Isaya 3 - Bhibhiliya Nya Guage

Gulamudwa gwa Judha ni Jerusalema

¹ Kholu, wonani nya gukhenu: Mune, Pfhumu Nungungulu Nya Tshivba Yatshavbo, a na wandrela Jerusalema ni Judha iso si va vbanyisago ni siseketelo satshavbo, a na va dzegela guhodza gwawe gwatshavbo ni mati nya gusele.

² A na dzega gambe dzindrena, vadwani nya nyimbi, valamuli ni vaprofeti, va nya sikwembu ni madhota;

³ muthangeli nya gikwata nya livbandre magumi (50), vathu nya guthavisege, vasingalagadzi, va nya gugengela, vameseri ni va nya gu gira sisamadziso.

⁴ Nyi na va ninga madzaha ma khala vafumeli vawe, va na fumedwa khu sanana.

⁵ Va na tshanisana khu gyawe; muthu ni muthu a na wugela muthu kwawe, gyanana gi na wugela lidhota, ni muthu nya nyalidede a na wugela muthu nya guthavisege.

⁶ A na manega uye a na guyago ga ndriyaye, ga moyo wa nyumbani ga babe waye, aya, khuye: “Uwe u na ni guambala, khala muthangeli wathu, marumbi yaya ma na manege mandzani gwago!”

⁷ Aholu khu litshigu lile, uye a na phindrula, khuye: Kha nyiri nyanga, gaya gwangu gu mwalo guhodza, ambari guambala nyi mwalo; mu nga nyi vegini gu khala muthangeli nya vathu.

⁸ Kholu Jerusalema gu tshunganede, Judha thegide, kholu magana ni mithumo yaye, khya gu wugela Pfhumu Nungungulu, va hembulula guwonega nya wudhumo waye.

⁹ Dzikhovbe dzawe dzi ngu va thuledza; dzi bhusa phungu nya sighoho sawe kha nga Sodhoma, nyamba siha gilo. Libango ga mihefemulo yawe! Kholu va gu dzi vangela vabune libango.

¹⁰ Embelani va nya gululama khenu satshavbo si na va dugela gwadi, kholu, va na hodza handro nya sigiro sawe.

¹¹ Libango ga va nya guvivbedwa khu monyo! Kholu, va na thegedwa khu mhango! Va na hakha tshatshazelo nya esi va yadego khu mandza yawe.

¹² Vathu vangu va gu tshaniswa khu sanana, va fumedwa khu vanyamayi. Enu! Vathu vangu, avo va mi thangelago va gu mi kanganyisa va mi ndreyisa ga ndzila mu yelago gu gimbila khiyo.

¹³ Pfhumu Nungungulu a na khuga a ema; a duga, a lamula mayigo.

¹⁴ Pfhumu Nungungulu a nguta lamula madhota ya tigoni gwaye, gumogo ni vathangeli va vathu vaye, kholu, khenu mu ghohetedego lithembwe leli, mu tadzide dzinyumba dzanu khiso mu nga bela sisiwana.

¹⁵ Gasi ginani mu gi vbwetago khu gu tshanisa vathu vangu, olu mu gandredzelago vbavbatshi sisiwana? A ngu wudzisa Mune, Pfhumu Nungungulu nya Tshivba Yatshavbo.

Gulamudwa ga vanyamahegyane va Siyoni

¹⁶ Pfhumu Nungungulu a ngu engedza a ganela, khuye: Kha nga olu vanyamahegyane va Siyoni va dzi gugumugisago, va gimbila na va khusedzide dzithamo, maho yawe na ma tade khu wukanganyisi, va gu gimbila gukhwatshi va di hungwa, na va gu dzumisa masindra ya mawundruni gwawe.

¹⁷ Pfhumu Nungungulu a na thela sidhole mihungoni ya vanyamahegyane va Siyoni, a va tshulela dzitshalu va khala wumbwiri.

¹⁸ Khu litshigu lolo, Pfhumu, a na wandrela vanyamayi satshavbo sombo sawe nya gu dzi mburisele, khiso: Masindra ya mawundruni, niso nya gu luge khiso ndzudzu ni mikarara ya thamoni;

¹⁹ dziphera dza dzindzeveni, wulungu ni sikhongelo;

²⁰ Mongo, dziketane, mabhandri, sigasyana nya mafura nya gunungele, ni masindra ya mawundruni;

²¹ dziphera ni dhayimane nya gukhedzige nya guthedwe dzithonvuni,

²² guambala nya mibuzo, sifenengelo, mabhadzi, sikhwama ni sipeneti;

²³ mabona, dzingandzu nya seda, mongo nya guhunge hungoni ni sikhongelo nya guwonegele.

²⁴ Wulangani nya mafura nya gunungele, gu na pwala gununga nya silo nya guhine, wulangani nya libhandri, gu na manega ngodzi; wulangani nya gulugwe ndzudzu, gu na manega likhwalu; wulangani nya guambale nya buzo, gu na ambadwa silendra; wulangani nya wumburi, gu na manega mambala nya guvbiswe khu nilo.

²⁵ Vathu vago va na songetedwa khu matshari; ni dzindrena dzago dzatshavbo, dzi na fela nyimbitunu.

²⁶ Dzinyangwani nya lidhoropa lago, gu na pwala dzihuwa; u na tshala nyambana gilo, Siyoni a khala vbavbatshi huye hokohoko.