Isaya 66 - Bhibhiliya Nya Guage

Nungungulu a na lamula va nya guvivbedwa khu monyo

¹ Pfhumu Nungungulu a ngu ganela kharati, khuye: Ndzadzini gikhalo gyangu nya wufumu, ni mafuni gigandredzelo nya migondro yangu. Gasi lifumbu muni nya nyumba mu hadzago gu nyi vbahela, ni gasi wulanga muni nyi yelago gu hefemula avbo, na?

² Kholu mandza yangu, khayo ma giridego silo satshavbo sesi, ni silo satshavbo sesi si di girega; a ngu ganela Pfhumu Nungungulu, aholu nyi na khedza uye a dzi thesago vbavbatshi: Wule a gu ni monyo wu khuvegidego, sisiwana ni vale va ndrendremelago khu gupwa magana yangu.

³ Muthu a payago mombe, a ngu fanana ni oyu a songago muthu; oyu a payago nvutana a gira khiyo phaselo, a gu fanana ni oyu a tshomborosago thamo nya yimbwa; oyu a ningelago ningelo khu wuguvbi, a gu fanana ni oyu a ningelago khu novba nya khumba; uye a vbisago libani, a gu fanana ni uye a khozelago sifananiso. Kha nga olu avo va dzi hathedego dzindzila dzawe wurumba, mihefemulo yawe yi na tsakela silo nya gunyenyeze.

⁴ Khu guralo, eni neni nyi na va girela sigaradzo nya sikhongolo, nyi na resa vbatshani gwawe iso si na gu va thelago hwanga; kholu nyi ranide, gambe mwalo a nga nyi hakhago, nyi ganede, gima kha va yingisa; aholu va di gira ugo gu nyenyezidego mbeli gwangu ni gu hatha gu gira iso nyi si si goligo.

⁵ Yingisani magana ya Pfhumu Nungungulu enu mu mu thavago, enu mu ndrendremelago mbeli nya magana yaye. Vandriyanu va na mi nyenya va mi tutumisa, muya hwindzo khu kotani nya lihaladzo lanu khu lina langu, va ganela, khavo: “Pfhumu Nungungulu a na yeyedze wudhumo waye, gasi hi kodze gu wona gutsaka gwanu, vathu vovo va na thedwa dzitshoni.”

⁶ Gu pwala ligwaha nya likhongolo dhoropani, li dugelago Nyumbani ga Nungungulu, lito la Pfhumu Nungungulu, a dzi phodzelago ga valala vaye.

Guvelegwa nya lihundzu nya gukari

⁷ Lidhoropa la Siyoni, li na fanana ni nyamayi a nga velega na si gu lumwi; a nga hefemula gikhwathana nyamba pwa wuvi.

⁸ Khu mani a pwidego mahungu nya nga aya? Khu mani a nga wonago silo nya nga esi? Ina litigo li ngu kodza guvelegwa khu litshigu limwedo mwendro mufumo gu wumbwa khu litshigu limwedo, gani? Aholu lidhoropa la Siyoni na li si gu lumwi, li di velega sanana saye.

⁹ Pfhumu Nungungulu a ngu wudzisa, khuye: “Ina Eni nyi sayisago nyamayi gikhati nya gudandrise mimba yaye nyi na padwa khu gu mu ninga tshivba nya guvelege, gani? Eni nyi hefemudzisago nyi nga dzi kodza gu sega givelegelo, gani? A ngu ganela Nungungulu wago.

¹⁰ Tsakani enu mwatshavbo mu golago Jerusalema, mu nengela gumogo naye, enu mwatshavbo mu lidego khuye.

¹¹ Kholu mu na mama mu khura, khu mahwe nya gutangadzise gwaye; gasi mu buza mu bwelo khavbo mu tsakiswa khu gu tala ni gungangamela nya wudhumo waye.”

