Isaya 35 - Bhibhiliya Nya Guage

Gunengela ga Siyoni ga matshigu ma nga gutago

¹ Giwula ni mafu nya gihala si na tsaka khu isoso; marumbi ma na kulungela, ma na buga senge nya gumbure nya nga makhonwa.

² Khu kharato si na rumbuga senge, si kulungela khu gunengela, si embelela khu gutsaka; va na ningwa wudhumo wa Libhanoni, ni wa Saromi, ni gungangamela nya gigomo Karameli; vathu va na wona wudhumo wa Pfhumu Nungungulu, ni gungangamela ga Nungungulu wathu.

³ Tiyisani mawogo ma garadego, mu tiyisedza dzikhungumudzi dzi rerekidego.

⁴ Embelani avo va vbedego tshivba, khenu: “Tiyani, mu nga thavi! Kha mu mu woni oyu Nungungulu wanu, a tago guta mi phodzela, gasi gu bweledzela valala vanu, guvivba va mi giredego. Uye a nguta khu wurumba waye, gasi guta mi vbanyisa.”

⁵ Khavbo avbo, maho nya sikhumu ma na tulega ni sivbwiri si na tulega dzindzeve sipwa.

⁶ Silima si na ndragandraga kha nga dzimangwa, ni malimi nya sidudu ma na kulungela khu gutsaka, kholu mati ma na goga giwulani ni gu buga mitsongo mafuni nya gihala.

⁷ Mafu ma vbisidwego ma na vbindrugedza ma khala litsiva, ni aya nya gihala, ma na vbindrugedza ma khala sifefe nya mati; phalani gu khalago masolwa, gu na buga mwasi, dzitshava ni madadanga.

⁸ Gu na manega avbovbo ndzila nya yikhongolo nya likondro, yi na ranwago pwani Ndzila nya Guage; va nya gunyenyeza, kha va na vbindra khiyo. Yi emisedwe basi vathu va Nungungulu, khavo va na gimbilago khiyo, ambari nari sipumbu, kha va na dzimela.

⁹ Umomo kha gu na manega dzinghala, ambari ni girengo gimwegyo nya wurena kha gi na vbindra khu ndzila yoyo; aholu gu na gimbila khiyo basi vale va tshudzisidwego.

¹⁰ Avo va na tshudziswago khu Pfhumu Nungungulu, va na bwelela va wuya Siyoni, na va gu kulungela khu gutsaka; Va na fenengedzwa mihungoni gwawe, khu litsako nyamba vbela. Va na taledwa khu gutsaka ni gunengela; gulila ni wuvi si na bani si vbindride gwawe.