Isaya 33 - Bhibhiliya Nya Guage

Gutshaniseka ni guvbanyiswa gwa Jerusalema

¹ Libango gwago, uwe muphangi, uwe gima u si gu phangwigo, u kanganyisago vakwanu avo gima va sa gu kanganyisago! Avbo uwe u na vbedzago gu phanga, u na phangwa nuwe, avbo u na vbedzago gu kanganyisa, va na gu kanganyisa nuwe!

² Pfhumu Nungungulu, hi pwele wusiwana, kholu ethu ha gu tumba uwe! Khala uwe tshivba yathu khu litshigu ni litshigu li gyago, ni muvbanyisi wathu gikhatini nya mhango.

³ Va gupwa gudzuma nya lito lago, va nya mayigo va na tutuma; gikhati u khusegago, mayigo ma na phalalega.

⁴ Khu guralo, silo sanu mu phangidego, si na wungedzedwa kha nga idzo yi wungedzedwago khidzo mbasa; kha nga dzimbera dzi ndragandragago, kharato nugo, vathu va na ndragandraga navo.

⁵ Pfhumu Nungungulu a khusedzidwe, kholu a gu vbanya vbatshani ngudzu; Uye tadzide Siyoni khu lisine ni gululama.

⁶ Siyoni, matshiguni gwago, gu na manega gukhadzisega, guvbanyisa nya gutale, guti ni mapimo; thomba yago, khu gu ninga githawo Pfhumu Nungungulu.

⁷ Wonani gukhenu! Dzindrena dzaye dzomo dzindzilani, dzi wombedzelana dzihuwa, myango nya gu rese gurula ya gulila khu wuvi wawe watshavbo.

⁸ Dzindzila dzi khade marumbi, mwalo muthu a gimbilago gambe khidzo; kholu gu fuvisidwe gidzumeledzwano, madhoropa ma gu hembuludwa, mwalo a ma khathalago.

⁹ Litigo lomo mugililoni ni guvbela tshivba; Libhanoni a gu wu na khu dzitshoni; Saromi, vbindrugedzide a fanana ni giwula, Sihagane sa Bhasani ni Karimelo si moride.

¹⁰ Pfhumu Nungungulu a ngu ganela kharati, khuye: “Olu, Eni kamwe nyi na khuga nyi ema; olu, va na nyi khusedza.

¹¹ Mu khuride mimba nya mavivi, mu na velega mwasi nya gubange; guhefemula gwangu, gu na khala nilo wu na mu mbembisago.

¹² Va nya mayigo va na vbiswa kha nga idzo yi vbiswago khidzo phembe, kha nga miba yi kokeledwego yi vbiswa niloni.

¹³ Enu mu vbanyago mayigoni ya hwindzo, tulani dzindzeve mupwe esi nyi giridego; ni enu mu guromo vbafuvbi, yitini tshivba yangu.”

¹⁴ Sighohi sa gigomoni gya Siyoni, si tade khu hwanga, va nya guvivbedwa khu monyo, va ngu ndrendremela, khavo: “Khu mani vbakari gwathu a na tiyago gu ema mbeli nya nilo nya mavbiselo yaya? Khu mani vbakari gwathu a na vbanyago malavbelavbeni nyamba tshimega, na?”

¹⁵ Wule a gimbilago khu ndzila nya gululame ni gu ganela lisine; oyu a si khathaligo khu dzithomba nya guphangwe, oyu a si hakhigo khu mandzani gwaye silo nya gu rengeledwe; oyu a tshikago dzindzeve gasi a si yingisi mahungu nya gusonge, oyu a segago maho gasi a si woni guvivba.

¹⁶ Khuye oyu a na khalago wulanga nya gukhugege; makhokhola nya siwindri ma na bani mari wuthavelo waye nya gutiye, a na ningwa guhodza gwaye, a sela mati khu gikhati gi vbwetegago.

¹⁷ A na wona wumburi wa mufumeli khu maho yaye, va wona litigo li ladzidego kala hwindzo.

¹⁸ Myonyo yawe yi na alakanya tshanisa ya gale, va ganela, khavo: “Womo hayi mulovi? Womo hayi uye a nga bani a pima tengo nya gikhaba, womo hayi uye a nga sayelago makhokhola?”

¹⁹ Gima khu na wona gambe vathu vale nya dzihanyi, va ganelago lidimi hi si li pimigo, vathu nya gu khukhumele gu ganela, nyamba si pima iso va ganelago.

²⁰ Wonani Siyoni, lidhoropa hi girelago umo mibuzo yathu; maho yago ma na wona Jerusalema, wulanga nya gutenge, tshatsha wu na gumba sigudwa, madingo yaye gima kha ma na nga sigudwa, ambari ni dzingodzi dzaye gima kha dzi na kaviga.

²¹ Kholu Pfhumu Nungungulu a na bani nari umo khu wudhumo waye, umo gu na khulunga mitsongo nya guaname, gu na goga mitsongo ni sitsongwana nya guaname; yi mwalo ngalava nya makasiya yi na vbindrago khumo, ambari ni litaro nya likhongolo, gima kha li na vbindra khumo.

²² Aholu Pfhumu Nungungulu khuye mulamuli wathu, Pfhumu Nungungulu khuye muvegi nya nayo wathu, Pfhumu Nungungulu khuye Mufumeli wathu; khuye a na hi vbanyisago.

²³ Dzingodzi nya dzingalava dzaye dzi nyegide, ni miningwati yaye, kha ya tiya, matanga yaye, kha ma ghwimbega. Khavbo avbo, va na kabaniswa pfimba nya phango nya wungi wu phangidwego; ambari ni silima si na phanga niso.

²⁴ Mwalo ni moyo muvbanyi wa Jerusalema a na gukhuye: “Eni nyi ngu dwala; kholu vathu va vbanyago umo, va na ditshedzwa sighoho sawe.”