¹² Kholu Pfhumu Nungungulu a ngu ganela kharati, khuye: Wonani nya gukhenu nyi na mi resela gurula nya gungi, nya gukhwatshi tsongo wu khulungago, gumogo ni thomba nya mayigo, gukhwatshi gitsongwana gi gogago. Khavbo avbo, mu na mama, va mi wugarela mawogoni, va mi ladzisa vbamarumbitunu gwawe.

¹³ Kha nga mayi a tangadzisago gyanana gyaye, eni neni nyi na mi tangadzisani; mu naya tangadziswa kharato dhoropani ga Jerusalema.

¹⁴ Avbo mu na wonago silo sesi si na gu girega, myonyo yanu yi na tsaka, ni marambo ma na nyuga nga mwasi nya nyenvu; kholu tshivba ya Pfhumu Nungungulu, yi na dzi wonegisa ga sithumi saye, aholu likhulo laye li na wugela valala vaye.

¹⁵ Wonani nya gukhenu Pfhumu Nungungulu a nata kha nga nilo, ni dzikareta dzaye dzi na fanana ni gipupwane, gasi gu resa likhulo laye nya guvbise. A na va kawuka khu malavbelavbe nya nilo.

¹⁶ Kholu, Pfhumu Nungungulu a na lamula vathu vatshavbo, khu nilo ni litshari; vangi ngudzu va na gu songwago khu gyandza gya Pfhumu Nungungulu.

¹⁷ A na mbembisa vatshavbo avo va dzi agisago ni gu dzi handza, gasi gu bela mahangeni va landrisela nungungulu nya nyamayi a guromo khu vbakari, va hodzago nyama nya khumba, ni silo nya gunyenyeze ni magondzo.

¹⁸ Kholu mithumo yawe ni mipimiso yawe, nyi ngu yiti! Gi nguta gikhati nyi na gu tombanisago mayigo ni malimi yatshavbo; va nata vata wona wudhumo wangu.

¹⁹ Nyi na va vega giwonegiso, avo va na gu vbulugago, nyi na va rumela mayigoni ya Tarisisi, Puli ni Ludhi, vathu nya gu kodze gu khwandra siholoma, Tubhali ni Javha, kala sidwani sa hwindzo, ga vathu va ngamba tshukha vapwa ndruma yangu, ambari gu wona wudhumo wangu; va naya tivisa wudhumo wangu ga mayigo yoyo.

²⁰ Va na resa vandriyanu vatshavbo khu mayigoni, gasi gu gira ningelo ga Pfhumu Nungungulu, na va khilede dzikavalu, dzikareta, vambe na va khusidwe khu matsira, vambe khu dzimula, ni dzingameriya, gigomoni gwangu nya gukatege gya Jerusalema, a ngu ganela Pfhumu Nungungulu. Va gira kha nga va na Israyeli gikhati va resago miningelo yawe nya dzimbewu Nyumbani ga Pfhumu Nungungulu khu mikanvuni yi agidego.

²¹ Vbakari gwawe, nyi na hatha vambe va khala vaphasi nya mhamba, vambe va thuma mithumo ya na Levhi, a ngu ganela Pfhumu Nungungulu.

²² Kha nga olu ndzadzini nya guphya ni litigo nya liphya, nyi na gu si girago, si na khalago mbeli gwangu, kharato nilo livelego lanu ni lina lanu li na khala kharato gikhati gyatshavbo, a ngu ganela Pfhumu Nungungulu.

²³ Khu guralo, gumegani nya ngima ni ngima, ni Sabhadho ni Sabhadho, vathu vatshavbo va nata va ta nyi khozela, a ngu ganela Pfhumu Nungungulu.

²⁴ Va na duga vaya wona sirumbi nya vathu va nga nyi wugelago; kholu siwungu sawe gima kha si na ngafa, ambari nilo wawe, kha wu na tshimega; gu na bani guri tshanisa ga vathu vatshavbo.