Isaya 65 - Bhibhiliya Nya Guage

Gulamudwa ni guvbanyiswa

¹ Nyi vbwetidwe khu vale va ngamba nyi wudzisa, nyi manwa khu vale va ngamba nyi vbweta, ga litigo li nga bani li si rani lina langu, eni nyi di ganela, kheni: “Nyi womo avba.”

² Litshigu latshavbo nyi khusedzide mandza yangu, gasi gu rana vathu vava nya guyeyise, va gimbilago khu ndzila nya guwegele, va landrisela silo si godwago khu myonyo yawe.

³ Vathu vava va nyi vbisisago monyo gikhati gyatshavbo, khu gu gira miphaselo marembweni ni gu vbisa libani vbatshani nya giluvelo nya sitini;

⁴ va khala marowoni va pilekelana wutshigu vbafuvbi ni malangani nya gusihalege; va hodza nyama nya dzikhumba, na vari ni muro nya silo nya gunyenyeze dzimbiyani gwawe.

⁵ Vathu vava va ganelago, khavo: Khuga avbovbo u guromo! U nga hidzimeli avba gwangu, kholu eni nyi agide ngudzu guvbindra uwe; vathu vava, wutshi thonvuni gwangu! Va gu fanana ni nilo wu dzurago litshigu latshavbo.

⁶ Wona nya gukhuwe si lovidwe mbeli gwangu gupwani: “Kha nyi na degula; nyi si gu bweledzeli, nyi bwelo khavbo nyi gu ninga tshatshazelo wago,

⁷ Pfhumu Nungungulu a ngu ganela kharati, khuye: Khu guvivba gwanu, gumogo nugo ga vababe vanu, va vbisidego libani sigomoni, va nyi vala na vari musigomwanani; khu guralo, nyi na simama gu pima mithumo yawe ya gale vbakari gwawe.”

Phindrulo ya Nungungulu: Guvbanyisa ga avo va khodwago

⁸ Pfhumu Nungungulu a ngu ganela kharati, khuye: “Gwa gu bani gu ngari ni dosi gitsatsani nya dziuvha, vathu vari, khavo: Mu nga gi pili kholu gu nga guromo silo nya sadi, kharati nyi na gira khu kotani nya lihaladzo nyi gu nalo ni sithumi sangu; kha nyi na va mbembisa vatshavbo.

⁹ Nyi na dusa ga situgulwana sa Jakobe ni ga Judha, moyo a na khalago gihodzathomba yangu ya musigomoni; sihathwa sangu si na fumela litigo, sithumi sangu si vbaha umo.

¹⁰ Panini ga Saroni gu na khala wulanga nya wuhaviselo nya dzinvuta, ni kova wa Akora, wu na khala lizumbo nya dzimombe, la vathu vangu va nyi ningago githawo.

¹¹ Aholu enu mu si khathaligo khu Pfhumu Nungungulu, mu divala gigomo gyangu nya guage, enu mu dongiselago meza vanungungulu nya malipha va ranwago pwani Gadhi ni Meni,

¹² nyi na mi resela nenu libango, mwatshavbo mu na songwa khu matshari nyamba vbuluga ni moyo. Kholu nyi mi ranide gambe kha mwa nyi ninga phindrulo, nyi ganede, gambe kha mwa yingisa magana yangu; aholu mu di gira silo nya guvivbe mbeli gwangu, mu hathani gu gira ugo gu gumba nyi nengedzisa.”

¹³ Khu guralo, Mune, Pfhumu Nungungulu, a ngu ganela kharati, khuye: Wonani nya gukhenu sithumi sangu si na hodza si khura, aholu enu, mu na tshaniseka khu ndzala; sithumi sangu si na sela mati, aholu enu, mu dagarela khu lidora, sithumi sangu si na nengela, aholu enu, mu na khala dzitshoni;

¹⁴ wonani nya gukhenu sithumi sangu si na embelela khu gutsaka nya myonyo yawe, aholu enu mu na keta khu guvbisega myonyoni gwanu, mu womba huwa khu guvbisega hefemuloni.

¹⁵ Malina yanu ma na tshala na mari givalo vbakari ga sihathwa sangu, Mune, Pfhumu Nungungulu, a na mi songa; aholu sithumi saye, a na si rana khu limbe lina.

¹⁶ Ni wevbini a lombago gikategiso omu mafuni, a na kategiswa khu Nungungulu nya lisine, ni wevbini a na gu sambanyago mafuni, a na sambanya khu Nungungulu nya lisine; kholu gugaradzega gwaye gwa gale gu na divaledwa; gu sihidwe mbeli gwangu.

Ndzadzi nya yiphya ni litigo nya liphya

¹⁷ Wonani! Nyi na vanga ndzadzi yiphya ni mafu maphya, gasi silo sa gale mu si si dundrugi, ambari gu si alakanyela gambe.

¹⁸ Aholu mu na tsaka mu nengela khu satshavbo iso nyi na gu si vangago; kholu wonani lidhoropa la Jerusalema, nyi na li gira nari ilo li tsakisago vathu vangu, ni vathu vaye va khala na va nengede.

¹⁹ Nyi na nengela khu Jerusalema, nyi tsaka khu vathu vangu, gima kha gu na pwala gambe gwawe lito nya gililo, ambari gudilela.

²⁰ Kha gu na manega gambe gwawe sanana nya guvbanye matshigu madugwana, ambari sikhosane nya gumba tshanganisa matshigu nya guvbanye gwawe; kholu oyu a na fago nari ni lizana (100) myaga, a na bani na ngari lidzaha, aholu gumba tshanganisa lizana myaga, gu na wonwa kha nga givalo.

²¹ Avo va na vbaha dzinyumba, va vbanya umo; va na yala marembwe, gambe va na hodza mihandro yakone.

²² Kha va na vbaha gambe dzinyumba dzi ta khadwa khu vambe vathu; kha va na yala gasi gu vambe va hodza. Kholu, vathu vangu va na vbanya myaga nya gulaphe kha nga misimbo, sihathwa sangu si na hodza satshavbo nya thumo nya mandza yawe.

²³ Kha va na thumela mahala, ambari gu velega sanana gasi si tshaniseka, kholu avo gumogo ni situgulwana melego wu kategisidwego khu Pfhumu Nungungulu.

²⁴ Gikhati va lombelelago, nyi na va ninga phindrulo na va si gu vbedzi; na va nga guganela, eni nyi na va yingisa.

²⁵ Lisolwa ni nvutana si na hodza dangamwedo, nghala yi na hodza mwasi kha nga mombe; nyoga yi na hodza kudzudzwane. Gigomoni momu gwangu nya guage, kha gu na girwa gambe guvivba ambari gumbembiswa. Kheni Pfhumu Nungungulu nyi ganelago!