nungungulu wago, gani khya vbavbatshi, gya guetani, mwendro gya vbatshani damboni.”

¹² Akazi a di phindrula, khuye: “Kha nyi na gira isoso, gambe, kha nyi na linga Pfhumu Nungungulu.”

¹³ Khavbo avbo, muprofeti Isaya, a di ganela, khuye: Olu yingisani gwadi, enu lihundzu la Dhavhidhe; Ina kha mu garali khu gu hodzisa mbukuta vathu, gani? Mwa guvbweta gambe gu hodzisa mbukuta Nungungulu wangu, gani?

¹⁴ Khu guralo, Pfhumu kamwe a na gu ninga giwonegiso gimwegyo a gu egi: “Nyamahegyane nya likendzi a na khura mimba a velega gyanana nya gikhwathana, a na gi riyago lina nya gupwani Emanuweli.”

¹⁵ Gi na hodza wusa ni wulombe kala gi gu vbohisa tanga nya gukodze gu nyenya esi nya guvivbe ni gu hatha esi nya sadi.

¹⁶ Aholu, gyanana gegi, na gi si gu kodzi gu nyenya guvivba ni gu hatha wuwadi, mayigo ya vafumeli va vavili va gu thusedzelago ma na bani ma vbindrugedzide ma khala giwula.

Tshanisa ya Jerusalema

¹⁷ Aholu Pfhumu Nungungulu a na resa gwago, vbakari ga vathu vago, gumogo ni dzindranga dza babe wago, khiyo ga mufumeli wa Asiriya, matshigu nya gu gima ma si gu manegi, gukhugela litshigu Efrayimi a nga dzi pambulago ga Judha.

¹⁸ Kholu, gu na vboha litshigu Pfhumu Nungungulu a na wombago ndrodzi, a rana mabhawa ma guromo mivbinganoni nya mitsongo ya Egipito, ni dzinyosi dzi guromo tigoni ga Asiriya.

¹⁹ Idzo dzi nata mbaka mikovani nya guete ni dziphagoni nya siwindri, mibani gwatshavbo, ni wuhaviseloni gwatshavbo.

²⁰ Ga litshigu lolo, Pfhumu, a na va vbalula hungoni khu gisingwana gi lombidwego, gi guromo khu khisikheyi nya tsongo, a gu uye mufumeli wa Asiriya, a na vbalulago hungo, giledzu ni mafefeleti nya mawundru yanu.

²¹ Ga litshigu lolo, moyo ni moyo a na fuya mombe mweyo nya ngadzi ni dzinvuta dzimbili,

²² iso si na dusa mahwe nya mangi, vatshavbo va na tshalago tigoni, va na hodza mahwe ni wulombe.

²³ Khu litshigu lile gambe, lithembwe ni lithembwe nya miuvha li gu na ni likhumi mazana (1.000) misimbo, li ninganago likhumi mazana (1.000) singerengere nya parata, li na vbindrugedza li buga miba ni sirangalabwa.

²⁴ Umomo, gu na bedwa basi khu vale va gu ni malaho ni siholoma, kholu tigoni gwatshavbo gu na bani gu khumide khu sirangalabwa ni miba.

²⁵ Ni musigomoni gwatshavbo umo gu nga bani gu limwa, u na thava ni gu gu bela khu kotani nya sirangalabwa ni miba; gu na khala basi wuhaviselo nya dzimombe ni gu gandredzedwa khu dzinvuta.